გიორგი ლაფერაშვილი: პროკურატურამ გაუთქმელობის შესახებ ხელწერილი დამადებინა

ტელეკომპანია „ფორმულას“ საინფორმაციო სამსახურის უფროსმა გიორგი ლაფერაშვილმა პროკურატურაში რამდენიმე საათიანი გამოკითხვის დასრულების შემდეგ განაცხადა, რომ გამოკითხვის დეტალებზე ვერ ისაუბრებს, რადგან გაუთქმელობის შესახებ ხელწერილი დაადებინეს.

"მაქვს დადებული ხელწერილი გაუთქმელობის შესახებ და აქედან გამომდინარე არ მაქვს საშუალება ვისაუბრო დეტალებზე. არაფერი ახალი და მოულოდნელი არ ყოფილა პაატა სალიას იმ ბრიფინგის შემდეგ, რომელიც დაახლოებით თვენახევრის წინ გაიმართა. გავიდა 2 თვეზე მეტი ამ საქმის გამოძიებიდან და პროკურატურას დასჭირდა ტელეკომპანია "ფორმულას" დირექტორის და საინფორმაციო სამსახურის უფროსის გამოკითხვა მაშინ, როცა ფორმულა გავიდა ეთერში. ბუნებრივია, ჩვენ არ ვეძებთ ბნელ ოთახში შავ კატას, მხოლოდ იმ შემთხვევაში, როცა კატა იქ არის, ვამბობთ, რომ არის. დამიჯერეთ ის ოთახი შავი კატებითაა სავსე",-განაცხადა ლაფერაშვილმა.

გიორგი ლაფერაშვილი და „ნაციონალური მოძრაობის“ წევრი ზაალ უდუმაშვილი პროკურატურაში დღეს საღამოს მივიდნენ. 

პროკურატურის შენობაში შესვლამდე ლაფერაშვილი ამბობდა, რომ მისი გამოკითხვაზე ყოფნა დროის კარგვა იყო.

"უბრალოდ გული მწყდება იმასთან დაკავშირებით, რომ ახლა საეთეროში უნდა ვიყო. ჩემი აზრით ამ ძალინ მნიშვნელოვან დროს ვკარგავ არაფერში. თუმცა, როგორ არაფერში, ჩვენ ვნახეთ რამდენ საათს გაგრძელდა გუშინ "ფორმულას" დირექტორის ზუკა გუმბერიძის დაკითხვა და მერე იცით, ისიც, როგორი არაფრის მომტანი იყო ეს ყველაფერი. სავარაუდოდ, პროკურატურამ დღეს გადაწყვიტა, რომ ანალოგიურად მოიქცეს ჩემთან დაკავშირებით", - განაცხადა ლაფერაშვილმა. 

ზაალ უდუმაშვილმა კი ლაფერაშვილის გამოკითხვაზე დაბარება კრიტიკული მედიის დევნად შეაფასა. "წარმოდგენა არ მაქვს რა კითხვები შეიძლება ჰქონდეს პროკურატურას. ეს პროცესი მთლიანად არის პოლიტიკური დევნის პროცესი, როგორც პოლიტიკოსების, ისე მედიამენეჯერების მიმართ", - აღნიშნა უდუმაშვილმა. 

2 ოქტომბერს პროკურატურაში ტელეკომპანია „ფორმულას“ გენერალურ დირექტორ ზურაბ გუმბარიძეს 9 საათის განმავლობაში კითხავდნენ.

ამავე საქმის ფარგლებში ტელეკომპანია „რუსთავი 2“-ის ყოფილ ფინანსურ დირექტორს კახა დამენიას და „ინტერ მედია პლიუსის“ დირექტორს ზურაბ იაშვილს საქალაქო სასამართლომ 50-50 ათასი ლარის გირაო შეუფარდა.

2 აგვისტოს მაგისტრატი მოსამართლის თანდასწრებით ტელეკომპანიის ყოფილი დირექტორი ნიკა გვარამია დაიკითხა. მისი თქმით, გამოძიების მთავარი ინტერესია, რატომ ფორმდებოდა სარეკლამო კონტრაქტები ამა თუ იმ თანხაზე.

საქართველოს გენერალურმა პროკურატურამ „რუსთავი 2“-ის ყოფილი გენერალური დირექტორის ნიკა გვარამიას საქმეზე თბილისის საქალაქო სასამართლოს აღკვეთის ღონისძიების შეფარდების შუამდგომლობით 10 აგვისტოს  მიმართა. 11 აგვისტოს სასამართლომ ნიკა გვარამიას 40 000 ლარის გირაო შეუფარდა. 6 სექტემბერს ნიკა გვარამიას ახალი ბრალი წარედგინა.