Conti ჯგუფი ანაკლიის პროექტში დარჩენას არ აპირებს

Conti ჯგუფი ანაკლიის პროექტში დარჩენას არ აპირებს. კომპანიის მიერ გავრცელებული ოფიციალური რელიზიდან ირკვევა, რომ ამ ეტაპზე ჯგუფი წილების გაყიდვას ცდილობს, თუმცა, მათივე თქმით, ამისთვის მთავრობის და კონსორციუმის სხვა წევრების თანხმობა სჭირდება.

„ანაკლიის განვითარების კონსორციუმის“ გენერალური დირექტორის ლევან ახვლედიანის განცხადებით, დაგეგმილი ტრანზაქცია არ შედგა და Conti ჯგუფი აქციონერად რჩება. მისივე თქმით, კონსორციუმი აგრძელებს მოლაპარაკებებს სხვა აქციონერებთან, მათ შორის ამერიკულ საინვესტიციო ფონდთან, რომლის ვინაობაც უახლოეს მომავალში გახდება ცნობილი.

„პროცესი, რომელზეც ზაფხულში შედგა შეთანხმება, უნდა დასრულებულიყო ოქტომბრის ბოლომდე. ეს ფორმალობები ვერ მოგვარდა, შესაბამისად, ტრანზაქცია არ შედგა. აქედან გამომდინარე, Conti ჯგუფი აქციონერად რჩება. მათ პროექტიდან გასვლა სურთ, თუმცა ამისთვის ტრანზაქციის შესრულებაა საჭირო, რაც დღის წესრიგში დღეს არ დგას“, - აცხადებს ლევან ახვლედიანი.

Conti International-ის აქციების წილი 42,18%-ს შეადგენს. Conti ჯგუფმა „ანაკლიის ღრმაწყლოვანი პორტის აქციონერების“ რიგებიდან გასვლის შესახებ 2019 წლის აგვისტოში განაცხადა. „ანაკლიის განვითარების კონსორციუმის“ 4%-ის მფლობელი ჰოლანდიური Van Oord-ი გახდა.

ანაკლიის ღრმაწყლოვანი პორტის მშენებლობა 2017 წლის დეკემბერში დაიწყო. პორტის პირველი ფაზის მშენებლობის დასრულება და პირველი გემების მიღება 2020 წლის ბოლოსკენ იგეგმებოდა.

რას აპირებდა მთავრობა, თუკი „ანაკლიის კონსორციუმი“ ვალდებულებებს ვერ შეასრულებდა - ამ თემაზე ვრცლად შეგიძლიათ წაიკითხოთ რეგიონული განვითარებისა და ინფრასტრუქტურის მინისტრის, მაია ცქიტიშვილის ინტერვიუ.