გიორგი ღოღობერიძე პრეპარატ „მოლნუპირავირზე”: თუკი წარმატებით გაივლის კვლევის მესამე ფაზას, შეიძლება მან პანდემიას ბოლო მოუღოს

ამ ეტაპზე კვლევა ცხოველებზე ჩატარდა, „მოლნუპირავირმა“ ცხოველების შემთხვევაში აჩვენა, რომ 24 საათში ვირუსს აღარ შეეძლო გამრავლება, ანუ თუ ცხოველი დაინფიცირდებოდა, ის სხვა ცხოველებს ვეღარ დააავადებდა. ამ მედიკამენტს აქვს დამაიმედებელი ის ეფექტი, რომ ის შეიძლება იყოს როგორც საპრევენციო, ასევე სამკურნალო, - ამის შესახებ ბიოქიმია-ფარმაკოლოგიის ლექტორმა, ონკოლოგიის რეზიდენტმა, ექიმმა გიორგი ღოღობერიძემ „იმედის დღეში“ განაცხადა.

მისი თქმით, თუკი ეს პრეპარატი წარმატებით გაივლის კვლევის მესამე ფაზას, შეიძლება მან პანდემიას ბოლო მოუღოს.

„ანუ, თუ ადამიანი მას დალევს ამით შეიძლება მიღებიდან 24 საათში ის აღარ გახდეს გამავრცელებელი. ეს მხოლოდ მოლოდინია, ჯერჯერობით ამ მედიკამენტის კვლევის ყველა ფაზა არ გაუვლია, უნდა დაველოდოთ მესამე ფაზას და ამის მერე ვიმსჯელებთ, ეს ის მედიკამენტია, თუ ესეც „რემდესივირის“ მსგავსია“, - განაცხადა გიორგი ღოღობერიძემ.

მან კორონავირუსის ახალ შტამზეც ისაუბრა და აღნიშნა, რომ მისი არ უნდა გვეშინოდეს.

„ვირუსის მუტაციები ყოველთვის ხდება, ახლა ჩვენ გვაქვს ბრიტანული ვარიანტი, ვირუსის ბევრნაირი მუტანტური ვარიანტი იქნება, ჩვენ ამის არ უნდა გვეშინოდეს, რადგან მუტაცია სიახლე არ არისა, ის სულ ხდება.

ძალიან დაბალია იმის ალბათობა, რომ მუტაციის შემდეგ ინფექცია მძიმე იყოს. მუტაციის შემთხვევაში ვირუსი ისე ზიანდება, რომ თვითონვე ინაქტივირდება და არა უფრო მძიმე ფორმების გამომწვევი ხდება. ახალი შტამი იმით განსხვავდება წინა ვარიანტებისგან, რომ უფრო მეტად მრავლდება და უფრო მეტი რაოდენობით გროვდება ცხვირ-ხახაში, ადამიანი ამ ვირუსს უფრო მეტად გამოყოფს“, - განაცხადა გიორგი ღოღობერიძემ.

ამ ეტაპზე უცნობია, თუ როგორ იმოქმედებს „მოლნუპირავირი“ ადამიანების შემთხვევაში. აშშ-ში კლინიკური კვლევების მეორე და მესამე ფაზები კომბინირებულად მიმდინარეობს.

საქართველოში კორონავირუსის ახალი შტამის პირველი შემთხვევა დაფიქსირდა.

14 დეკემბერს მეცნიერებმა კორონავირუსის ახალი სახეობა აღმოაჩინეს. ჯანდაცვის მსოფლიო ორგანიზაციაში განაცხადეს, რომ ჯერ არ არსებობს იმის მტკიცებულება, რომ დიდ ბრიტანეთში აღმოჩენილი კორონავირუსის ახალი სახეობა სერიოზულ გავლენას ახდენს ვირუსის სტრუქტურაზე. დიდი ბრიტანეთის ჯანდაცვის მდივანმა, მეთ ჰენკოკმა განაცხადა, რომ ვირუსის ახალი სახეობა შედარებით სწრაფად ვრცელდება, თუმცა უფრო საშიში არ არის.

ამ დროისთვის ქვეყანაში კორონავირუსის 239 780 შემთხვევაა დადასტურებული. გამოჯანმრთელებულთა რაოდენობა 226 215-ს შეადგენს. გარდაიცვალა 2 796 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.