„ქართული ოცნების“ ოფისში საპარლამენტო უმრავლესობის სხდომაა

"ქართული ოცნების" ოფისში დღესაც შეკრებაა. უმრავლესობის სხდომას ბიძინა ივანიშვილი ხელმძღვანელობს. უმრავლესობის წევრები უზენაესი სასამართლოს მოსამართლეთა შერჩევის კრიტერიუმებზე იმსჯელებენ. დეპუტატები უკვე იკრიბებიან პარტიის ოფისში.

დეპუტატი ეკა ბესელია საპარლამენტო უმრავლესობის დღევანდელ სხდომაზე უზენაესი სასამართლოს მოსამართლეთა შერჩევის საკითხზე კანონპროექტს წარადგენს. როგორც ბესელიამ უმრავლესობის შეხვედრის დაწყებამდე ჟურნალისტებს განუცხადა, კანონპროექტის მისი ვერსია ამ საკითხზე გამართული შეხვედრების ანალიზს ეფუძნება.

"დღეს კონკრეტული კანონპროექტით მოვედი. მზად ვარ, უფრო შინაარსობრივ ნაწილზე გადავიდეთ და ვიმსჯელოთ, რა უნდა იყოს კანონში ჩაწერილი. ვერსია, რომელიც მზად მაქვს, ეფუძნება არა მხოლოდ ჩემს მოსაზრებებს, არამედ ყველა შეხვედრის ანალიზს, რომელიც  გასულ კვირაში გავმართეთ. რეალური განხილვის გადმოტანა პარლამენტში უნდა მოხდეს. ერთი მთავარი პრინციპი, რასაც ჩვენი შეთავაზება ეფუძნება და გუშინ ბიძინა ივანიშვილს ჰქონდა პოზიცია, რომ ისიც ემხრობა, პარლამენტს მეტი მანდატი უნდა გვქონდეს. ეს არის ჩვენი პროექტის მთავარი პრინციპი. მხოლოდ ის სია კი არ უნდა განვიხილოთ, რასაც იუსტიციის უმაღლესი საბჭო საჭიროდ მიიჩნევს, არამედ უფრო გრძელი სია კანდიდატებისა, რომელიც გამოგზავნილი უნდა იყოს პარლამენტში“, - განაცხადა ბესელიამ.

აღსანიშნავია, რომ საპარლამენტო უმრავლესობის სხდომა 24 იანვარსაც გაიმართა. ეკა ბესელიას თქმით, მაშინ შეხვედრაზე გუნდიდან გარიცხვასთან დაკავშირებით შეკითხვები და საუბარი არ ყოფილა. ბესელიას თქმით, პარტიის ლიდერს პროცესის მიმდინარეობასთან დაკავშირებით სწორი პოზიცია აქვს.

10 იანვარს პარტია "ქართული ოცნების" თავმჯდომარემ, ბიძინა ივანიშვილმა განცხადება გაავრცელა, რომელშიც ეკა ბესელიაც გააკრიტიკა. მისი თქმით, გადაწყვეტილება ეკა ბესელიას პარლამენტის იურიდიული კომიტეტის თავმჯდომარის თანამდებობიდან გადადგომისა და პარლამენტის თავმჯდომარის მოადგილის პოზიციაზე გადანაცვლების თაობაზე ჯერ კიდევ ზაფხულში მიიღეს.

"ქართული ოცნების“ თავმჯდომარის თქმით, გაუგებარი იყო ეკა ბესელიას განცხადება, როდესაც მან 27 დეკემბერს იურიდიული კომიტეტის თავმჯდომარის თანამდებობის დატოვება მოსამართლეების არჩევის საკითხს დაუკავშირა. მალევე ივანიშვილის განცხადებას ბესელია გამოეხმაურა.

უზენაესი სასამართლოს მოსამართლეთა 10-კაციანმა სიამ საპარლამენტო უმრავლესობაში დაპირისპირება გამოიწვია. როგორც ეკა ბესელია ამბობს, პარლამენტში ამ სიის განხილვის პროცესის შესაჩერებლად მან იურიდიულ საკითხთა კომიტეტის თავმჯდომარის თანამდებობა დატოვა. თუმცა ამ განცხადებას არ ეთანხმება პარლამენტის თავმჯდომარე ირაკლი კობახიძე, რომელმაც თქვა, რომ სიის განხილვის შეჩერება ბესელიას მიერ პოსტის დატოვებას არ შეეძლო.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა.

კანდიდატები არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე.