„ქართული ოცნებისთვის“ ხაზარაძის წერილი სარწმუნო არ არის

საპარლამენტო უმრავლესობის ლიდერმა არჩილ თალაკვაძემ პარტია "ქართული ოცნება - დემოკრატიული საქართველოს" ცენტრალურ ოფისში ბრიფინგი გამართა და პროკურატურის მიერ გამოქვეყნებული მამუკა ხაზარაძის წერილს გამოეხმაურა.

არჩილ თალაკვაძემ ხაზსგასმით აღნიშნა, რომ "თიბისი ბანკთან" დაკავშირებული საქმე არ უკავშირდება ანაკლიის ღრმაწყლოვანი პორტის საკითხს.

"მინდა ხაზგასმით და პირდაპირ განვაცხადო, ეს არის სახელმწიფოს ეკონომიკისა და უსაფრთხოებისთვის ერთ-ერთი უმნიშვნელოვანესი პროექტი, რომლის წარმატებით განხორციელებისთვისაც სახელმწიფო აკეთებდა და გააკეთებს ყველაფერს მიუხედავად იმისა, რა განწყობები და კერძო ინტერესები შეიძლება ჰქონდეთ სხვა და სხვა პირებს ამ პროექტთან დაკავშირებით", - განაცხადა არჩილ თალაკვაძემ.

არჩილ თალაკვაძის განცხადებით, დღეს ნათელი გახდა, რომ წერილი, რომელსაც "მთავარი მაიდენტიფიცირებელი ნიშნები, თუ ვის გაეგზავნა და ვისგან იყო გამოგზავნილი - არ აქვს".

"რა უნდა ჩავთვალოთ მთავარ მტკიცებულებად? რეალურად, ჩვენ ვნახეთ ამობეჭდილი ქაღალდის ასლი, რომლის არც ავტორი ჩანს, არც შედგენის თარიღი და არც რაიმე მაიდენტიფიცირებელი ნიშანი ამ მოცემულობით წერილს არ გააჩნია. იმასაც კი არ გვეუბნებიან, თუ ვინ მიუტანა თუნდაც ეს ამობეჭდილი ფურცელი ბანკის დამფუძნებლებს", - განაცხადა არჩილ თალაკვაძემ.

თალაკვიძის თქმით, გაუგებარია რა შუაშია ხაზარაძესა და მის საქმესთან  ტელეკომპანია "პირველი".

"რა კავშირი აქვს მას ტელევიზიასთან?! როგორც ვიცით ხაზარაძე ამ ტელევიზიის არც მფლობელია, არც დირექტორი და არც რაიმე სხვა სახის კავშირი მას არ აქვს ამ ტელევიზიასთან. რა თქმა უნდა გვსურს ვკითხოთ “ტვ პირველის” ჟურნალისტებსაც რაიმე ბერკეტი ან გავლენა აქვს თუ არა ბატონ ხაზარაძეს მათზე? ვინაიდან ეს წერილი იქნა მოყვანილი მტკიცებულებად და მის შინაარსში კი ასეთ რამეს ვკითხულობთ. როგორ, ან რა ფორმით უნდა მოეხდინა მათზე ზეგავლენა? საინტერესოა ამაზე ტელევიზიის წარმომადგენლებმაც გვიპასუხონ.

ასევე გაუგებარია, „არტარეა“ს საკითხიც - საერთოდ რა შუაშია პოლიტიკასთან, თუნდაც თეორიულადაც კი რაში შეიძლება უშლიდეს ხელს ხელისუფლებას არხი, რომელიც ყველამ ვიცით რომ კულტურაზე და ხელოვნებაზე აკეთებს გადაცემებს და საჯარო ლექციებს გადმოსცემს.

სახელმწიფო ასევე ყოველთვის დაიცავს საბანკო სექტორის და მათ შორის ისეთი მნიშვნელოვანი და სისტემური ბანკის კანონიერ ინტერესებს, როგორიც თიბისი ბანკი. კანონიერი მექანიზმებით უზრუნველყოფს მის უსაფრთხოებას, სტაბილურობას და აღკვეთს იმ შესაძლო უკანონო ინტერესებსაც, რომელიც მის მიმართ შეიძლება რომელიმე კერძო პირს ჰქონოდა ან ჰქონდეს მომავალში.

დაველოდოთ საქმის სრულყოფილი შესწავლის და გამოძიების შედეგებს და ნურავინ ეცდება ამ პროცესის პოლიტიკურ ჭრილში გადაყვანას", - განაცხადა არჩილ თალაკვაძემ.

დღეს პროკურატურამ მამუკა ხაზარაძის მიერ სასამართლოში წარდგენილი წერილი გამოაქვეყნა.

თბილისის საქალაქო სასამართლოში „თიბისი ბანკის“ დამფუძნებელი იმ წერილთან დაკავშირებით გამოკითხეს, რომელიც, მისი ინფორმაციით, მას შინაგან საქმეთა მინისტრმა, გიორგი გახარიამ გაუგზავნა. ამ განცხადებას შს მინისტრმა გიორგი გახარიამ უპასუხა: „მე წერილებს არ ვწერ და სათქმელს პირში ვეუბნები ყველას“.

21 თებერვალს „თიბისი ბანკმა" ეროვნული ბანკის წინააღმდეგ სასამართლო დავა შეწყვიტა, ბანკმა განაცხადა, რომ ეროვნული ბანკის მიერ ჯარიმის სახით დაკისრებულ 1 მილიონ ლარს გადაიხდის. ასევე „თიბისი ბანკის“ სამეთვალყურეო საბჭოს თავმჯდომარე მამუკა ხაზარაძემ განაცხადა, რომ ბანკიდან მიდის. ბანკის სამეთვალყურეო საბჭო დატოვა ბადრი ჯაფარიძემაც. 

საქართველოს გენერალური პროკურატურა „თიბისი ბანკის საქმეზე“ დაკავშირებით საქმეს უკანონო შემოსავლის ლეგალიზაციის ფაქტზე იძიებს. საუბარია 17 მილიონ დოლარზე. 28 თებერვალს პროკურატურამ გაასაჯაროვა ვიდეო სქემა, რომლითაც „თიბისი ბანკის“ საქმე აღწერა.