როდის იქნება საჭირო საყოველთაო იზოლაცია - ინფექციონისტ მაია ბუწაშვილის რეკომენდაცია

როდის იქნება საჭირო საყოველთაო იზოლაცია - ამ საკითხზე ექიმი ინფექციონისტი, მაია ბუწაშვილი სოციალურ ქსელში ვრცელ პოსტს აქვეყნებს.

მედიცინის მეცნიერებათა დოქტორი, პროფესორი მაია ბუწაშვილი განმარტავს, რომ მსგავსი საჭიროება იმ შემთხვევაში დადგება, თუ ინფიცირებულთა კონტაქტების და წყაროს იდენტიფიცირება მასობრივად აღარ იქნება შესაძლებელი, ანუ დიაგნოზი დაისმება პაციენტებში, სადაც ვერ დადგინდება, სად მოხდა დაინფიცირება და ვისთან იყო კონტაქტები.

„ხშირად ისმის კითხვა, თუ რატომ არ ცხადდება საყოველთაო იზოლაცია/კარანტინი, არ იკეტება ყველა დაწესებულება და საზღვრები. ამ გადაწყვეტილების მიღება, ცხადია, შესაბამისი უწყებების პრეროგატივაა, თუმცა ჩემი, როგორც რიგითი ინფექციონისტის და ეპიდემიოლოგის აზრით, ამის საჭიროება შეიძლება დადგეს ისეთ სიტუაციაში, თუ ინფიცირებულთა კონტაქტების და წყაროს იდენტიფიცირება მასობრივად აღარ იქნება შესაძლებელი, ანუ დიაგნოზი დაისმება პაციენტებში, სადაც ვერ დადგინდება, სად მოხდა ინფიცირება და ვისთან იყო კონტაქტები. ამჟამად ყველა რეგისტრირებული შემთხვევის ინფიცირების წყაროც და კონტაქტებიც მეტ-ნაკლებად იდენტიფიცირებადია და ეპიდემიოლოგები ახერხებენ მათ გამოვლენას.

იქნებ სანამ საყოველთაო კარანტინს გამოგვიცხადებს შესაბამისი უწყება (და იმედი მაქვს ამის საჭიროება არ შეიქმნება), თვითკონტროლის მექანიზმებიც ჩაგვერთო? ძალიან რთულია ერთბაშად ყველაფრის დახურვა და საზღვრების სრული ჩაკეტვა. სათქმელად ადვილია და ჩვენი ტიპის სახელმწიფოსთვის, რომელიც ძირითადად იმპორტზეა დამოკიდებული, სულ მოკლე ხანში სრული დეფიციტი შეიქმნება. დაცარიელებული მაღაზიების და აფთიაქების დანახვაზე წარმოდგენილი მაქვს რა პანიკა დაიწყება და პირველ რიგში, ზუსტად ისინი აწუწუნდებიან, ვინც ახლა თავგამოდებით მოითხოვენ საზღვრების ჩაკეტვას.

ამიტომ სანამ ასეთი რადიკალური ზომების მიღებას მოვითხოვთ, იქნებ ინდივიდუალურ დონეზე ვცადოთ შევამციროთ არააუცილებელი კონტაქტები და მოგზაურობები? მაგალითად, არ გვიწყინონ ჭირისუფლებმა და პანაშვიდები/გასვენება შემოიფარგლოს ოჯახის ახლობლებით და ახლო ნათესავებით, არ მოვაწყოთ მრავალრიცხოვანი შეკრებები რესტორნებში, არ იყოს გადავსებული კაზინოები და ა.შ.
სხვა მხრივ კი, რა თქმა უნდა, ჩვეულებრივად და ზედმეტი ვნებათაღელვის გარეშე უნდა გავაგრძელოთ ჩვენი ყოველდღიური ცხოვრება და აქტივობები“, - წერს ბუწაშვილი.

საქართველოში კორონავირუსით ინფიცირების 15 შემთხვევაა დადასტურებული, კარანტინის რეჟიმშია 141 ადამიანი, ხოლო სტაციონარში მეთვალყურეობის ქვეშ – 51. პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3491 ადამიანი ემსხვერპლა, 57389 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.