სალომე ზურაბიშვილი კორონავირუსზე: თუ უცხოეთში ვიზიტები შეიზღუდება, ჩემი ვიზიტებიც შეიზღუდება

როგორც იქნება მითითებები, მეც ისე დავემორჩილები. თუ უცხოეთში ვიზიტები შეიზღუდება, ჩემი ვიზიტებიც შეიზღუდება, - ამის შესახებ საქართველოს პრეზიდენტმა სალომე ზურაბიშვილმა ზუგდიდში ჟურნალისტებს კორონავირუსთან დაკავშირებით დასმული შეკითხვის პასუხად განუცხადა.

პრეზიდენტმა მადლობა გადაუხადა ლუგარის ცენტრის თანამშრომლებს და დაავადებათა კონტროლის ცენტრის ხელმძღვანელებს სამიანობისთვის.

„მიმაჩნია, რომ პანიკა არ უნდა იყოს, სიფრთხილე უნდა იყოს, მაგრამ როგორც იქნება მითითებები, მეც ისე დავემორჩილები. თუ უცხოეთში ვიზიტები შეიზღუდება, ჩემი ვიზიტებიც შეიზღუდება. ძალიან ბევრი რეგულაცია შეიძლება იყოს სახელმწიფოს მხრიდან, მაგრამ მაინც ყველაზე მთავარია მოქალაქეების თვითშეგნება და პასუხისმგებლობა. თითოეული მოქალქე არის პასუხისმგებელი თავის ოჯახზე. მის ირგვლივ მყოფ ადამიანებზე და საზოგადოებაზე. საქართველო არის ჯერჯერობით სამაგალითო ყველა მიღებული ზომით. ჩვენს ქვეყანაში არის ლუგარის ცენტრი, რომელიც არის სამაგალითო არა მარტო მთელ რეგიონში, არამედ მსოფლიოში. თუ ებრძვიან ლუგარის ცენტრს, ეს მოდის იქიდან, საიდანაც გვებრძვიან ჩვენ. გვახსოვს გასულ წელს როგორ იყო გავრცელებული ჭორები ლუგარის ცენტრთან დაკავშირებით. მინდა პირადად დიდი მადლობა გადავუხადო ამირან გამყრელიძეს, პაატა იმნაძეს და ყველა იმ თანამშრომელს, რომელიც დღე და ღამე იქ მუშაობს“, - განაცხადა სალომე ზურაბიშვილმა.

საქართველოში კორონავირუსით ინფიცირების 15 შემთხვევაა დადასტურებული, კარანტინის რეჟიმშია 141 ადამიანი, ხოლო სტაციონარში მეთვალყურეობის ქვეშ – 51. პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3491 ადამიანი ემსხვერპლა, 57389 კი გამოჯანრთელდა.

30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.