ადვოკატი: კოენი მზადაა, ყველაფერი თქვას, რაც კი დონალდ ტრამპის შესახებ იცის

ამერიკის შეერთებული შტატების პრეზიდენტის, დონალდ ტრამპის ყოფილი ადვოკატი მაიკლ კოენი ამბობს, რომ ის ბედნიერია, რადგან ამერიკის საპრეზიდენტო არჩევნებში რუსეთის შესაძლო ჩარევის შესახებ მიმდინარე გამოძიებას დაეხმარა. ამის შესახებ BBC წერს.

როგორც კოენის ადვოკატმა ლენი დევისმა დასძინა, კოენი მზადაა, ყველაფერი თქვას, რაც კი დონალდ ტრამპის შესახებ იცის.

21 აგვისტოს დონალდ ტრამპი კოენის საქმეს გამოეხმაურა. 

„მაიკლ კოენი წინასაარჩევნო კამპანიის დაფინანსებასთან დაკავშირებით დამნაშავედ ცნეს, თუმცა ეს ფინანსური დარღვევები დანაშაული არ არის. პრეზიდენტ ბარაკ ობამას წინასაარჩევნო კამპანიაში სერიოზული ფინანსური დარღვევები იყო, თუმცა ყველაფერი მარტივად მოგვარდა“, - აცხადებს დონალდ ტრამპი.

მანამდე კი აშშ-ის პრეზიდენტის ყოფილმა ადვოკატმა მაიკლ კოენმა აღიარა, რომ დონალდ ტრამპის დავალებით ფული გადაუხდა ორ ქალს, რომლებთანაც მის კლიენტს ინტიმური ურთიერთობა ჰქონდა. 

CNN-ის ინფორმაციით, 21 აგვისტოს კოენი FBI-ის ჩაბარდა და გამოძიებასთან საპროცესო შეთანხმება გააფორმა. ის ნიუ-იორკის სასამართლოში გადაიყვანეს, სადაც ბრალდების 8 ეპიზოდში თავი დამნაშავედ ცნო, მათ შორის პოლიტიკური კამპანიის დაფინანსების წესის დარღვევაში.

კოენმა აღიარა, რომ „ფედერალური თანამდებობის კანდიდატის“ დავალებით მალავდა ინფორმაციას, რომელიც მის კლიენტს დააზიანებდა. სასამართლოში კოენმა ტრამპის გვარი არ ახსენა, თუმცა CNN აღნიშნავს, რომ სასამართლოს დოკუმენტებში ის ნახსენებია როგორც „მოქალაქე ნომერი ერთი“, რომელიც 2017 წლის იანვარში აშშ-ის პრეზიდენტი გახდა.

Associated Press-ის ცნობით, კოენის საქმეზე განაჩენი 12 დეკემბერს გამოცხადდება. ადვოკატს 4-5 წლით პატიმრობა ემუქრება.

ამერიკული პრესის მონაცემებით, მაიკლ კოენმა პორნომსახიობ სტეფანი კლიფორდს (სტორმი დენიელსი) 130 ათასი დოლარი გადაუხადა. ადვოკატი დაკავშირებულია ასევე Playboy-ის მოდელ კარენ მაკდუგალისთვის 150 ათასი დოლარის გადახდასთან. ეს მას შემდეგ მოხდა, რაც 2016 წლის საარჩევნო კამპანიის დროს ქალებმა განაცხადეს, რომ ტრამპთან ურთიერთობის შესახებ საზოგადოებას უამბობდნენ. სასამართლოს დოკუმენტებში კლიფორდი და მაკდუგალი არ სახელდებიან.   

მაიკლ კოენის წინააღმდეგ სისხლის სამართლის საქმე 2018 წლის გაზაფხულზე აღძრეს. ივნისში ცნობილი გახდა, რომ ის ტრამპის ადვოკატი აღარ არის.

2016 წლის დეკემბერში, აშშ-ის სპეცსამსახურებმა მოამზადეს სპეციალური ანგარიში ამერიკულ არჩევნებში რუსეთის ჩარევის შესახებ. რის შემდეგაც, კონგრესის სამმა კომიტეტმა და სპეციალურმა პროკურორმა, FBI-ის ყოფილმა დირექტორმა რობერტ მიულერმა საქმის გამოძიება დაიწყეს.

გამოძიების ფარგლებში ამოწმებენ ინფორმაციას დონალდ ტრამპის და მისი გარემოცვის რუსეთის ხელისუფლებასთან კავშირებზე. ამ საქმის ფიგურანტები არიან ტრამპის წინასაარჩევნო შტაბის ყოფილი უფროსი პოლ მანაფორტი და ტრამპის ყოფილი მრჩეველი მაიკლ ფლინი. პრეზიდენტის წინააღმდეგ მტკიცებულებების აღმოჩენის შემთხვევაში ეს შეიძლება მისი იმპიჩმენტის საფუძველი გახდეს.