ტრამპმა მაიკლ კოენისთვის ფულის გადახდა აღიარა

ამერიკის შეერთებული შტატების პრეზიდენტის, დონალდ ტრამპის თქმით, მან თავის ყოფილ ადვოკატ მაიკლ კოენს ფული გადაუხადა, თუმცა ეს ფული მას საარჩევნო კამპანიიდან არ აუღია. ამის შესახებ BBC წერს.

როგორც Fox & Friends-თან ინტერვიუში თეთრი სახლის ლიდერმა განმარტა, მას თავისი პირადი ფინანსების გამოყენებით კანონი არ დაურღვევია. ამიტომ ტრამპი არ ეთანხმება ბრალდების იმ ნაწილს, რომლის მიხედვითაც, კოენმა პოლიტიკური კამპანიის დაფინანსების წესი დაარღვია.

მანამდე ტრამპი ამბობდა, რომ ეს ინფორმაცია სიცრუე იყო და კოენმა ეს სასჯელის შემსუბუქების გამო მოიგონა.

მანამდე კი აშშ-ის პრეზიდენტის ყოფილმა ადვოკატმა მაიკლ კოენმა აღიარა, რომ დონალდ ტრამპის დავალებით ფული გადაუხადა ორ ქალს, რომლებთანაც მის კლიენტს ინტიმური ურთიერთობა ჰქონდა. 

CNN-ის ინფორმაციით, 21 აგვისტოს კოენი FBI-ის ჩაბარდა და გამოძიებასთან საპროცესო შეთანხმება გააფორმა. ის ნიუ-იორკის სასამართლოში გადაიყვანეს, სადაც ბრალდების 8 ეპიზოდში თავი დამნაშავედ ცნო, მათ შორის პოლიტიკური კამპანიის დაფინანსების წესის დარღვევაში.

კოენმა აღიარა, რომ „ფედერალური თანამდებობის კანდიდატის“ დავალებით მალავდა ინფორმაციას, რომელიც მის კლიენტს დააზიანებდა. სასამართლოში კოენმა ტრამპის გვარი არ ახსენა, თუმცა CNN აღნიშნავს, რომ სასამართლოს დოკუმენტებში ის ნახსენებია როგორც „მოქალაქე ნომერი ერთი“, რომელიც 2017 წლის იანვარში აშშ-ის პრეზიდენტი გახდა.

Associated Press-ის ცნობით, კოენის საქმეზე განაჩენი 12 დეკემბერს გამოცხადდება. ადვოკატს 4-5 წლით პატიმრობა ემუქრება.

ამერიკული პრესის მონაცემებით, მაიკლ კოენმა პორნომსახიობ სტეფანი კლიფორდს (სტორმი დენიელსი) 130 ათასი დოლარი გადაუხადა. ადვოკატი დაკავშირებულია ასევე Playboy-ის მოდელ კარენ მაკდუგალისთვის 150 ათასი დოლარის გადახდასთან. ეს მას შემდეგ მოხდა, რაც 2016 წლის საარჩევნო კამპანიის დროს ქალებმა განაცხადეს, რომ ტრამპთან ურთიერთობის შესახებ საზოგადოებას უამბობდნენ. სასამართლოს დოკუმენტებში კლიფორდი და მაკდუგალი არ სახელდებიან.

მაიკლ კოენის წინააღმდეგ სისხლის სამართლის საქმე 2018 წლის გაზაფხულზე აღძრეს. ივნისში ცნობილი გახდა, რომ ის ტრამპის ადვოკატი აღარ არის.

2016 წლის დეკემბერში, აშშ-ის სპეცსამსახურებმა მოამზადეს სპეციალური ანგარიში ამერიკულ არჩევნებში რუსეთის ჩარევის შესახებ. რის შემდეგაც, კონგრესის სამმა კომიტეტმა და სპეციალურმა პროკურორმა, FBI-ის ყოფილმა დირექტორმა რობერტ მიულერმა საქმის გამოძიება დაიწყეს.

გამოძიების ფარგლებში ამოწმებენ ინფორმაციას დონალდ ტრამპის და მისი გარემოცვის რუსეთის ხელისუფლებასთან კავშირებზე. ამ საქმის ფიგურანტები არიან ტრამპის წინასაარჩევნო შტაბის ყოფილი უფროსი პოლ მანაფორტი და ტრამპის ყოფილი მრჩეველი მაიკლ ფლინი. პრეზიდენტის წინააღმდეგ მტკიცებულებების აღმოჩენის შემთხვევაში ეს შეიძლება მისი იმპიჩმენტის საფუძველი გახდეს.