თალაკვაძე: პოლიტიკურ ძალას მშვიდობიან აქციებს დესტაბილიზაციისთვის არ გამოვაყენებინებთ

პარლამენტის თავმჯდომარე არჩილ თალაკვაძე მიმდინარე აქციებზე საუბრისას აცხადებს, რომ გუნდმა პოლიტიკური პასუხისმგებლობა უკვე აიღო, როდესაც სპიკერის თანამდებობა დატოვა ირაკლი კობახიძემ.  

ამის შესახებ თალაკვაძემ სასტუმრო „შერატონში“ „პროპორციული არჩევნები 2020“-ის პრეზენტაციის შემდეგ განაცხადა. 

„შეკრებისა და მანიფესტაციის უფლება ჩვენი მოქალაქეებისთვის არის გარანტირებული. შესაბამისად, ნებისმიერი მშვიდობიანი აქცია და მანიფესტაცია იქნება დაცული და გარანტირებული ხელისუფლების მხრიდან.

არ დავუშვებთ, რომელიმე პოლიტიკურმა ძალამ მშვიდობიანი აქციები გამოიყენოს დეტაბილიზაციისთვის და არ დავუშვებთ ძალადობრივი სცენარის განვითარებას. 

რაც შეეხება მოვლენებს, რომელიც უკვე მოხდა, ამას მოჰყვა ადეკვატური და სამართლიანი შეფასებები უკვე მოჰყვა საზოგადოების და ჩვენი თანაგუნდელების მხრიდან.

ჩვენ ავიღეთ პოლიტიკური პასუხისმგებლობა უმოკლეს დროში, ასევე არის სამართლებრივი რეაგირების მხარე: დაიწყო გამოძიება, პასუხისგებაში არიან მიცემული კონკრეტული ადამიანები“, - განაცხადა არჩილ თალაკვაძემ.

საპროტესტო აქციის მონაწილეები რუსთაველის გამზირზე დღეს ისევ შეიკრიბებიან. მოთხოვნა უცვლელია, გადადგეს შინაგან საქმეთა მინისტრი. 

პროტესტის მონაწილეების მოთხოვნა პროპორციული არჩევნებისა და აქციის დაშლისას დაკავებულთა გათავისუფლების შესახებ დაკმაყოფილებულია.

20 ივნისს ღამით, პარლამენტის შენობის წინ სპეცრაზმმა რამდენჯერმე გამოიყენა ცრემლმდენი გაზი, ბოლოს კი აქციის მონაწილეები წყლის ჭავლით დაშალა, ასევე გამოიყენა რეზინის ტყვიები. 

ამას კი წინ უძღოდა პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებისადმი რუსეთის დუმის კომუნისტური პარტიის წევრის სერგეი გავრილოვის მიმართვა, რასაც საკანონმდებლო ორგანოსთან საპროტესტო აქცია მოჰყვა.