"ეს შენ გეხება": მოსმენების კანონზე ელექტრონული სარჩელის შევსება ყველას შეუძლია

ყველა მოქალაქეს, ვისაც ფარულ მოსმენა-მიყურადებასთან დაკავშირებით ახალი საკანონმდებლო პაკეტი არ მოსწონს, შეუძლია, ერთობლივ სარჩელს შეუერთდეს, რომელიც საკონსტიტუციო სასამართლოში შესატანად მზადდება.

დღეს, 6 აპრილს, 12 -დან 6 საათამდე, ყველა მსურველს საშუალება ექნება, კამპანიის - "ეს შენ გეხება - ისევ გვისმენენ" ელექტრონული სარჩელი შეავსოს და ე.წ მოსმენების კანონი გაასაჩივროს. ელექტრონული სარჩელის პლატფორმა კამპანიის ვებგვერდზე - esshengexeba.ge - არის გამოქვეყნებული.

როგორც კამპანიის მონაწილეები ამბობენ, გასაჩივრებისთვის, საჭიროა მოქალაქემ შეავსოს სარჩელის ყველა სავალდებულო ველი, გაეცნოს შინაარსს, დაბეჭდოს ტექსტი და ხელმოწერის შემდეგ მიიტანოს მითითებულ მისამართზე.

არასამთავრობო ორგანზიაციების წარმომადგენლები მიიჩნევენ, რომ ახალი კანონმდებლობა პირად ხელშეუხებლობას ვერ უზრუნველყოფს. მათი შეფასებით, საქართველოს კონსტიტუცია კვლავ ირღვევა. მესამე სექტორი სარჩელს საკონსტიტუციო სასამართლოში მომავალ კვირას შეიტანს.

საქართველოს პარლამენტმა ფარული საგამოძიებო ქმედებების შესახებ საკანონმდებლო პაკეტი 1 მარტს მიიღო, რის შემდეგაც საქართველოს პრეზიდენტმა კანონს ვეტო დაადო, თუმცა, პარლამენტმა პრეზიდენტის მოტივირებული შენიშვნები არ გაიზიარა. კანონი არ მოსწონს არასამთავრობო სექტორს, რომელსაც პარლამენტში ალტერნატიული კანონპროექტი ჰქონდა შეტანილი. კამპანიის - "ეს შენ გეხება - ისევ გვისმენენ" წევრები მიიჩნევენ, რომ ფარული მოსმენების კანონი საკონსტიტუციო სასამართლოს მიერ მიღებულ გადაწყვეტილებას ეწინააღმდეგება. 

კანონს აკრიტიკებენ საქართველოში მოქმედი მობილური ოპერატორებიც. "მაგთის", "ჯეოსელის" და "ბილაინის" წარმომადგენლები აცხადებენ, რომ კანონი ავტორიზებულ პირებს მძიმე ვალდებულებებს აკისრებს, მათ შორის, შეუზღუდავი და ბუნდოვანი ხარჯების გაწევას. 

კანონპროექტის მიღების შემდეგ, ოპოზიციურმა პარტიებმა აქციებიც დააანონსეს. ისინი ფიქრობენ, რომ მიღებული კანონით ხელისუფლება ნებისმიერი ადამიანის მოსმენას შეძლებს. 

ახალი კანონი ძალაში 30 მარტს შევიდა.  ფარული მოსმენების განსახორციელებლად სუს-ის დაქვემდებარებაში "ოპერატიულ-ტექნიკური სააგენტო" უკვე შეიქმნა.