აშშ-მა რუსეთის წინააღმდეგ ახალი სანქციები შემოიღო

აშშ-ის მთავრობამ უმსხვილეს რუსულ ნავთობკომპანიებს „როსნეფტსა“ და „ლუკოილს“ სანქციები დაუწესა. ინფორმაციას აშშ-ის ხაზინის დეპარტამენტი ავრცელებს.

როგორც ხაზინის დეპარტამენტის მიერ გავრცელებულ ინფორმაციაშია აღნიშნული, სანქციების შემოღების მიზეზი არის ის, რომ რუსეთი უკრაინაში ომის დასრულებასა და სამშვიდობო პროცესს მხარს არ უჭერს.

„ახლა დროა შეჩერდეს მკვლელობები და დაუყოვნებლივ გამოცხადდეს ზავი. იმის გათვალისწინებით, რომ პუტინი ამ უაზრო ომის დასრულებაზე უარს ამბობს, ხაზინის დეპარტამენტი რუსეთის ორ უმსხვილეს ნავთობკომპანიას, რომლებიც კრემლის სამხედრო მანქანას აფინანსებენ, სანქციებს უწესებს“, - აღნიშნულია აშშ-ის ხაზინის მდივნის სკოტ ბესენტის განცხადებაში.

მისი თქმით, ხაზინის დეპარტამენტი მზადაა მიიღოს დამატებითი ზომები, თუ ეს აშშ-ის პრეზიდენტის დონალდ ტრამპის პოლიტიკის გატარებისთვის იქნება საჭირო. „ჩვენ მოვუწოდებთ ჩვენს მოკავშირეებს, შემოგვიერთდნენ და დაიცვან ეს სანქციები“, - დასძინა მან.

აღსანიშნავია, რომ ახალი სანქციები „როსნეტფტისა“ და „ლუკოილის“ გარდა შეეხება ყველა იმ კომპანიას, რომელთა 50% ან მეტ წილს ფლობენ აღნიშნული გიგანტები. საუბარია „როსნეფტის“ 28 და „ლუკოილის“ 6 შვილობილ კომპანიაზე.