შესაძლებელია თუ არა საპატრულო პოლიციის ჯარიმის გაუქმება

ხშირად მოქალაქეები არ ეთანხმებიან საპატრულო პოლიციის უფლებამოსილი თანამშრომლის მიერ გამოწერილ საჯარიმო ქვითარს, თუმცა არ აქვთ საკმარისი ინფორმაცია თავიანთი უფლებების თაობაზე.

ვებგვერდი myadvokat.ge- ი განმარტავს, როგორ უნდა მოიქცეთ, თუ პოლიციის მიერ გამოწერილ ჯარიმას არ ეთანხმებით.

იცოდეთ, რომ თუ თქვენ არ ეთანხმებით საჯარიმო ქვითარს და გამოწერილ ჯარიმას უსაფუძვლოდ მიიჩნევთ, თქვენ შეგიძლიათ ჯარიმის სახით ადმინისტრაციული სახდელის დადების შესახებ გადაწყვეტილების გასაჩივრება შინაგან საქმეთა სამინისტროს საპატრულო პოლიციის დეპარტამენტში.

საჩივარი უნდა იყოს წერილობითი ფორმით და შეიცავდეს კანონით გათვალისწინებულ კონკრეტულ რეკვიზიტებს, მათ შორის, ადმინისტრაციული ორგანოს დასახელებას, საჩივრის წარმდგენი პირის ვინაობასა და მისამართს, ადმინისტრაციული საჩივრის წარმდგენი პირის პირად ნომერსა და სხვ. საჩივარზე ადმინისტრაციული ორგანოს მიერ მიღებული გადაწყვეტილება შესაძლებელია გასაჩივრდეს საქალაქო სასამართლოში, რომლის გადაწყვეტილებაც საბოლოოა და აღარ საჩივრდება.

გასაჩივრების უფლება შეზღუდულია გარკვეული ვადით. კერძოდ, ადმინისტრაციული სამართალდარღვევის საქმის ადგილზე განხილვისას მიღებული დადგენილება შეიძლება გასაჩივრდეს მისი გამოტანიდან 10 დღის ვადაში. ვადის გასვლის შემდეგ გასაჩივრების უფლება გერთმევათ, თუმცა ვადის საპატიო მიზეზით გაცდენის შემთხვევაში ეს ვადა იმ პირის განცხადებით, რომლის მიმართაც გამოტანილია დადგენილება, შეიძლება აღადგინოს საჩივრის განსახილველად უფლებამოსილმა ორგანომ (თანამდებობის პირმა). უფლებამოსილ ორგანოს თქვენ უნდა წარუდგინოთ კონკრეტული მტკიცებულებები იმასთან დაკავშირებით, რომ ვადის გასვლას საპატიო მიზეზი ჰქონდა. საპატიო მიზეზი წარმოადგენს შეფასების საგანს და ყოველ კონკრეტულ შემთხვევაში უნდა გადაწყდეს მიზეზის საპატიოდ მიჩნევა.