ქუთაისის მერია: ქალაქ კოზენცაში სამივლინებო ხარჯმა 7 ათასი ლარი შეადგინა

იტალიის ქალაქ კოზენცაში ქუთაისის ადგილობრივი თვითმმართველობის 4 წარმომადგენლის სამივლინებო ხარჯმა შეადგინა 7000 ლარი. მათ შორის სატრანსპორტო მომსახურებაზე დაიხარჯა 4800 ლარი დანარჩენი თანხა გაცემულ იქნა საქართველოს მთავრობის 2017 წლის 25 აპრილის 211 დადგენილების მე-3 მუხლის მოხელეთათვის სამსახურებრივი მივლინების ხარჯების ანაზღაურების წესის შესაბამისად, სადაც წერია რომ მოხელეს, რომელსაც გზავნიან სამსახურებრივ მივლინებაში, სრულად უნდა აუნაზღაურდეს სამივლინებო ხარჯები მივლინებაში ყოფნის მთელი პერიოდის განმავლობაში, - წერია განცხადებაში, რომელიც ქუთაისის მერიამ „ნაციონალური მოძრაობის“ ბრალდების საპასუხოდ გაავრცელა. 

„ასევე, თანამდებობის პირს ქვეყნის ფარგლებს გარეთ სამსახურებრივი მივლინებისას ყოველდღიურად აგრეთვე მიეცემა ამ წესის №2 დანართით გათვალისწინებული სადღეღამისო ნორმის დანამატი. ამასთან, №2 დანართის შენიშვნის მე-5 პუნქტით განსაზღვრულ შესაბამის თანამდებობის პირებს აუნაზღაურდებათ ქვეყნის ფარგლებს გარეთ სამსახურებრივ მივლინებასთან დაკავშირებული კავშირგაბმულობის, ტრანსპორტის დაქირავებისა და წარმომადგენლობითი ხარჯები.

სადღეღამისო ხარჯები იანგარიშება სამსახურებრივ მივლინებაში ფაქტობრივად ყოფნის დღეების მიხედვით, დასვენებისა და უქმე, აგრეთვე მივლინებაში გამგზავრებისა და მივლინებიდან დაბრუნების დღეების ჩათვლით.

შეგახსენებთ, რომ ქუთაისის მერისა და ვიცემერის ვიზიტი ქალაქ კოზენცაში მიმდინარე წლის 6-9 სექტემბერს ოფიციალური მიწვევით შეგდა. ვიზიტის მიზანი იყო ორ ქალაქს შორის ურთიერთანამშრომლობის გზებზე საუბარი და ინტერკულტურული გაცვლითი პროგრამები. შეხვედრა ოფიციალურად ქალაქ კოზენცას მერიის შენობაში შედგა ქუთაისის მერსა და კოზენცას მერ მარიო ოჩიუტოს შორის სადაც სამომავლო ინტერკულტურულ გაცვლით პროგრამებს შეეხო საუბარი, რომლის ფარგლებში სამომავლოდ ქუთაისის სახელმწიფო ანსამბლისა და თეატრის გასტროლი იგეგმება კოზენცაში. ქუთაისსა და კოზენცას შორის მეგობრობის მემორანდუმი მიმდინარე წლის მაისში გაფორმდა“ - წერია განცხადებაში.

იქამდე, ქუთაისის საკრებულოს „ნაციონალური მოძრაობის“ ფრაქციის თავმჯდომარე გიგა შუშანიამ თქვა, რომ ქუთაისის მერის იტალიაში ვიზიტის ხარჯებთან დაკავშირებით საჯარო ინფორმაცია თითქმის ერთი თვის წინ გამოითხოვა, თუმცა პასუხი ამ დრომდე არ მიუღია. შუშანია მერიის წინააღმდეგ სარჩელით ქუთაისის საქალაქო სასამართლოს მიმართავს. 

სექტემბერში იტალიაში მოწყობილ გამოფენაზე სხვა ნახატებთან ერთად ქუთაისისა და კოზენცას მერების პორტრეტებიც გამოიფინა. ისინი ვორკშოპის ფარგლებში ქუთაისელმა მხატვარმა ლავენ გოგიტაძემ დახატა. გამოფენამ საზოგადოებაში არაერთგვაროვანი რეაქცია გამოიწვია.

ქუთაისის მერიამ გამოაქვეყნა ქალაქ კოზენცას მერის წერილი, რომლითაც ქართული დელეგაცია იტალიაში მიიწვიეს.