16 ივნისი 2018

თბილისის მერი პოლიტიკაზე, მთავრობასა და ფეხბურთზე

რა ცვლილებებია მოსალოდნელი ხელისუფლებაში?

უკვე მეოთხე დღეა ქვეყანა ახალ პოლიტიკურ რეალობაში ცხოვრობს, ხოლო უკვე მესამე დღეა საზოაგდოება ახალი მინისტრთა კაბინეტის შემადგენლობას ელის. პრემიერმინისტრობის კანდიდატმა მამუკა ბახტაძემ მმართველ ძალას იმ ადამიანთა ვინაობა უნდა დაუსახელოს, რომლებიც მის სამთავრობო გუნდში მოხვდებიან, ან ვერ მოხვდებიან. მანამდე კი მედიაში მხოლოდ ვერსიები ვრცელდება, განსაკუთრებული აქცენტი ეკონომიკურ გუნდზე კეთდება და ეს ბუნებრივია, რადგან გიორგი კვირიკაშვილის გადადგომის მთავარ მიზეზად სწორედ ქვეყნის ეკონომიკური პოლიტიკა დასახელდა. „ქართული ოცნების“ წევრები აცხადებენ, რომ ახალ მთავრობაში ახალი სახეები, რა თქმა უნდა, იქნებიან. საქართველოს პრეზიდენტმა დღეს მამუკა ბახტაძის კანდიდატურა ოფიციალურად წარადგინა. ახლა უკვე 7 დღის განმავლობაში პრემიერობის კანდიდატმა გუნდის შემადგენლობა უნდა დაასახელოს. თემაზე „ქრონიკის“ წამყვანის თეა სიჭინავას კითხვებს „ქართული ოცნების“ გენერალურმა მდივანმა და თბილისის მერმა კახა კალაძემ უპასუხა.
 

კახა კალაძე
ფოტო: თბილისის მერია

ჩვენ ინტენსიურად ვაკვირდებით და ველით ახალ ინფორმაციას სამთავრობო კაბინეტთან დაკავშირებით, ვინ მოხვდება და ვინ - არა მამუკა ბახტაძის კაბინეტში, მაგრამ როგორც ჩანს, ჯერჯერობით, კონსულტაციები არ დაწყებულა. პირველ რიგში, როგორია კონსულტაციების პროცედურა, ამ შემთხვევაში მხოლოდ პრემიერ-მინისტრობის კანდიდატი წარადგენს ხოლმე კანდიდატებს, თუ თქვენც, პოლიტსაბჭოც აქტიურად იღებთ მონაწილეობას და თქვენ რიგ შეხედულებებს აწვდით პრემიერ-მინისტრობის კანდიდატს, ვინ შეიძლება ამ თუ იმ თანამდებობაზე მოვიაზროთ?

პროცედურულად რაც შეეხება მინისტრთა კაბინეტის შერჩევას, ეს პირდაპირ პრემიერ-მინისტრობის კანდიდატის პრეროგატივაა. მან უნდა განსაზღვროს, თუ ვინ იქნება მინისტრთა კაბინეტის შემადგენლობაში, თუმცა, რა თქმა უნდა, ის ჩვენთან გადის კონსულტაციებს, გუნდში მიმდინარეობს მსჯელობა. შემდეგ, როდესაც გადაწყვეტილება იქნება მიღებული, პარლამენტში იქნება წარდგენა, კომიტეტებში დეპუტატებს ექნებათ შესაძლებლობა ყველა კითხვა, რაც კი მათ აინტერესებთ, დაუსვან მინისტრთა კაბინეტის კანდიდატებს, მიიღონ შესაბამისი პასუხები. შემდეგ იქნება შეხვედრა ფრაქციებთან, ასევე უმრავლესობასთან, უმცირესობასთან და ბოლოს უკვე პლენარულ სხდომაზე იქნება გადაწყვეტილება მიღებული.

შეიძლება ასეთი რამეც მოხდეს, თქვენი, პოლიტსაბჭოს წევრებისა და პრემიერმინისტრობის კანდიდატის მოსაზრებები არ დაემთხვეს კონკრეტულ მინისტრებთან დაკავშირებით? ამ შემთხვევაში რა ხდება? თუ არის ასეთი რამ მოსალოდნელი?

კონსენსუსი ყველა შემთხვევაში მიიღწევა, იმიტომ ხდება ხოლმე მსჯელობა, იმიტომ ხდება ხოლმე შეკრება და ჩვენი მოსაზრებების, ასე რომ ვთქვათ, წარმოდგენა. შეიძლება მისი რაღაც ნაწილის გაზიარება, რაღაცის არ გაზიარება, თუმცა საბოლოოდ გადაწყვეტილებას თავად მიიღებს პრემიერ-მინისტრობის კანდიდატი მამუკა ბახტაძე, მინისტრთა კაბინეტის შერჩევა ეს მისი პრეროგატივაა. ჩვენ შეიძლება რაღაც რჩევები მივცეთ, შეიძლება რომელიღაც კანდიდატზე პლუსები ვუთხრათ, მინუსები ვუთხრათ, თუმცა საბოლოო ჯამში ეს მისი გადასაწყვეტია. და ის პროცედურა, თუ როგორ წარიმართება პარლამენტში, უკვე მოგახსენეთ.

უშუალოდ მამუკა ბახტაძის მიერ გაკეთებულ გზავნილებზე ოდნავ მოგვიანებით ვისაუბრებთ, მანამდე აუცილებლად უნდა დავსვა ეს კითხვა, რადგანაც ჩვენ სამი დღის განმავლობაში სხვადასხვანაირად განვითარებულ მოვლენებს ვაკვირდებოდით. პირველ რიგში მინდა დავიწყო სამშაბათიდან, როდესაც გაიმართა მმართველი პარტიის შეკრება და შეხვედრის შემდეგ მკაფიოდ ითქვა, რომ საკადრო ცვლილებებზე საუბარი არ ყოფილა, საუბარი იყო მხოლოდ კვლევაზე, სიღარიბეზე, ეკონომიკურ გამოწვევებზე და ამასთან დაკავშირებით მთავრობას უნდა დაესახა გეგმები. თუმცა მეორე დღეს რადიკალურად განსხვავებული სურათი მივიღეთ და პრემიერ-მინისტრმა დატოვა თანამდებობა. ხომ ვერ გვეტყვით, რა მოხდა ამ ერთი დღის განმავლობაში ისეთი, რომ პრემიერმა ეს გადაწყვეტილება მიიღო? 

თვითონ შეხვედრას რაც შეეხება, განსაკუთრებული ისეთი არაფერი, ეს იყო შიდა სამუშაო შეხვედრა, სადაც ჩვენ ძალიან ბევრ თემაზე ვისაუბრეთ. აქ არ იყო მხოლოდ „იუნისეფის“ მიერ გაკეთებულ კვლევაზე საუბარი. ზოგადად ჩვენ მოღვაწეობაზე იყო საუბარი, რა პლუსები და რა მინუსები იყო, რა დადებითი რეფორმები და პროექტები იქნა განხორციელებული. ყველაფერს შევეხეთ. ერთი არის, რაც იყო შიდა დახურული შეხვედრის დროს მსჯელობა და მეორეა ის, რაც გამოვიტანეთ და ითქვა. რა თქმა უნდა, ჩვენ ვერ გამოვიდოდით და ვერ გავაკეთებდით განცხადებებს. არა აქვს მნიშვნელობა ეს იქნებოდა პარლამენტის რიგითი წევრი, ლიდერი, არ აქვს მნიშვნელობა, ეს იყო პრემიერ-მინისტრის პრეროგატივა, მას უნდა მიეღო ეს გადაწყვეტილება და ჩვენი მხრიდან არავითარ შემთხვევაში არ შეიძლებოდა რაიმე მინიშნება ან რაიმე განცხადებების გაკეთება. რაც შეეხება თვითონ გიორგის მოღვაწეობას, მე რა თქმა უნდა, ნამდვილად ვერ დავიწყებ იმაზე საუბარს, რომ ის წლები, რაც მან გაატარა თუნდაც ეკონიმიკის მინისტრობიდან, თუნდაც შემდეგ საგარეო მიმართულებით, შემდეგ პრემიერ-მინისტრობის დროს, იყო წარუმატებელი. ამას ნამდვილად ვერ ვიტყვი. ჩვენ ერთად, მთლიანად გუნდს გვქონდა ძალიან ბევრი წარმატება მთელი რიგი მიმართულებით. შეიძლება ითქვას, საგარეო მიმართულებით, ეკონომიკაშიც იყო წარმატებები, თუმცა ყოველთვის, როდესაც მე მეძლეოდა შესაძლებლობა ყოველთვის ვსაუბრობდი იმაზე, რომ არსებობს პრობლემები, არის გამოწვევები და ამ გამოწვევებს ჩვენ უნდა ვუპასუხოთ.

ჩვენ შეხვედრის შემდეგ მოვისმინეთ და თავად აწ უკვე ყოფილმა პრემიერ-მინისტრმაც განაცხადა, რომ პარტიის თავმჯდომარეს,  მმართველ გუნდს აქვს მოსაზრება, რომ ქვეყანაშ ეკონომიკური პოლიტიკა უნდა შეიცვალოს. ანუ, თქვენ ემხრობით მოსაზრებას, რომ ეკონიმიკური პოლიტიკა შესაცვლელი იყო?

მე მგონია, რომ ჩვენ დღეს გვჭირდება სულ სხვა ტემპი, დღეს ჩვენ გვჭირდება განსხვავებული მიდგომები, აუცილებელია რეფორმები, რომლიც უნდა განხორციელდეს და რაც მთავარი და მნიშვნელოვანია, შეიცვალოს აღქმა საზოგადოებაში, რომელიც დღეს ჩვენი ხელისუფლების მიმართ არსებობს. მე არ მინდა გამოვყო კონკრეტული ადამიანები, და ვთქვათ, კონკრეტული ლიდერების მიმართ შეიძლება იყოს განსხვავებულ აღქმა, უბრალოდ ზოგადად მთლიანად გუნდის მიმართ აღქმა არ არის დამაკმაყოფილებელი იმასთან მიმართებაში, რაც კეთდება, რა თანხებიც იხარჯება, რა პროექტებიც ხორციელდება. ამიტომ მე მგონია, რომ ჩვენ არავითარ შემთხვევაში არ გვჭირდება კაბინეტებში ჩაკეტილი მინისტრები. პირიქით, უნდა ვიყოთ უფრო გახსნილები, უნდა ვიყოთ უფრო ღია, უფრო მეტი კომუნიკაცია საზოგადოებასთან და არ უნდა მოგვერიდოს იმაზე საუბარი, რასაც ვაკეთებთ. მე ხშირად, როგორც დედაქალაქის მერი, მაქსიმალურად ვცდილობ მქონდეს კომუნიკაცია ყველანაირი საშუალებით, სოციალური მედიით, „ფეისბუქით“, ტელევიზიით, რომ მოსახლეობას მივაწოდო ინფორმაცია იმ პროექტებთან დაკავშირებით, თუ რა კეთდება, რას ვგეგმავთ. შეიძლება რაღაც შემეშალოს და მე ასევე ვიღებ შენიშვნას და მოსახლეობის მოსაზრებებს. ეს ამ პოლიტიკურ პროცესში არის ძალიან მნიშვნელოვანი. საზოგადოების ჩართულობა, მოსახლეობის ჩართულობა, მგონია, რომ ეს არის მნიშვნელოვანი და ის მიმართულებები, რომელიც თვითონ მამუკა ბახტაძემ რეფორმებთან დაკავშირებით გააჟღერა, მე მგონია, რომ ეს ხუთივე ძირითადი მიმართულება, არის ძალიან მნიშვნელოვანი. მცირე და საშუალო ბიზნესის ხელშეწყობა, განათლების რეფორმა, რომელიც ძალიან მნიშვნელოვანია და მგონი ჩვენ ყველა ვხედავთ, ყველა ვხვდებით, რა მდგომარეობა გვაქვს განათლების თვალსაზრისით. არა მხოლოდ დედაქალაქში, ყველგან რეგიონებში და შესაბამისად მნიშვნელოვანია ამ მიმართულებით უფრო მეტი თანხები იყოს გამოყოფილი ბიუჯეტიდან, უფრო მეტი დაიხარჯოს და გავხადოთ უფრო ხელმისაწვდომი, ჩავრთოთ უფრო კვალიფიციური ადამიანები, რომ განათლების დონემ აიწიოს. ჩვენ გვინდა განათლებული მომავალი თაობა, განათლებული ახალგაზრდობა, რომ შემდეგ ეს განათლება ისევ ჩვენი ქვეყნის საკეთილდღეოდ იქნეს გამოყენებული.

ახლა განაცხადეთ, რომ თქვენ მუდმივად გქონდათ გულისწუხილი იმაზე, რომ მინისტრები უფრო მეტად არ გადიან ხალხში და უფრო მეტად გახსნილი არ არის სამინისტროები. თქვენ თქვენი აქტივობაც მოიყვანეთ მაგალითად, რომ აქტიურად ხართ ჩართული სოციალურ სფეროში და აქიდან ესაუბრებით მოქალაქეებს. თქვენი კოლეგები რომ არ იზიარებდნენ ამ მიმართულებებს, ანუ ნაკლები კომუნიკაცია რომ ჰქონდათ  მოქალაქეებთან, ეს რისი ბრალია - პიარს ნაკლებობის თუ არასწორი ხედვა არსებობდა მთავრობაში ზოგადად ამ მიმართულებით?

პიარი შენ, მინისტრს, თუ ზოგადად მინისტრთა კაბინეტს ვერაფერს გაგიკეთებს, თუ შენ არ იქნები ლოკომოტივი და თუ შენ არ იაქტიურებ. პიარმა არ უნდა გააკეთოს? შენ უნდა იყო მთავარი მამოძრავებელი ძალა, შენ უნდა იყო ლოკომოტივი, შენ უნდა შექმნა დღის წესრიგი, წარმოადგინო ის საქმეები, რომელსაც შენი სამინისტრო აკეთებს. ასევე არ უნდა მოგერიდოს ისაუბრო იმ პრობლემებზე, იმ გასაჭირზე, რომელიც საზოგადოებაშია. დაანახო მოსახლეობას ამ პრობლემების გადაჭრის გზები, თუ როგორ უყურებ შენ, რა პროექტების განხორციელებას გეგმავ, როგორ უყურებ მაგალითად იმ სოციალური პრობლემის მოგვარებას, რომელიც დღეს ვიცით რომ არსებობს ქვეყანაში. ვიცით, რომ სიდუხჭირეა, მიუხედავად იმისა, რომ ბევრი მნიშვნელოვანი პროექტი განხორციელდა: ჯანდაცვის რეფორმა, სოფლის მეურნეობის რეფორმა, მცირე და საშუალი ბიზნესის ხელშეწყობა. უამრავი კარგი საქმეა გაკეთებული, თუმცა ეს, რა თქმა უნდა, არ არის საკმარისი, რომ ჩვენ ეს 20-25 წლის განმავლობაში დაგროვებული პრობლემები მოვაგვაროთ და არსებულად შევცვალოთ მდგომარეობა. ამისთვის ძალიან მნიშვნელოვანია ერთიანი ძალისხმევით, საზოგადოების, მოსახლეობის ჩართულობით, უფრო მეტი აქტიურობით, რეფორმებით, რომ ჩვენ მოსახლეობას დავანახოთ და ვაჩვენოთ, რომ მომავალი იქნება უკეთესი, ვიდრე დღესაა.

მე არ გთხოვთ დამისახელოთ რამდენ სამინისტროს შეეხება ცვლილება, როგორია მამუკა ბახტაძის გეგმები, მაგრამ თქვენ საუბრის დასაწყისში განაცხადეთ ასეთი რამ, რომ თქვენ შეგიძლიათ მას მიაწოდოთ ინფორმაცია, რომელ სამინისტროს უფრო მეტი პლუსი დაუსვათ, რომელს - უფრო გაძლიერება სჭირდება. გავიგეთ, რომ განათლებას სჭირდება გაძლიერება, გავიგეთ, რომ ეკონომიკის კუთხით არის გასაძლიერებელი თქვენი სტრატეგია და გეგმები. კიდევ არის სამინისტროები, რომლის მისამართითაც შეიძლება თქვენ მინუსი დასვათ და არა პლუსი?

მე მინისტრებს არ ვადანაშაულებ, მე უბრალოდ ჩემი მიდგომა გავაჟღერე, თუ როგორ წარმომიდგენია მაგალითად და როგორ უნდა იყოს საზოგადოებასთან და მოსახლეობასთან ურთიერთობა. იმიტომ რომ, ელემენტარულად გულდასაწყვეტია, რომ ჩვენ ვერ ვახერხებთ და არ გვაქვს შესაძლებლობა, მოდით პირდაპირ ვთქვათ, უამრავი მნიშვნელოვანი პროექტი ხორციელდება ყოველწლიურად ქვეყანაში, თქვენ ჟურნალისტი ხართ და დამისახელეთ ერთი პროექტი, რომელიც გახსოვთ რეგიონებიდან, რომელიც არის მნიშვნელოვანი?! ვერ მეტყვით, იმიტომ რომ, არ ყოფილა მისი სწორად მიწოდება, არ ყოფილა მისი სწორად წარმოდგენა და ამიტომ ელემენტარულად გულდასაწყვეტია, რომ ვერ ხერხდება იმ მასშტაბების წარმოდგენა და იმ პროექტების წარმოდგენა მოსახლეობისთვის, რომელიც კეთდება და ხორციელდება. ამიტომ ვამბობ, რომ უფრო მეტი აქტიურობაა საჭირო. ჩემს მოსაზრებებს რაც შეეხება, მე ბატონ მამუკას ვესაუბრე, გუნდშიც, როდესაც იყო განხილვა, ამაზე ვთქვი ჩემი მოსაზრებები, თუ როგორ წარმომიდგენია და თქვენთანაც პირდაპირ ვსაუბრობ, აქ დასამალი არაფერი არ მაქვს.

მამუკა ბახტაძემ თავისი გეგმების წარდგენისას რამდენიმე მიმართულებით გააკეთა აქცენტი და თქვენ ისაუბრეთ ამ გეგმების შესახებ. განათლებაზე მთავარი აქცენტი გაკეთდა და რა თქმა უნდა, ეკონიმიკის განვითარებაზე, მაგრამ მას ყურადღება არ გაუმახვილებია მაგალითად მართლმსაჯულებასთან დაკავშირებით. არადა, სამთავრობო ცვლილებებს სწორედაც წინ უძღოდა ერთთვიანი პროცესი, რომელსაც ჩვენ ყველანი ერთად ვაკვირდებოდით. ორი პროტესტი ვნახეთ ქალაქში, ერთ-ერთი საკმაოდ მძიმე იყო, საუბარია ხორავას ქუჩის საქმეზე სასამართლოს გადაწყვეტილებასთან დაკავშირებით და ზოგადად პრეტენზიები, რომელიც არსებობდა მართლმსაჯულების ხარისხთან მიმართებაში, ამაზე თქვენი თანაგუნდელებიც უკვე ღიად საუბრობდნენ, მას შემდეგ რაც სასამართლოს გადაწყვეტილება გამოქვეყნდა. სასამართლოსთან დაკავშირებით, ზოგადად მართლმსაჯულებასთან დაკავშირებით მამუკა ბახტაძის პოზიცია როგორია? როდესაც მან ხედვა გაგაცნოთ, გქონდათ თუ არა თანაგუნდელებს რჩევა, რომ ამ მიმართულებითაც გარკვეული რეფორმებია ჩასატარებელი?

ცხადია, წარდგენის დროს ბატონი მამუკა ყველაფერზე ვერ ისაუბრებდა და არც უნდა ესაუბრა. როდესაც პარლამენტში თავის მინისტრთა კაბინეტის წევრობის კანდიდატებთან ერთად მიბრძანდება, რა თქმა უნდა, ისაუბრებს ყველაფერზე, თუ სად ხედავს პრობლემას, რა არის გამოსასწორებელი. ჩვენ ვართ ხელისუფლება, რომელიც არ ერიდება იმ შეცდომებზე საუბარს, რომელიც მოგვდის. ახლა შეუცდომო, შეცდომების გარეშე არავინ და არაფერი არ არსებობს. მით უმეტეს, როდესაც ამხელა სახელმწიფოს მართავს. როდესაც  ამ კონკრეტულ შემთხვევებში იყო შეცდომები, რეაგირებაც იყო შესაბამისი და შემთხვევითი არ არის, როდესაც გენერალური პროკურორი გადადგა. მე რამდენიმე ინტერვიუში ვთქვი და ახლაც გავიმეორებ, ირაკლი შოთაძის მხრიდან ეს იყო კაცური საქციელი, სწორი ნაბიჯი. ის მართლაც ასე უნდა მოქცეულიყო, რადგან საზოგადოებაში ამ საქმესთან დაკავშირებით გაჩნდა გარკვეული კითხვები და მეც ვიყავი ერთ-ერთი მათგანი, რომელიც მოვითხოვდი, რომ საზოგადოებაში არსებულ ყველა კითხვას გასცემოდა პასუხი. მან გადადგა ეს ნაბიჯი და ყველა პრობლემის დროს ხელისუფლება ადეკვატურად პასუხობს. ეს ნიშნავს იმას, რომ ქვეყანაში დემოკრატიული სტანდარტები არის განსხვავებულად, სულ სხვა საფეხურზე არის ატანილი და ჩვენ ყველაფერი უნდა გავაკეთოთ, რომ არა უკან წავიდეთ, არამედ მეტი რეფორმით წინ უნდა წავიდეთ. გავაძლიეროთ დემოკრატიული ინსტიტუტები და ინსტიტუტებზე დაფუძნებული სახელმწიფო გვჭირდება ჩვენ და არა პიროვნებებზე. ამ მიმართულებით მნიშვნელოვანი ნაბიჯები არის გადადგმული, თუმცა არსებობს ხარვეზები, არსებობს პრობლემები, რომელიც  ერთიანი ძალისხმევით უნდა შევძლოთ და უნდა მოვაგვაროთ. მამუკა ბახტაძე როცა მიბრძანდება, გითხარით და კიდევ გაგიმეორებთ, აუცილებლად ისაუბრებს ყველაფერზე, თავის ხედვებზე - სად ხედავს პრობლემებს, რა მიმართულებით ხედავს პრობლემებს. ის ახალგაზრდა კაცია, მინდა გულწრფელად წარმატებები ვუსურვო. დარწმუნებული ვარ, რომ ის იქნება წარმატებული პრემიერ-მინისტრი. ამას იმიტომ არ ვამბობ, რომ ის ჩემი მეგობარია, თავისი განათლებით, თავისი კვალიფიკაციით, თავისი პროფესიონალიზმით, პატიოსნებით ყველანაირი თვისება გააჩნია მას, რომ შეკრას ძლიერი გუნდი, რომელიც იზრუნებს ქართველ ხალხზე, ჩვენი ქვეყნის მოსახლეობაზე, იზრუნებს ქვეყნის განვითარებაზე, ქვეყნის წინსვლაზე. და რაც მთავარია, ეს ყველაფერი უნდა მოვახერხოთ სწრაფად და ძალიან მალე.  

ტემპზე გაქვთ განსაკუთრებული აქცენტი, თქვენ რამდენჯერმე ახსენეთ. კარგით. მცირე მთავრობა ახსენა მამუკა ბახტაძემ. შეგიძლიათ უფრო დეტალურად გვითხარით, რას გულისხმობს მცირე მთავრობაში და ნიშნავს თუ არა ეს იმას, რომ მინისტრთა კაბინეტი კიდევ უფრო შემცირდება?

კი, არის მოსაზრებები იმასთან დაკავშირებით, რომ მინისტრთა კაბინეტი კიდევ უფრო შემცირდეს. მე არ მინდა მოვლენებს წინ გავასწრო. ალბათ, ბატონი მამუკა თავადვე გააკეთებს ამასთან დაკავშირებით განცხადებას, ისაუბრებს მის მოსაზრებებზე, როგორ ხედავს მინისტრთა კაბინეტს, თუ რამდენი უნდა დარჩეს, როგორ უნდა მოხდეს, შეიძლება რაღაც სამინისტროების შერწყმა მოხდეს. მე არ მინდა მოვლენებს წინ გავუსწრო, ბატონი მამუკა ამაზე თავადვე ისაუბრებს.

საპრეზიდენტო კანდიდატი მმართველ ძალას ჯერ არ დაუსახელებია, არადა დრო არ ითმენს, საპრეზიდენტო არჩევნები თითქმის კარს მოგვადგა. როდის დასახელდება საპრეზიდენტო კანდიდატი, არის თუ არა რომელიმე კანდიდატებზე საუბარი?

გუნდში რამოდენიმეჯერ იყო მსჯელობა კანდიდატთან დაკავშირებით. ჯერ გადაწყვეტილება მიღებული არ არის ბოლოდროინდელი მოვლენებიდან გამომდინარე...

ერთზეა საუბარი, თუ რამდენიმეზე?

რამდენიმე კანდიდატურა განიხილებოდა და როგორც კი მთავრობის დამტკიცება მოხდება პარლამენტში, ჩვენ აუცილებლად დავუბრუნდებით ამ საკითხს, განახლდება გუნდში მსჯელობა და უახლოეს მომავალში გადაწყვეტილება იქნება მიღებული. იმ ვადებს, რომელიც კანონითაა მოცემული, ჩვენ არავითარ შემთხვევაში არ დავარღვევთ და ჩვენი მხრიდან იქნება წარმოდგენილი საპრეზიდენტო კანდიდატურა. თუ ვინ იქნება, ეს ძალიან მალე იქნებ ცნობილი თქვენთვის და საზოგადოებისთვის.

აუცილებლად უნდა შევეხო ბოლო ფაქტებს, რომელიც რეგიონში განვითარდა, ვგულისხმობ მარნეულს და ახლა უკვე ოზურგეთს, ინციდენტები, რომელიც ხდება მმართველ ძალასა და „ნაციონალურ მოძრაობას“ შორის. ჩვენ თქვენი პარტიის განცხადებაც მოვისმინეთ ამასთან დაკავშირებით და „ნაციონალური მოძრაობის“ დესტრუქციულ ქმედებებზე გააკეთა პარტიამ აქცენტი, მაგრამ რადგან ეს ორი ფაქტი მოხდა რეგიონებში, ხომ არ აქვს დისციპლინასთან დაკავშირებით რაიმე პრობლემა პარტიას რეგიონულ ოფისებში?

არაფერი. ეს არის მიზანმიმართული პროვოკაციები კონკრეტულად ამ გაბანკროტებული პოლიტიკური პარტიის ნარჩენების მხრიდან...

თუმცა თქვენი პარტიის წევრები მონაწილეობენ ამ პროვოკაციებში, ხომ ასეა?

მესმის, მესმის. ქართველები ვართ, ადამიანები ვართ, როდესაც გადმოდიან პირად შეურაცხყოფაზე, ძალიან რთულია მოითმინო ეს ყველაფერი. თუმცა ჩვენ, თანამდებობის პირებს გვაქვს უფრო მეტი პასუხისმგებლობა და თმენის ვალდებულება და მინდა მივუწოდო ყველა ჩვენს მხარდამჭერს, ყველა ჩვენს თანაპარტიელს, რომ თავი შეიკავონ და თავი აარიდონ ყოველნაირ პროვოკაციას. ჩვენ ვერავისზე და ვერაფერზე თვალს ვერ დავხუჭავთ, ვინც არ უნდა იყოს ეს. სამწუხაროდ შეიძლება ჩვენი გუნდის წევრი იყოს, მაგრამ კანონის წინაშე ჩვენ ყველანი თანასწორუფლებიანი ვართ, ჩვენთვის მთავარი მამოძრავებელი არის კანონი და კანონი არის უზენაესი. შესაბამისად, ყველა დარღვევას ექნება ადეკვატური პასუხი.

ვისარგებლებ შემთხვევით და ამჯერად, როგორც ქალაქი მერს, ისე დაგისვამთ კითხვას, გუდიაშვილის მოედნის რეაბილიტაციისას მნიშვნელოვანი არქეოლოგიური მასალა და სხვადასხვა არტეფაქტი აღმოაჩინეს, ამის გამო ცვლილებები შეციდა პროექტში. რა ცვლილებებზეა საუბარი?

ძალიან მნიშვნელოვანი პროექტის განხორციელება გვაქვს დაწყებული გუდიაშვილის მოედნის რეაბილიტაციის სახით. დღეს ჩვენ ადგილზე ვიმყოფებოდით და ძალიან მიხარია ის, რომ გარდა იმისა, რომ ჩვენ მიწის ზევით გვაქვს ისტორიული ძეგლები, რომლითაც ამაყობს თითოეული ჩვენთაგანი და ხდება მათი რეაბილიტაცია, მგონია, რომ ეს მოედანი იქნება ერთ-ერთი საუკეთესო ადგილი არა მხოლოდ დედაქალაქში, არამედ მთლიანად რეგიონში, სადაც არა მარტო საქართველოს მოსახლეობას, არამედ ტურისტებსაც ექნებათ შესაძლებლობა მოვიდნენ და ნახონ ეს ღირშესანიშნაობები. გარდა ამ მიწის ზედა სამუშაოებისა, როდესაც მიმდინარეობდა რეკონსტრუქცია-რეაბილიტაციის სამუშაოები, მიწის ქვემოთ, შეიძლება ითქვას, რომ მთელი ქალაქი იქნა ნანახი სარდაფებში და ჩვენ, რა თქმა უნდა ამას ყველაფერს შევინარჩუნებთ. აღმოჩენილია, ასევე, ძალიან საინტერესო ნივთები, რომელიც მე-12, მე-13 , მე-14 საუკუნეებით თარიღდება, რაც ძალიან მნიშვნელოვანია. ეს ყველაფერი იქნება შენარჩუნებული და წარმოდგენილი იქნება ის, როდესაც მთლიანად სამუშაოები დასრულდება.ყველა იქ მისულ ადამიანს ექნება შესაძლებლობა ეს ყველაფერი ნახოს და დატკბეს ამ სილამაზით, რომელიც ჩვენს დედაქალაქში გვექნება.

როგორც ფეხბურთის გულშემატკივარმა ბოლოს აუცილებლად უნდა გკითხოთ,  მესმის რომ პოლიტიკურად ძალიან გადატვირთული გრაფიკი გაქვთ და არ ვიცი რამდენად ახერხებთ მსოფლიო ჩემპიონატს თვალ-ყური მიადევნოთ, მაგრამ ვის აქვს ყველაზე მეტი შანსი გახდეს 2018 წლის გამარჯვებული?

გამიჭირდება თქმა, თუ  ვინ გახდება, თუმცა მგონია, რომ საკმაოდ საინტერესო მსოფლიო ჩემპიონატი გველის.

თქვენ ვის ქომაგობთ?

არ ვიცი, გამიჭირდება საუბარი, მაგალითად გუშინ ძალიან საინტერესო შეხვედრა იყო - პორტუგალია-ესპანეთი და მგონია, რომ ფეხბურთის გულშემატკივრებმა ძალიან ისიამოვნეს. დარწმუნებული ვარ, რომ ბევრი, ბევრი ასეთი შეხვედრა გველის წინ ფეხბურთის გულშემატკივრებს.

თუმცა ჩემპიონის დასახელება გაგიჭირდებათ?

გამიჭირდება, იმიტომ რომ, ბევრი საინტერესო გუნდია ახალგაზრდებით დაკომპლექტებული და ასე რომ ვთქვათ, საინტერესო მოვლენებიც ბევრი იქნება.

ვიდეო     

კომენტარები ()

სხვა ინტერვიუები