21 ივლისი 2018

რა ხდება მმართველ პარტიაში

ინტერვიუ „ქართული ოცნების“ ფრაქციის თავმჯდომარესთან

„ქართულ ოცნებას“ პირველი გარიცხული დეპუტატი ჰყავს. დავით ჭიჭინაძეს პარტიული დისციპლინის დარღვევისა და თანაგუნდელების მიმართ გაკეთებული არაკორექტული განცხადებების გამო მმართველი პარტიის რიგები დაატოვებინეს. ჭიჭინაძის მიერ რამდენჯერმე გაკრიტიკებულმა პარლამენტის თავმჯდომარემ განაცხადა, რომ გარიცხულმა დეპუტატმა ყველა წითელი ხაზი გადალახა. კრიტიკული განცხადებები სხვა დეპუტატებისგანაც ისმოდა. მაგალითად, ამ მხრივ გამოირჩეოდა გედევან ფოფხაძეც, თუმცა მის შესახებ გადაწყვეტილება პარტიაში არ მიუღიათ. რა ხდება მმართველი გუნდის შიგნით და მის გარეთაც, თემაზე „ქრონიკის“ წამყვანის თეა სიჭინავას კითხვებს ფრაქცია „ქართული ოცნების“ თავმჯდომარემ მამუკა მდინარაძემ უპასუხა.
 

პარტია „ქართული ოცნების“ ოფისი

ვიდრე გუნდის შიგნით მიმდინარე ამბებს, უშუალოდ ჭიჭინაძის გარიცხვის თემას შევეხებოდეთ, ასევე გუნდს ეხება ისიც, რაზე საუბარიც უნდა დავიწყო და რაც დღის და კვირის მთავარი თემაა. პროკურატურა აქტიურად იძიებს ყოფილი მინისტრების, დიმიტრი ქუმსიშვილისა და ზურაბ ალავიძის პერიოდში სამინისტროებში არსებულ შესაძლო დარღვევებსა თუ გადაცდომებს. ბევრი თქვენი თანაგუნდელისთვის ეს გამოძიება მოულოდნელი იყო. თქვენთვისაც მოლოდინელი ხომ არ ყოფილა?

მოულოდნელობის რა გითხრათ, ვერ გეტყვით, მაგრამ იმის შესახებ ინფორმაცია, რომ გარკვეული გადაცდომები იყო, ნამდვილად არ მაქვს. ამაზე გამოძიებამ უნდა გაგვცეს პასუხები. ზოგ შემთხვევაში ძალიან გულწრფელი რომ ვიყო თქვენს და მაყურებლის წინაშე, როცა გარკვეული კითხვის ნიშნები გაჩნდა, ამას რეაგირებაც მოჰყვა თავის დროზე. თუმცა ეს იმას არ ნიშნავს, რომ აპრიორი შემიძლია ვილაპარაკო, რომ ვინმეს დანაშაული აქვს ჩადენილი ან რაიმე გადაცდომა აქვს. გამოძიება იმისთვის არსებობს, რომ ამ ყველაფერს გასცეს პასუხი - ან იყო ასე, ან - არ იყო და ჩვენ გამოძიების დამთავრებას ველოდებით. მე ნამდვილად არ მაქვს და არც უნდა მქონდეს გამოძიების დეტალების შესახებ ინფორმაცია და მეც, როგორც სხვა, საზოგადოების ნებისმიერი წევრი, ველოდები როდის დასრულდება გამოძიება.

რა თქმა უნდა, გამოძიების დასრულებამდე ვერც ერთი ჩვენთაგანი ვერ დაამტკიცებს იმას, ვინმე დამნაშავეა თუ არა, იყო თუ არა რაიმე დანაშაული ჩადენილი ამ მიმართულებით, მაგრამ გარკვეულ ლოგიკური კითხვები ამ საქმესთან დაკავშირებით ჩნდება. ორი მაღალჩინოსნის მისამართით ისმის კითხვა, მისი უწყების და მისი საქმიანობის მისამართით. ეს მაღალჩინოსნები თქვენი თანაგუნდელები არიან, ყოველ შემთხვევაში იყვნენ აქამდე, ახლა არ ვიცი როგორ ხდება. თქვენ რამდენჯერმე გამოუცხადეთ ნდობა ამ მინისტრებს. დიმიტრი ქუმსიშვილს ნამდვილად რამდენჯერმე გამოუცხადეთ. თავიდან ამ უწყებების მისამართითაც არავის სჯეროდა, რომ შეიძლებოდა პროკურატურას რაიმე ინტერესი ჰქონდა. მმართველი გუნდი ამას კატეგორიულად უარყოფდა. თუმცა აღმოჩნდა, რომ კითხვები არსებობს. თუკი მოვლენები ისე განვითარდება, რომ მათი პასუხისმგებლობის საკითხი დადგება, მმართველი გუნდი გაიზიარებს თუ არა მორალურ პასუხისმგებლობას ამ საკითხზე?

სწორედ ამის გამო ნამდვილად ვისურვებდი, რომ არანაირ დამნაშავეზე არ იყოს იქ ლაპარაკი, მაგრამ ერთი ფაქტია, როდესაც ვისმენთ ჩვენი ოპონენტების მიერ გარკვეულ კრიტიკას, დაცვასაც კი ცდილობენ, რომ რაღაც პოლიტიკური ზეწოლის შესახებ გარკვეული ინფორმაციების გავრცელებას და საზოგადოებაში ასეთი განწყობების გაჩენას ცდილობენ, ამასთან დაკავშირებით დაბეჯითებით შემიძლია გითხრათ, რომ გამოძიება დღეს არ დაწყებულა.

როდის დაიწყო? დამეთანხმებით, რომ ამ ეჭვების არსებობაში ლოგიკა არსებობს.

რა თქმა უნდა, ლოგიკურია და იმიტომ ვამბობ სწორედ, რომ გამოძიება დაიწყო გაცილებით ადრე, ვიდრე მათი სახლში წასვლის საკითხი დადგებოდა.

მათი მინისტრობის პერიოდში დაიწყო?

დიახ, ძველი გამოძიებაა, ძველი საქმეებია და დარწმუნებული ვარ, პასუხები გაიცემა. რა მიმართულებით გაიცემა, ჯერ ნამდვილად არ ვიცი, მაგრამ ყველა კითხვაზე, ვინც არ უნდა იყოს ეს, ჩვენი გუნდის ყოფილი წარმომადგენელი იქნება, თუ სხვა ნებისმიერი გუნდის, ყოფილი თანამდებობის პირი, თუ ახლანდელი, და იმ დღეს უტრირებულად ვთქვი, მომავალიც-მეთქი, ამით ხაზგასმა მინდოდა და დღესაც იგივეს ვიმეორებ, ყველა ადამიანმა, მით უმეტეს მაღალი თანამდებობის პირმა, პასუხი უნდა გასცეს ნებისმიერ კითხვაზე, რაც გამოძიებას გაუჩნდება. ეს არის ვალდებულება და ეს ვალდებულება მარტო ერთი ადამიანის ვალდებულება არ არის. ამაზე პასუხი გამოძიებამაც უნდა გასცეს.

ახლა თქვენ გააკრიტიკეთ თქვენი ოპონენტები, რომლებმაც გამოთქვეს მოსაზრება, რომ ეს არის პოლიტიკური დევნა. პოლიტიკურ დევნად არ ჩაითვლებოდა და წმინდა საგამოძიებო საქმიანობად ჩაითვლებოდა მხოლოდ მაშინ, თუკი ამ დარღვევების თაობაზე პროკურატურა რეაგირებას მოახდენდა მაშინ, როდესაც მინისტრთა კაბინეტში მუშაობდნენ ქუმსიშვილი და ალავიძე. ანუ, თქვენ დადასტურებულად შეგიძლიათ თქვათ, რომ გამოძიება ამ კონკრეტულ საკითხებზე პროკურატურამ დაიწყო მაშინ, როდესაც ქუმსიშვილიც და ალავიძეც მოქმედი მინისტრები იყვნენ?

მე წეღანაც გითხარით, რომ დეტალები არ ვიცი, მაგრამ ვიცი, რომ გაცილებით ადრე არის დაწყებული, ვიდრე ეს ამბავი გახმოვანდა. აქიდან გამომდინარე, მე გამოვრიცხე იმ ინსინუაციების შედეგად საზოგადოებაში გაჩენილი ინფორმაციაა, რომ გუშინ და დღეს დაიწყო ეს გამოძიება. ვიცი, რომ გაცილებით ადრეა დაწყებული, მაგრამ ამის იქით ინფორმაციას არ ვფლობ. ამიტომ ამ კითხვებზე დრო გასცემს პასუხს, დრო გვაჩვენებს, როგორ წარიმართება გამოძიება. რადგან მეტი ინფორმაცია არ მაქვს ცალკეულ დეტალებთან დაკავშირებით, რა თემაზე უსვამენ შეკითხვებს პროკურატურაში კონკრეტულ ყოფილ თანამდებობის პირებს, მე ვერ მოგახსენებთ, ამისათვის უკაცრავად, მაგრამ ხვალ და ზეგ, ამ ტერმინის ზოგადი აღქმით, ჩვენ, ალბათ, გავარკვევთ და ბევრ კითხვაზე გვექნება კონკრეტული პასუხები.  

არსებობს მოსაზრება, რომ რადგანაც გამოძიების ინტერესი ამ კონკრეტულ ორ მინისტრს და მათ საქმიანობას ეხება და არავისთვის დასამალი არ არის, რომ ისინი ყოფილი პრემიერმინისტრის, გიორგი კვირიკაშვილის კადრებად მოიაზრებოდნენ მინისტრთა კაბინეტში და არსებობს მოსაზრება, რომ ეს პროცესები არის კვირიკაშვილთან მისასვლელი ერთ-ერთი წინაპირობა. შეგიძლიათ იგივე თქვათ, რომ კანონის წინაშე ყოფილ პრემიერებსაც შეიძლება ჰქონდეს პასუხიმგებლობა?

ძალიან ზოგადად რომ არ გამომივიდეს საუბარი არაინფორმირებულობის გამო და კიდევ ერთხელ ვამბობ, რომ არც უნდა ვიყო ინფორმირებული ამ დეტალებთან დაკავშირებით, მე ვერ დაგიდასტურებთ ამ ამბავს, რომ ვიღაც ვიღაცაზე გასვლას ცდილობს. ეს იქნება გამოძიების შედეგი.

მაგრამ, კატეგორიულადაც არ გამორიცხავთ, ხომ?

ვერც ვერაფერს გამოვრიცხავ და ვერც ვერაფერს დავადასტურებ, ამიტომ ეს ნუ გაჩნდება იმის წყაროდ, რომ თითქოს აქ რაღაც დაშვება გავაკეთე. მე ვლაპარაკობ იმ ინფორმაციის ფარგლებში, რაც მაქვს. რადგან მწირია ინფორმაცია, მიწევს ასე საუბარი. ამიტომ ზოგადად შემიძლია გითხრათ, რომ ნებისმიერი ადამიანი პასუხს გასცემს იმ კითხვაზე, რომელიც მის წინაშე დაისმევა და ინდულგენცია ნამდვილად არ იქნება მისი ყოფილი, ან თუნდაც ახლანდელი თანამდებობის პირობა.

მათ შორის ყოფილი პრემიერისაც?

არანაირი მნიშვნელობა არ აქვს, რომელი თანამდებობის პირია კონკრეტული ადამიანი. მე კონკრეტულად არავისზე არ მაქვს დღეს ინფორმაცია, რა შეიძლება იყოს. ამიტომ ამის იქით რაც არ უნდა ჩამეკითხოთ, მე ამის პასუხი არ მაქვს.

ეს კითხვები ლოგიკურად ჩნდება იმ მოვლენებიდან გამომდინარე, რომელსაც ვაკვირდებით.

ყოველ შემთხვევაში, მე ზოგადად შემიძლია დაგიდასტუროთ, რომ გარკვეულ პერიოდში ამ კითხვებზე პასუხი არა მხოლოდ პროკურატურისთვის, არამედ საზოგადოებისთვისაც ცნობილი იქნება.

ჩვენც ველოდებით პროკურატურის პასუხებს ამ გამოძიებასთან დაკავშირებით, დადგება თუ არა კონკრეტულ ყოფილი მაღალჩინოსნების პასუხიმგებლობის საკითხი. ეს თქვენი გუნდის თავს ხდება, თუმცა მარტო ეს არ ხდება. მაგალითად, მიმდინარე კვირას გავიგეთ, რომ თქვენი პარტიის რიგებიდან პირველი დეპუტატი გაირიცხა დავით ჭიჭინაძის სახით. რა ხდება თქვენს პარტიაში, მშვიდობა გაქვთ?

რა ხდება, თქვენც ძალიან კარგად იცით. თქვენ და საზოგადოება ხედავდა ამ ბოლო თვეების, და არა ერთი და ორი თვის განმავლობაში, რომ ჩვენ გვიწევდა თმენა. „გვიწევდა“ ცოტა ისეთი ნათქვამია, შეიძლება შეგნებულად ვაკეთებდით, იმიტომ რომ, ამით გარკვეული დასკვნები გუნდის წევრებს და განსაკუთრებით მას გამოეტანა. აქ საქმე მარტივადაა. ყველა პარტიის, მთელ მსოფლიოში, ერთ-ერთი მთავარი გამოწვევაა, რომ გუნდის შიგნით შეაჯეროს პოზიციები და საერთო პოზიციით წარდგეს საზოგადოების წინაშე. წარმოიდგინეთ, რომ მმართველ გუნდში ყველა, 116 ადამიანი რასაც ვფიქრობთ, რამდენი განსხვავებული აზრი გვქონია თუნდაც ლიდერებს, ერთმანეთთან რამდენი გვიკამათია და რამდენი დრო და აზრთა გაცვლა-გამოცვლა დაგვჭირვებია საიმისოდ, რომ საერთო პოზიცია შეგვეჯერებინა. წარმოიდგინეთ, რომ ეს ყოველივე ყოველ დღე გამოვიტანოთ გარეთ, კამერების წინ დავდგეთ და ვილაპარაკოთ - მე ასე ვფიქრობ, თეა ასე ფიქრობს, ვთქვათ, ირაკლი ასე ფიქრობს, თამარ ჩუგოშვილი და გია ვოლსკი ასე ფიქრობენ და ეს იქნება ქაოსი, მაგრამ...

როცა ჩვენ ამ საკითხს ვეხებოდით, წინა პერიოდში როცა ვსაუბრობდით, გუნდში განხეთქილება ხომ არ იყო, თქვენი პარტია ამაყობდა, მათ შორის თქვენც რამდენჯერე ყოფილხართ ჩემი გადაცემის სტუმარი, ასევე სხვებიც მმართველი ძალიდან, ამაყობდით, ჩვენი პარტია სწორედ იმით გამორჩევა, რომ განსხვავებული აზრი არსებობს და ერთმანეთის განსხვავებულ აზრს პატივს ვცემთ-ო.

მოდით, ჯერ წინა წინადადებას დავასრულებ, ვინმეს არ დარჩეს შთაბეჭდილება, რომ ჭიჭინაძე პარტიამ გარიცხა, იმიტომ რომ, განსხვავებულ აზრს აფიქსირებდა. ეს არის ერთ-ერთი მთავარი საკითხი, რითაც დაიწყო ეს ყველაფერი, მაგრამ ეს ყველაფერი შემდეგ გადაიზარდა შეურაცხყოფაში, ინსინუაციაში, გარკვეული არასწორი ინფორმაციის მიწოდებაში, ჩემს თავზე აბსოლუტურად არაფერს ვიტყვი, იმ ადამიანების მისამართით, ვისაც არანაირი სხვა ინტერესი არ გააჩნია, გარდა იმისა, რომ დღე და ღამეს ასწორებენ, კანონებს წერენ, რეფორმებზე ფიქრობენ და ბევრ რამეს აკეთებენ. დღეს უამრავი პრობლემაა და მთავარი ნიუსია ჭიჭინაძე გარიცხეს თუ არა. ამ დროს უამრავ ადამიანს უამრავი პრობლემა აწუხებს და მარტო ამაზე კონცენტრირება არ არის სწორი. იმიტომ რომ, ამ პირობებში, როდესაც აკრიტიკებ თანაგუნდელებს, გუნდის ლიდერებს, როდესაც ხედავ და ობიექტურად დავით ჭიჭინაძე ყველაზე კარგად ხედავდა ვინ რას აკეთებდა და დარტყმა მიჰქონდა იმ ადამიანებზე, ვინც ყველაზე მეტს შრომობს, ვინც ყველაზე მეტად ზრუნავს და ვისაც ყველაზე მეტად ევალება ამის გაკეთება, რადგან არავინ არავის არაფერს ამადლის. სამწუხაროდ, ეს ყველაფერი შემდეგ ემთხვევა „ნაციონალური მოძრაობის“ ნარატივებს, იქ კოლექტიურ გვარებზე რომ ლაპარაკობენ, იქ რაღაც კომკავშირელობაზე როცა ლაპარაკობენ. ვერავის ვერ დავაბრალებ, რომ განზრახ ხდება და ვიღაც შეუთანხმდა, მაგრამ მესიჯები ბოლოს ერთი ერთში ჯდებოდა.

შეურაცხყოფის გამო გარიცხეთ დავით ჭიჭინაძე? იგივე შინაარსის განცხადებები გააკეთა გედევან ფოფხაძემაც.

არა, აბსოლუტურად განსხვავდებოდა.

კომკავშირლები - ეს სიტყვა მანაც გამოიყენა. ანუ, მნიშვნელობა აქვს ვინ იტყვის?

არა. თან, დავით ჭიჭინაძე ამას აკეთებდა რამდენიმე თვის განმავლობაში პერმანენტულად. როცა გედევან ფოფხაძეს ავუხსენით, დაველაპარაკეთ, იმის შემდეგ ფოფხაძე მეორე დღეს გამოვიდა და ბოდიში მოიხადა, გაიგო, რაც დააშავა.

ჭიჭინაძე ბოდიში რომ მოიხადოს, შეიძლება პარტიამ უკან წაიღოს გადაწყვეტილება?

ბოდიში როგორ უნდა მოიხადოს 6 თვის განმავლობაში პერმანენტულად, მიზანმიმართულად აზიანებს მთელ გუნდს. შეიძლება განსხვავებული აზრი გქონდეს...

განსხვავებული აზრი ჰქონდა შრომის კოდექსთან დაკავშირებით, როდესაც განაცხადა, თუკი მთავრობას ვერ გაუწია წინააღმდეგობა პარლამენტმა და პარლამენტის თავმჯდომარემ, მაშინ პარლამენტის თავმჯდომარე გასაკრიტიკებელია. ეს არ იყო განსხვავებული აზრი?

ძალიან დიდი მადლობა, რომ გამახსენეთ. უყურეთ რა ხდება. როგორც მინიმუმ, ეს ხალხი რომ შრომობს, წეღან რომ ვლაპარაკობდი, თუ ეს ყველაფერი გაინტერესებს შენ, კომისიის სხდომას მაინც უნდა დაესწრო, საკონსტიტუციო კომისიაზეა აქ ლაპარაკი. ძალიან სამწუხარო იყო, რომ სხვა ადამიანებმაც, ვინც კომისიის წევრები იყვნენ, თქვეს, რომ თუ კომპრომისი იყო, ჩვენც უნდა გვცოდნოდაო. ცოდნისთვის კომისიის სხდომებს უნდა დასწრებოდნენ და პლენარულ სხდომაზე უნდა მოესმინათ რაზე იყო ლაპარაკი. ირაკლი კობახიძემ მინიმუმ 10-ჯერ ან 15-ჯერ ახსენა მთავრობის პოზიცია კომისიის სხდომებზე, ჩვენი პოზიცია, ისიც კომისიის სხდომებზე და იქ იყო ლაპარაკი. დღეს რაიმე ისეთ კოპრომისი კი არ მომხდარა, იქ აღსრულების ნაწილი არის სხვა. კონსტიტუციაში შრომის უფლების შესახებ ჩაიწერა მკაფიოდ, მაგრამ იქ იყო საუბარი შრომის ინსპექციაზეც. მართალია ამით არაფერი გაფუჭებულა, იმიტომ რომ, ბევრ ქვეყანაში, მათ შორის განვითარებულ ქვეყნებში შრომის ინსპექციის შესახებ კონსტიტუციაში ჩანაწერი არ არის, მაგრამ ეს ინსტიტუტი არსებობს და წარმატებით მუშაობს. ჩვენ ვცდილობდით, რომ შრომის  ინსპექციის ინსტიტუტი გაგვეჩინა კონსტიტუციაში და აქ იყო კომპრომისი, ამაზე არ დაგვეთანხმნენ და ჩვენ ეს ვერ ჩავწერეთ. ამ კომპრომისზე მიბმა და სპეკულაცია, რომ ხალხი დაიხოცა და ხალხის დახოცვაზე მიდიხართ კომპრომისზე? ეს არის სპეკულაციური და ამას ლაპარაკობ შენს თანაგუნდელებზე და აბსოლუტურად ტყუილს. ესეც კი არ ჰქონდა დავით ჭიჭინაძეს გააზრებული, არ იცოდა, რა კომპრომისზე იყო ლაპარაკი.

დარწმუნებული ხართ, რომ დავით ჭიჭინაძის პოზიციას მმართველ გუნდში სხვა წევრებიც არ იზიარებენ და იგივე გადაწყვეტილების მიღება არ მოუწევს პარტიას სხვებთან მიმართებაში?

პოზიციას გააჩნია. პოზიცია არის ორი, ერთი არის შეურაცხყოფის პოზიცია და მეორე არის აზრის სხვაობის პოზიცია. აზრის სხვაობის პოზიცია გვაქვს ძალიან ხშირად, მეც მქონია, მაგრამ აქ ჩვეულებრივად პასუხისმგებლიან გუნდში და პასუხისმგებლიან ადამიანებს შორის ასე ხდება, ვცდილობთ, რომ ჩვენი აზრი, რომელიც სწორად მიგვაჩნია, გუნდის შიგნით გავიტანოთ, დავუმტკიცოთ ერთმანეთს, რომ ასეა სწორი, ხალხს ასე უფრო გამოადგება და ამის შემდეგ ვილაპარაკოთ. დავით ჭიჭინაძე ერთხელ მაინც რომ მისულიყო პარლამენტის თავმჯდომარესთან და ეთქვა თავისი განსხვავებული აზრი, ეთქვა, რომ ეს სწორია და თუ ამას არ გააკეთებთ, ამაზე საჯაროდ ვილაპარაკებ, მაშინ შეიძლება გამართლება მოგვეძებნა, მაგრამ როდესაც ერთხელაც არ დააფიქსირებ გუნდის შიგნით არანაირ განსხვავებულ პოზიციას, არ მიხვალ, არ დაელაპარაკები არც ფრაქციის თავმჯდომარეს, არც უმრავლესობის ლიდერს, არც პარლამენტის თავმდჯომარეს თუ ვიცე-სპიკერებს და უამისოდ გამოდიხარ და პირდაპირ ტელეკამერებიდან აგებინებ შენს ლაძღვა-გინებას და პოზიციას შენს თანაგუნდელებს, ეს არის არასწორი და ეს გახდა საფუძველი, გაერიცხათ პარტიიდან სამდივნოს.

კიდევ რამდენიმე საკითხს უნდა შევეხოთ. დღეს აჭარის მთავრობის მეთაური დაამტკიცეს, თორნიკე რიჟვაძე. დამტკიცებამდე საკმაოდ ვნებათაღელვა გამოიწია თქვენი მხრიდან პრეზიდენტის განცხადებამ ამასთან დაკავშირებით. ყველაფერი საბოლოოდ ისე წარიმართა, როგორც უმრავლესობას სურდა და ხომ არ ფიქრობთ, რომ ნაადრევად მოხდა აღელვება პრეზიდენტის განცხადებასთან დაკავშირებით?

ისეთ კითხვებზე მომიწია პასუხის გაცემა, რომ ვიღაცების კრიტიკა მიწევს და ადამიანებზე ცუდის ლაპარაკი ძალიან არ მიყვარს-ხოლმე, მაგრამ ამ შემთხვევაში კომიკური სიტუაცია გვქონდა. ნამდვილად კომიკური სიტუაცია გვქონდა. ჯერ ვთქვათ, რა არის ასეთ სიტუაციაში პრეზიდენტის როლი სინამდვილეში. თქვენ წარმოიდგინეთ, საქართველოს პარლამენტი აირჩია მოსახლეობამ და იქ უმრავლესობას წარმოადგენს “იქს“ პარტია და პრეზიდენტმა რომ დაიწყოს ლაპარაკი, რომ ამ „იქს“ პარტიის მიერ პრემიერ-მინისტრობაზე მოწონებულ კანდიდატზე ვიფიქრებ დავასახელო თუ არა. რა რეაქცია გექნებათ?

მეც ვუსმენდი პრეზიდენტის იმ გამოსვლას და ასეთი რამ ითქვა, რომ თორნიკე რიჟვაძის კანდიდატურა ნამდვილად არ არის მიუღებელი, მაგრამ რა გადაწყვეტილებას მივიღებ, ამას ვნახავთ.   

დავფიქრდები ამაზე-ო. პირველად კომიკურ სიტუაციაში თავი როდის ჩაიგდო, იცით? აი, გამიკვირდა ოპოზიციის რატომ არ ჰყავს თავისი კანდიდატურა-ო. შემდეგ წარმოუდგინეს და მეორედ მაშინ ჩავარდა კომიკურ სიტუაციაში. იმიტომ რომ, წარმოუდგინეს და რა ქნა, დაასახელა ეს კანდიდატი, თუ რა უნდა ექნა?  შემდეგ „ევროპული საქართველოს“ წარმომადგენლები გამოდიოდნენ და ამბობდნენ, რომ აი, მმართველმა გუნდმა, მდინარაძისა და კობახიძის განცხადებებმა გავლენა იქონიეს პრეზიდენტის გადაწყვეტილებებზე-ო. ნახევრად იუმორში ვთქვით, თუ ჩვენმა საუბარმა მიახვედრა პრეზიდენტი, როგორ უნდა წაიკითხოს კონსტიტუცია, ძალიან კარგი. მართლა ძალიან გულწრფელად გეტყვით, გუშინ ვუსმენდი მის გამოსვლას და არ ვიცი, სხვადასხვა ადამიანებს მმართველ გუნდში ერთი და იგივე წარმოდგენა გაგვიჩნდა და ერთი და იგივე ინტერვიუები მივეცით, ამ კაცს მართალ ჰგონია, რომ  მის გარშემო ტრიალებს პოლიტიკურ ორბიტაზე ყველაფერი. არ მინდა შევადარო და ნამდვილად არ მგონია, დარწმუნებულიც ვარ, რომ იგივე ძალაუფლება რომ ჰქონდეს ეს ადამიანი რაღაც საკითხებში მიხეილ სააკაშვილივით ნამდვილად არ მოიქცეოდა, მაგრამ თვითშეფასება მგონია, რომ არანაკლები აქვს, ხარჯვაც არანაკლები აქვს და გარკვეული რიტორიკაც. არანაკლები აქვს.

ანუ ფიქრობთ, რომ მაინც არ იჩქარა მმართველმა ძალამ, როდესაც პრეზიდენტის განცხადება ასე შეაფასა? მიუხედავად იმისა, რომ მან რიჟვაძის კანდიდატურა წარადგინა?

არავითარ შემთხვევაში. ამ შემთხვევაში პრეზიდენტი, უკაცრავად პრეზიდენტის ინსტიტუტის მიმართ და თუნდაც მარგველაშვილის მიმართ, ამ შემთხვევაში პრეზიდენტი არის წმინდა ფორმალური დატვირთვის ადამიანი, გამტარი. ამას ჩვენთან აბსოლუტურად წმინდა ფორმალური და სიმბოლური დატვირთვა აქვს. არ ვიცი თავის პრესტიჟი ასწია თუ რა გააკეთა, როცა თქვა, რომ მე დავფიქრდები, შემდეგ თქვა, რომ ოპოზიციამ წარმოადგინოს, შემდეგ წარადგინა ოპოზიციამ, შემდეგ ის არ წარადგინა. რაღაც კომიკურ სიტუაციაზე გვაქვს საუბარი. კონსტიტუცია ასე არ იკითხება.

ორიოდე სიტყვა თორნიკე რიჟვაძეზეც გვითხარით. თქვენ პირადად რა იცით მისი საქმიანობის შესახებ? ფართო საზოგადოებისთვის ის ნაკლებად ცნობილი იყო აქამდე.

პირადად მე არ ვიცნობ თორნიკეს. ვიცი, რომ არის ახალგაზრდა კაცი და ჩვენი თანაგუნდელები ძალიან კარგად ახასიათებენ, ვინც იცნობს, ყველას უკლებლივ აბსოლუტურად დადებითი წარმოდგენა აქვს.

როგორ ახასიათებენ?

ახასიათებენ, როგორც კარგ მენეჯერს. იმიტომ რომ, მას მენეჯერული გამოცდილება უკვე საჯარო სამსახურში გააჩნია, მიუხედავად მისი პატარა ასაკისა. უცხოეთის რამდენიმე ქვეყანაში აქვს განათლება მიღებული და იყო ძალიან წარმატებული და წარჩინებული სტუდენტი. შემდეგ უკვე, საჯარო სამსახურში მუშაობის დროს, ჩვენმა თანაგუნდელმა ვინც კი გაიცნო, ერთი ადამიანი ვერ ვნახე, ვინც მასზე საშუალო შეფასებას გააკეთებდა. ძალიან წარმატებული ადამიანია, ფლობს რამდენიმე უცხო ენას, აქვს ძალიან კარგი კონტაქტები, აქვს კარგი მენეჯერული უნარი.

თუმცა მხოლოდ უცხო ენის სწავლა არ არის მთავარი.

ამდენ ამბავში რატომ ამოარჩიეთ ეს ერთი?

რამდენჯერმე გაამახვილეთ ყურადღება.

არა, უცხო ენები ერთხელ ვთქვი. უცხოეთში განათლებაზე ვლაპარაკობდი და შეიძლება ეს მოგხვდათ ორჯერ ყურში და კიდევ ერთხელ გავიმეორებ, რაც მთავარია, პროფესიონალია, როგორც ამბობენ და როგორც თანაგუნდელები გვეუბნებიან და მენეჯერული გამოცდილება აქვს საუკეთესო და ამ კუთხით თავი აქვს გამოჩენილი. ეს იყო მთავარი განმსაზღვრელი, როდესაც მმართველმა პარტიამ გადაწყვიტა ამ ადამიანის დასახელება.

დღეს დაიხურა საგაზაფხულო სესია და შევაჯამოთ. ჯამში 6 თვე გამოვიდა. რას გამოყოფდით, პარლამენტის მთავარი მიღწევა ამ 6 თვის განმავლობაში რა იყო?

ძალიან ბევრი, 400-მდე კანონპროექტი დავამტკიცეთ საგაზაფხულო სესიაზე. რამდენიმე შემიძლია გამოვყო. ბოლო დროის მთავარი გამოწვევა არის ჭარბვალიანობა. ამასთან დაკავშირებით კონკრეტულ კერძო სესხებთან მიმართებით მივიღეთ კონკრეტული რეგულაციები, სადაც ისეთი კაბალური პირობები ვეღარ და აღარ იქნება, რაც ჩვენს მოსახლეობას აწუხებდა. სამწუხაროა, რომ 600 000-ზ ემეტ ადამიანს გაპრობლემებული აქვს თავისი ვალი. ასევე დაგროვებით პენსიაზე შემიძლია ვილაპარაკო.

ეს დღეს დამტკიცდა, საინტერესო თემაა, თუმცა სამწუხაროდ ვეღარ მოვასწრებთ საუბარს.

დრო რომ მქონდეს ძალიან ბევრს ვილაპარაკებდი. კონკრეტულ თემებზე, სამწუხაროდ, ვერ ვასწრებთ ხოლმე ეთერებში საუბარს. დაგროვებით პენსიაზე საუბარი არის ძალიან საინტერესო. საგადასახადო კოდექსში შეტანილ საშეღავათო პირობებზე, 5%-იდან 1%-მდე შემცირებაზე, ამაზეც შემიძლია ბევრი ვილაპარაკო, ასევე დეკლარაციის წარდგენის ახალ პირობებზე და ვალდებულებებზე ვილაპარაკო. „ნაბიჯი უკეთესი მომავლისაკენ“, ეს არის ჩვენ ოკუპირებულ ტერიტორიებთან დაკავშირებით გადადგმული ერთ-ერთი წარმატებული ნაბიჯი გრძელვადიან პერსპექტივაში და ახლო მომავალშიც კონკრეტულ შედეგებს მოიტანს და ძალიან ბევრია ასეთი. რაც ყველაზე მთავარია, ჩვენ გადაჭრით გადავწყვიტეთ, რომ მცირე მთავრობის კონცეფცია დაგვემტკიცებინა და მთავრობა ამ ფორმით შეგვერჩია. ამაზეც მიდის მთელი რიგი ინსინუაცია.

ამაზე ჩვენ ბევრი გვისაუბრია.

კი ბატონო, მაგრამ რაღაც ისე გამოდის, რომ ჩვენ ვერ ვუხსნით საზოგადოებას და ოპონენტები ცდილობენ, რომ ადამიანები მიზანმიმართულად შეცდომაში შეიყვანონ. აქ საუბარი არ არის მხოლოდ ხარჯების შემცირებაზე მთლიან შიდა პროდუქტთან დაკავშირებით. სახელმწიფოს ზოგადად აქვს დაახლოებით 10 მთავარი ფუნქცია და ამოცანა და არის 30-35-ზე მეტი ძირითადი დარგი, ეს მეცნიერებაც არის, ეს პრაქტიკაც არის, რომლებზეც შეგიძლია ცალ-ცალკე ისაუბრო და ცალ-ცალკე პრიორიტეტებად გამოყო. სახელმწიფოს შეგიძლია ამ დარგების, ამ მთავარი ფუნქციებისა და ამოცანების მიხედვით დაალაგო სამინისტროები და ამ მთავარ ფუნქციებსა და ამოცანებში ჩაშალო შემდეგ დარგები. ჩვენ წავედით იქით, რომ არა 20, 25, 19 და ასე შემდეგ დარგის მიხედვით გვქონდეს სამინისტრო, არამედ მთავარი ამოცანების მიხედვით და აქიდან დარგები ყოფილიყო სწორად ჩაშლილი და დარგებს ჰყოლოდა ყველას თავისი კურატორი მოადგილეები.  მენეჯერულად და ლოგიკურად ასე უკეთესად ლაგდება. ეს არის მსოფლიო პრაქტიკა, ეს არის მცირე მთავრობის კონცეფციის ერთ-ერთი მთავარი შემადგენელი კომპონენტი. ასევე მთლიან შიდა პროდუქტთან, მშპ-სთან მიმართებით 4,4%-ის ადმინისტრაციული ხარჯების შემცირება 3,9%-მდე, ეს არის ერთ-ერთი მთავარი სწორ გადაწყვეტილება. ნელ-ნელა ამ ყველაფერმა ასახვა უნდა ჰპოვოს თითოეულ მოქალაქეზე. რაც ყველაზე მთავარია, ჩვენი ამ გადაწყვეტილების მიზანია, რომ ამ გადაწყვეტილებამ უნდა იმოქმედოს თითოეულ მოქალაქეზე და სწრაფად პარლამენტისა და მთავრობის გადაწყვეტილება სწარაფად უნდა მივიდეს მოქალაქემდე. ამის ნაკლოვანებას გრძნობდა საზოგადოება, ამის გამოსწორების გზებზე ვიფიქრეთ და ასე გადავწყვიტეთ.

ვიდეო

კომენტარები ()

სხვა ინტერვიუები