16 ოქტომბერი 2018

„ქართული ოცნების“ საარჩევნო მოლოდინი

ინტერვიუ პარლამენტის თავმჯდომარესთან

ფარული ჩანაწერები, როგორც წინასაარჩევნო კამპანიის შემადგენელი ნაწილი და პოლიტიკური ომი ძალაუფლებისთვის. ზაზა ოქუაშვილის შემდეგ არჩევნებამდე 12 დღით ადრე ფარული ჩანაწერების მთავარ როლში პროკურატურის ყოფილი მაღალჩინოსანი მირზა სუბელიანი აღმოჩნდა. ვინ დგამს პოლიტიკურ სპექტაკლს ესკალაციის მიზნით და რა გათვლა აქვს ოპოზიციას წინასაარჩევნოდ, რა შედეგი მოუტანა ქვეყანას კოჰაბიტაციამ და რა იცის მმართველმა გუნდმა „ნაციონალური“ მთავრობის პროკურატურის მაღალჩინოსანზე, რომელიც საგამოძიებო უწყებაში ხელისუფლების შეცვლის შემდეგაც მუშაობდა. თემაზე თოქ-შოუ „პირისპირის“ წამყვანის, ირაკლი ჩიხლაძის კითხვებს პარლამენტის თავმჯდომარემ ირაკლი კობახიძემ უპასუხა.
 

ირაკლი კობახიძე

ირაკლი კობახიძე
ფოტო: საქართველოს პარლამენტი

წინასაარჩევნო კამპანიის ფარგლებში ჩვენ ყოველდღიურ რეჟიმში ვუსმენთ ჩანაწერებს, კომპრომატებს, ბრალდებებს, შემდეგ პასუხებს და ეს გრძელდება საკმაოდ დიდი ხანია. რა ხდება დღეს ქვეყანაში, შეიძლება დავარქვათ ამას კონკრეტული სახელი? რჩება შთაბეჭდილება, რომ პოლიტიკურ დღის წესრიგს 2012 წლის შემდეგაც ისევ „ნაციონალური მოძრაობა“ განსაზღვრავს. 

ხდება მარტივი რამ, არის წინასაარჩევნო პროცესი და ჩვენმა ჯერ კიდევ მთავარმა ოპონენტმა „ნაციონალურმა მოძრაობამ“ თავისი ტელევიზიის მეშვეობით განიზრახა კამპანიის ამ სახით წარმოება. თქვენ გახსოვთ, რომ ჩვენ შევთავაზეთ ჩვენს ოპონენტებს ევროპული ტიპის საარჩევნო კამპანიის წარმოება, თუმცა პასუხად მივიღეთ ეს, იყო ერთი სპექტაკლი, რომელიც დასრულდა წარუმატებლად მათთვის და ახლა დაიწყეს მეორე სპექტაკლი, ამას შეიძლება მოჰყვეს კიდევ არ ვიცი რა, მაგრამ მთავარი ისაა, რომ არის გარკვეული არასწორი მიმართულებით წარმართული წინასაარჩევნო კამპანია. ნაცვლად იმისა, რომ საპრეზიდენტო კანდიდატებმა ისაუბრონ საკუთარ ხედვაზე, როგორ წარმოუდგენიათ მათ მონაწილეობა საპრეზიდენტო არჩევნებში და შემდეგ როგორ წარმოუდგენიათ საკუთარი მოღვაწეობა პრეზიდენტის არჩევის შემთხვევაში პრეზიდენტის პოსტზე, ამის ნაცვლად ჩვენ ვიღებთ შავ პიარს. ვხედავთ, რომ ყოველდღიურ რეჟიმში წარიმართება ასეთი სახით კამპანია, განსაკუთრებით ჩვენ მიერ მხარდაჭერილი კანდიდატის წინააღმდეგ შეურაცხყოფა, ყველანაირი ფორმით წარმოებული შავი პიარი. ეს არის, რაც იყო დამახასიათებელი ამ პოლიტიკური ძალისთვის 2012 წლამდე, როდესაც ისინი იყვნენ ხელისუფლებაში. მხოლოდ ასეთი შავი ფორმებით შეუძლიათ მათ მოქმედება და იგივეს აგრძელებენ ისინი ახლა უკვე ოპოზიციაში.

თუმცა, ჩვენ რასაც ვხედავთ ეს ცოტა უჩვეულოა რიგითი ამომრჩევლისთვის, იმიტომ რომ, გვახსოვს 2012 წლამდე რაც ხდებოდა ქვეყანაში, პირიქით იყო ყველაფერი. ანუ, ოპოზიციის საარჩევნო კამპანიის წინააღმდეგ გამოდიოდა მაშინდელი ხელისუფლება, ქვებით დევნიდა „ოცნების“ აქტივს და ასე შემდეგ. დღეს პირიქითაა, თქვენ გიწევთ იმის თქმა და განმარტება, რომ საერთაშორისო საზოგადოებას მიაწვდით ინფორმაციას თუ რამდენად რთულ ვითარებაში მიმდინარეობს წინასაარჩევნო კამპანია. ალბათ, პირველ რიგში, ამ პროცესების პარალელურად როდესაც ყოველდღიურ რეჟიმში გვესმის სახელისუფლებო გუნდის განცხადებები, ჩვენ 28 ოქტომბერს დამაჯერებლად მოვიგებთ არჩევნებს და თუ არ ვცდები თქვენი ფრაზაა „დაგასრულებთ“, რითაც „ნაციონალური მოძრაობას“ მიმართავთ, ამ ჩანაწერებმა არ დააზარალა თქვენი წინასაარჩევნო კამპანია, დღესაც იგივე განწყობა გაქვთ და ფიქრობთ, რომ არჩევნებში სალომე ზურაბიშვილი გაიმარჯვებს?

რა თქმა უნდა, მთლიანობაში მთავარი არის სიმართლე, მთავარი არის სინამდვილე, რომელიც არსებობს, ერთი არის ნამდვილი სინამდვილე და მეორე - ვირტუალური სინამდვილის შექმნის მცდელობა, მაგრამ თუ სიმართლე არის ერთი, ვერანაირი ვირტუალური საშუალებებით ამას ვერ დაამახინჯებ და ვერ შეცვლი. რეალურად, როდესაც საუბარია „ბიზნესის რეკეტზე“ და ასეთ გადაცდომებზე, დღეს საზოგადოებაში ყველა ხედავს, რომ ბიზნესი აბსოლუტურად თავისუფალია და ყველას აქვს საკუთარი სამეწარმეო საქმიანობის, ბიზნეს საქმიანობის განხორციელების სრული შესაძლებლობა და ბიზნესრეკეტის არც ერთი პრეცედენტი არ არსებობს. კიდევ ერთხელ გავიხსენებ რა ხდებოდა მანამდე, რატომ იქმნებოდა გარკვეული აღქმა საზოგადოებაში. იმიტომ იქმნებოდა ასეთი აღქმა რომ, რეალურად კონკრეტული ფაქტების თაობაზე ინფორმაცია არსებობდა საზოგადოებაში. მე შეგახსენებთ მარტივ სტატისტიკას, რომელიც არაერთხელ მოვიყვანე ამ დღეების განმავლობაში, ათი ათასმა ადამიანმა „აჩუქა“ თავისი ქონება სახელმწიფოს. ანუ, სულ მცირე 10 000 ადამიანი იყო ასეთი და ეს არის ყოველი მეასე ოჯახი, რომელსაც ამ ფორმით წაართვეს ქონება „ნაციონალური მოძრაობის“ დროს „ნაცმოძრაობის“ წარმომადგენლებმა. ასეთ დროს, ბუნებრივია, აღქმა ძალიან მარტივად ყალიბდება. ვერანაირი ვირტუალური მეთოდებით ამ აღქმას ვერ შეცვლი, პირიქით. თქვენ გახსოვთ, რომ მაშინ სამი ნაციონალური არხი იყო „ნაცმოძრაობის“ ხელში. ჯერ „რუსთავი 2“ წაართვეს კანონიერ მესაკუთრეს, „იმედი“ წაართვეს კანონიერ მესაკუთრეს, მიითვისეს მთლიანად „პირველი არხი“ და ამ პირობებშიც კი ვერ ცვლიდნენ ისინი აღქმას. იმიტომ რომ, როცა 10 000 კაცი საუბრობს საკუთარ გაჭირვებაზე, საკუთარ პრობლემაზე, დაყაჩაღებაზე, საქართველო პატარა ქვეყანაა და ბუნებრივია მთელი საქართველო იგებს ამის თაობაზე. როდესაც ასეთი რამ არ ხდება და ერთი პრეცედენტიც არ არის, ვერანაირი ხელოვნური ოქუაშვილის თუ სხვა ჩანაწერებით ამ აღქმას ვერ გააჩენ. აბსოლუტურად იგივე ეხება მეორე სპექტაკლს, რომელიც დაიწყო „ნაცმოძრაობამ“. კიდევ ერთხელ გავიმეორებ, სადაც არ არის გადაცდომა და დანაშაული, იქ ვერანაირი კომპრომატი ხელოვნურად ვერ შეიქმნება. უნდა არსებობდეს სინამდვილე და ამ სინამდვილეს შეიძლება მოჰყვეს გარკვეული პიარული შეფუთვა, მაგრამ თუ არ არის, ცარიელ ადგილზე ამას ვერ გააკეთებ.

მე ცოტა მოგვიანებით ვაპირებდი ოქუაშვილის თემაზე საუბარს, თუმცა ახლა დაგისვამთ კითხვას, რომელიც, ალბათ, საზოგადოების დიდ ნაწილსაც აინტერესებს: როგორ მოახერხა „ქართულმა ოცნებამ“, რომ ადამიანი, ბიზნესმენი, რომელიც დევნილი იყო ქვეყნიდან და 2010 წლის შემდეგ დაუბრუნდა თავის ბიზნესი, ტელევიზია, დღეს არის იმ ადამიანთან, ვინც თავის დროზე გააკულაკა და ასე ცდილობს მხარი დაუჭიროს სააკაშვილის საპრეზიდენტო კანდიდატს, გრიგოლ ვაშაძეს და ხელისუფლება სახლში გაისტუმროს? ეს განცხადებები გვესმის „რუსთავი 2“-ის ეთერიდან და რა მოხდა ასეთი, რის გამოც მადლობები შეიცვალა მუქარებით და ის არის დღეს ერთ-ერთი მთავარი ოპოზიციური ძალის მხარდამჭერი? ასევე, როგორც ვიცი, ცოტა ხნის წინ „იბერიამაც“ შეაჩერა მაუწყებლობა.

კარგი კითხვაა, თუმცა აქ ყველასთვის ცხადია, რეალურად რაშია საქმე. თქვენ სწორად აღნიშნეთ, ეს ადამიანი მადლობას უხდიდა „ქართულ ოცნებას“ იმისთვის, რომ მან სწორედ „ქართული ოცნების“ ხელისუფლების ხელშეწყობით სრულიად უანგაროდ, ყოველგვარი რაიმე მოთხოვნის გარეშე დაიბრუნა საკუთარი ბიზნესი, დაიბრუნა საკუთარი ტელევიზია. ეს ყველაფერი სწორედ 2012 წლის დემოკრატიული გარდატეხის საფუძველზე მოხდა და მას არაერთხელ აქვს ეს აღნიშნული საჯაროდ. თუმცა შემდეგ მოხდა რა, ამ ადამიანმა დააგროვა ვალი ბიუჯეტის წინაშე, ხალხის წინაშე 50 მილიონის ოდენობით და იმისათვის რომ ეს ფული სახელმწიფო ბიუჯეტისათვის არ გადაეხადა და არ დაებრუნებინა ხალხის კუთვნილი ფული, მან მოკავშირედ გაიხადა „ნაციონალური მოძრაობა“, მისი კუთვნილი ტელევიზია და ამ გზით სცადა ვალისგან თავის დაძვრენა. თუმცა ჩვენ ვართ სახელმწიფო, ჩვენ ვართ ხელისუფლება და ჩვენი პასუხისმგებლობაა ერთი მხრივ, ბიზნესის თავისუფლების უზრუნველყოფა და ეს არის სათანადოდ უზრუნველყოფილი ჩვენს ქვეყანაში, რეალურად ჩვენი ქვეყანა ზუსტად თავისუფალი ბიზნეს გარემოთი გამოირჩევა, მაგრამ ამასთანავე ჩვენ ვართ პასუხისმგებელი იმაზე, რომ ყველა ბიზნესმენმა გადაიხადოს ის გადასახადი, რომელიც ეკუთვნის ხალხს. ბუნებრივია, როდესაც პოლიტიკური ინსტრუმენტები გამოიყენება ვალისგან თავის დასაძვრენად, ამას სჭირდება სათანადო პასუხი და ამას მოჰყვა კიდეც რეაქცია.

თუმცა პოლიტიკურ ინსტრუმენტამდე იყო მთელი რიგი პროცესი. ალბათ, ბევრი წლის განმავლობაში დაგროვდა ეს ვალი და ხომ არ იკვეთება ცალკეული მაღალჩინოსნების გადაცდომები თუნდაც? იმიტომ რომ, თქვენ გაქვთ ინფორმაცია სხვა ბიზნესები რა დღეში არიან დღეს ქვეყანაში, აქვთ თუ არა სახელმწიფოს ვალი და უწყობს თუ არა სახელმწიფო მათ ხელს, რომ ბიზნესი განავითარონ, გააგრძელონ და შემდეგ დააბრუნონ ვალი, თუ ოქუაშვილი იყო ერთადერთი, რომელსაც ამდენი მილიონი ჰქონდა სახელმწიფოს წინაშე ვალი და მისცეს ამის შესაძლებლობა?

თავისთავად ის, რომ 11-ჯერ მოხდა ამ ვალის გადავადება, ბუნებრივია, გარკვეულ კითხვებს აჩენს , რატომ იყო ასეთი ლოიალური მის მიმართ სახელმწიფოს კონკრეტული უწყება, ეს არის ზოგადი კითხვა, მაგრამ არავითარი კითხვა არ ისმება ბიზნესის თავისუფლებასთან დაკავშირებით. ეს არის ის კითხვა, რომელსაც ძალიან მარტივად გაეცა პასუხი. მოვისმინეთ აბსოლუტურად გაუგებარი ჩანაწერები, სადაც იყო საუბარი რაღაც ვირტუალურ მოვლენებზე, საუბარი იყო იმაზე, რომ თურმე 4 თითით აჩვენეს მას, რომ 4 მილიონი უნდა შეეტანა. ეს ჩანაწერები ყველაფერთან ერთად კომიკურიცაა. 4 თითი რატომ უნდა აჩვენო  ადამიანს?! ერთი ვარიანტია, რომ გეშინია საკუთარ სახლში მოგისმინონ და ეს ღიმილის მომგვრელია, მეორე ვარიანტი რა არის, ესეც არ ვიცი. რეალურად, აბსოლუტურად კომიკური სახე შეიძინა იმ ჩანაწერებმა, რომელიც დიდი ამბით გაავრცელა ნიკა გვარამიამ, „ნაცმოძრაობის“ პარტიულმა ტელევიზიამ და ისევე მალევე ჩაიფუშა ეს სპექტაკლი, როგორც მალევე დაიდგა. ასევე მოხდება ყველა სხვა სპექტაკლის შემთხვევაში. რატომ? იმიტომ რომ, მთავარი თეზისი რა არის - სადაც არის დანაშაული, იქ, ბუნებრივია, არის აღშფოთების საფუძველი, მაგრამ სადაც არ არის დანაშაული და გადაცდომა, იქ ხელოვნურად კომპრომატს ვერ შექმნი. ჩვენი ვეფუძნებით ღირებულებას,რომ უზრუნველყოფილი უნდა იყოს დემოკრატია, ბიზნესის თავისუფლება, ადამიანის უფლებები და ამით არის გამსჭვალული მთლიანად სახელმწიფო სისტემა. ეს არის ჩვენი მთავარი ღირებულება და ამაზე დგას დღეს ჩვენი ხელისუფლება 2012 წლიდან მოყოლებული და სადაც ასეთი ღირებულებებით მოქმედებს ხელისუფლება, იქ შეუძლებელია ცარიელ ადგილზე რაიმე კომპრომატის ხელოვნურად შექმნა, ეს არის მთავარი ამ ყველაფერში.   

ორივე ჩანაწერში, ვგულისხმობ სუბელიანისა და ოქუაშვილის ჩანაწერებს, ფიგურებს ყოფილი მთავარი პროკურორის, ფარცხალაძის გვარი. მთელი ამ წლების განმავლობაში და წინასაარჩევნო კამპანიის მიმდინარეობისას მესამე სექტორიც კი კიდევ უფრო აქტიურად საუბრობს, რომ ფარცხალაძის ტყვეობაშია „ქართული ოცნება“ და რეალურად, ის არის ადამიანი, რომელიც „ოცნების“  „შავ საქმეებს“ ასრულებს. შეგიძლიათ გვითხრათ, რა კავშირი აქვს ფარცხალაძეს „ქართულ ოცნებასთან“ დღეს?

არავითარი კავშირი არ აქვს, ეს არის მარტივი პიარული ტრიუკი. სხვა თემებზეც როცა არის საუბარი, მაგალითად იგივე სასამართლოზე, შინაარსზე ხომ არავინ გვესაუბრება და სასამართლოში შინაარსში გვაქვს იმხელა პროგრესი, რომ მათთვის ამაზე საუბარი მომგებიანი არ არის. სტატისტიკას რომ ჩახედოთ, გნებავთ სისხლის სამართალში, გნებავთ სამოქალაქო სამართალში, ადმინისტრაციულ სამართალში, არის ცა და დედამიწა, იმასთან შედარებით, რაც ხდებოდა 2012 წლამდე. იყო აბსოლუტურად გარყვნილი სისტემა,  რომელიც მთლიანად ექვემდებარებოდა მაშინდელ იუსტიციის მინისტრს და დღეს სისტემა არის აბსოლუტურად შეცვლილი, რაც პირდაპირ აისახება კონკრეტულად იმ ადამიანების უფლებების დაცვის მდგომარეობაზე, რომლებსაც აქვთ შეხება სასამართლოსთან. რადიკალურად არის შეცვლილი პოზიტიურისკენ მდგომარეობა სასამართლოში და როდესაც საუბარია საუბარია სასამართლოსთან დაკავშირებით და როდესაც უნდათ ჩირქი მოსცხონ სასამართლოს, ახსენებენ კონკრეტულ სახელსა და გვარს, ეს არის მარტივი პიარული ტრიუკი. აქაც, ვერაფერს კონკრეტულს ვერ ამბობენ, ბიზნესის თავისუფლების შეზღუდვასთან დაკავშირებით და იქმნება, ასე ვთქვათ, გარკვეული მითოლოგიური პერსონაჟი, რომელსაც უნდა დაუკავშირდეს კონკრეტული აღქმა და აქითკენ მიდის მუშაობა.

თუ ეს ადამიანი, ვთქვათ ფარცხალაძე, არის მითოლოგიური ფიგურა და ის სჭირდება ოპოზიციას, როდესაც დაიწყო სკანდალური ჩანაწერების მოკვლევა, სადაც საუბარი იყო სარდაფზე, წამებაზე და ასე შემდეგ, დაიწყო თუ არა მან თანამშრომლობა პროკურატურასთან. როგორც ვიცი, ის არ დაუბარებიათ დაკითხვაზე და რატომ? ესეც შეიძლება აჩენდეს ეჭვებს. ამ საქმის ფიგურანტს, იგივე ყიფიანს რამდენჯერმე მოუწია პროკურატურაში მისვლა და ამას აქვს ახსნა?

ამაზე თავის დროზე ჩვენ ძალიან მკაფიო პასუხი გავეცით. როდესაც საუბარია გარკვეულ ბრალდებაზე, ჯერ უნდა დამტკიცდეს ამ ბრალდების სერიოზულობა. აქამდეც კი ვერ მივიდა ნიკა გვარამია თავისი ფარული ჩანაწერებით. შესაბამისად, მეორე ეტაპზე გადასვლის საჭიროება არსებობს თუ არა, ამაზე ბუნებრივია შესაბამის პასუხს გამოძიება გასცემს. ჯერ დამტკიცდეს სერიოზულობა და რასაც ჩვენ ვხედავთ, არანაირი ფორმით ამ გამოძიების საჭიროების მინიშნებაც კი არ არსებობს, სერიოზულობის ნიშან-წყალიც  ვერ აღმოჩნდა რეალურად.

ანუ, ფარცხალაძის დაკითხვის აუცილებლობა დღეს არ არსებობს, მიუხედავად იმისა, რომ ლევან ყიფიანი ორჯერ დაკითხეს?

ამის საჭიროება იარსებებდა იმ შემთხვევაში, რომ ყიფიანის დაკითხვიდან გამომდინარე გამოჩენილიყო რაღაც სერიოზულობის ნიშან-წყალი ამ საქმეში. ეს არის ძალიან მარტივი პასუხი.

გადავიდეთ მთავარ საკითხზე, ეს არის ხორავას ქუჩის საქმე და ის ჩანაწერები, რომელიც გამოქვეყნდა. არის ჩანაწერები, რომელიც პროკურატურამ შემოგვთავაზა და არის ჩანაწერები, რომელიც გვაჩვენა „რუსთავი 2“-მა. „რუსთავი 2“-ის ჩანაწერების კონტექსტში პროკურატურამაც გაავრცელა განცხადება, რომ მოკვლევა დაწყებული იყო ორი დღით ადრე. ანუ, ყველას ჰქონდა ინფორმაცია, რომ ეს ჩანაწერი გამოქვეყნდებოდა. ამ მიმართულებით საზოგადოების ნაწილს უჩნდება კითხვა, რატომ არ არის დაცული დღეს კონკრეტული ადამიანის, თუნდაც პატიმრის უფლებები, როგორ ჟონავს ინფორმაცია? 2012 წლამდე ყოველთვის ვსაუბრობდით, რომ გვისმენდნენ და ამასთან დაკავშირებით უამრავი კამპანია იყო, დღეს იგივე ძალის მხრიდან ისევ ჩანაწერების ომი დაიწყო. ეს შესაძლოა იყოს პოლიტიკური ომი კომპრომატებით, მაგრამ დღეს დაცული ვართ ჩვენს ქვეყანაში, დაცულები არიან ადამიანები მოსმენისგან? ამ შემთხვევაში გამოდის, რომ ალბათ ხელისუფლებასაც უსმენს ოპოზიცია.

მე უკვე აღვნიშნე, რომ ეს პოლიტიკური ძალა თავისი სტილიდან ვერ გამოდის. ვერ ახერხებენ საკუთარი სტილის შეცვლას და ალბათ, ვერც ვერასდროს მოახერხებენ, იმიტომ რომ, ფარული ჩანაწერები ეს არის მათ სულში გამჯდარი მოვლენა. რატომ მოხდა ეს ყველაფერი, ამაზე, რა თქმა უნდა, საჭიროა პასუხების გაცემა და აუცილებელია გამოძიების წარმოება. ერთის მხრივ, საქმე ეხება პატიმრის უფლებებს, მეორე მხრივ, საქმე ეხება პარლამენტის წევრს, რომლის უფლებები ამ შემთხვევაში განსაკუთრებულად არის დაცული კონსტიტუციის დონეზე, აქიდან გამომდინარე საჭიროა ამ საკითხის შესწავლა და იმის გარკვევა, თუ როგორ მოხვდა ეს ჩანაწერი „რუსთავი 2“-ში. ამასთან დაკავშირებით, იმედია, რომ მალევე გასცემს გამოძიება პასუხს.

ორივე ჩანაწერში  ასევე საუბარია კალანდიაზე, რომელიც ხორავას ქუჩის საქმეში ფიგურირებს და მირზა სუბელიანი ამბობს, თუ ამ ადამიანის დაკავება მოხდება, მთავარი საქმე ჩამოიშლება. ის ასევე ამბობს, რომ მე მქონდა შეთანხმება და პირობა მომცეს, რომ მხოლოდ ერთი წელი მომიწევდა ციხეში ყოფნა. ორივე ჩანაწერში იყო ასეთი შინაარსის განცხადება. თუ დაინტერესდა პარლამენტის თავმჯდომარე, ვის გულისხმობს, ვისგან შეიძლება ჰქონოდა მას გარანტიები, რომ ერთი წლის შემდეგ ციხეს დატოვებდა?

რამდენადაც მე მოვისმინე, პირობაზე იქ საუბარი არ ყოფილა. ნახსენები არის, რა თქმა უნდა, ერთი წელი ამ ჩანაწერში, მაგრამ პირობაზე, როგორც ასეთი, საუბარი არ არის. ბატონი მირზა სუბელიანი თვითონ საუბრობს ამ ვადაზე. რაც შეხება ხორავას საქმეს, ამ საქმესთან დაკავშირებით იყო ნული პოლიტიკური ინტერესი, შეიქმნა დროებითი საგამოძიებო კომისია და ჩვენ ეს კომისია ჩავაბარეთ ოპოზიციას. აბსოლუტურად უპრეცედენტო რამ მოხდა ჩვენი პარლამენტარიზმის ისტორიაში, თქვენ გახსოვთ, რომ გირგვლიანის საქმეზეც კი არ შექმნეს თავის დროზე საგამოძიებო კომისია ზუსტად ამ ადამიანებმა, გვარამიებმა და მისმა მეგობრებმა. გავაკეთეთ უპრეცედენტო რამ და ვთქვით, რომ არანაირი პოლიტიკური ინტერესი არ არსებობს, არც ხელის დაფარების, არც სხვა რაიმესი და საგამოძიები კომისიის მუშაობის შედეგად რეალურად დადგინდა რა: რა ვერსიაც ჰქონდა პროკურატურას ხორავას საქმესთან დაკავშირებით, ზუსტად იგივე ვერსია დადო რეალურად დროებითმა საგამოძიებო კომისიამ. მაშინ პროკურატურის მიმართ მთავარი პრეტენზია მდგომარეობდა იმაში, რომ პროკურატურამ 100%-იანი უტყუარობით ვერ დაადგინა თუ ვინ იყო სასიკვდილო ჭრილობის მიმყენებელი, ეს ვერ დაადგინა ვერც საგამოძიებო კომისიამ და რატომ არ ეკითხებიან საგამოძიებო კომისიას, რატომ ვერ მოხერხდა 100%-ანი მტკიცებულების დონეზე ამის დადგენა, ხომ არ არსებობდა ობიექტური გარემოება, რომელიც ხელს უშლიდა ამ ყველაფრის დადგენას? რეალურად აქ ყველაფერი ცხადზე უცხადესია, არავის არავისთვის ხელი არ დაუფარებია, პროკურატურამ აწარმოა თავისი გამოძიება, იყო ობიექტური გარემოება, რამაც 100%-იანი სიზუსტით ვერ უზრუნველყო ჭეშმარიტების დადგენა.

თქვენ დაგრჩათ თუ არა ამ პროცესში კითხვები? პარლამენტის თავმჯდომარეს პასუხგაუცემელი კითხვები აქვს, როცა კომისიამ მუშაობა დაასრულა?

პასუხგაუცემელი კითხვა რჩება იგივე, ვინ არის სასიკვდილო ჭრილობის მიმყენებელი პირი. სამწუხაროდ ამ კითხვას ობიექტური მიზეზების გამო ვერ გასცა პასუხი ვერც პროკურატურამ 100%-იანი სიზუსტით, მაგრამ არსებობს ვერსია, რომელიც გამყარებულია 90-95%-იანი მტკიცებულებით.

ჩვენ შეგვიძლია ვისაუბროთ იმ სუბიექტურ მიზეზებზე, რომელზეც ახლა თქვენ საუბრობთ?

მთავარი მიზეზი, რა თქმა უნდა, არის ჩვენებების არარსებობა. ეს არის უმთავრესი მიზეზი. იქ იყო არაერთი ადამიანი, რომელიც პირდაპირი თუ არაპირდაპირი ფორმით იყო ჩართული ამ ინციდენტში, ამ სამწუხარო მოვლენებში, თუმცა ბევრი ადამიანი თავს არიდებს ჩვენების მიცემას ან არ ვარ დარწმუნებული, რომ ისინი იძლევიან სწორ ჩვენებას. ეს არის მთავარი გარემოება, რომელიც ხელს უშლის ობიექტური ჭეშმარიტების დადგენას. ჩვენ წარსულს ჩავაბარეთ იმ მეთოდები, რომელიც უზრუნველყოფდა საქართველოში დანაშაულთა 100%-იან გახსნას. გახსოვთ, 99,9% იყო დანაშაულის გახსნის მაჩვენებელი, იყო შემთხვევები, როდესაც ცოცხალი იყო ადამიანი და მისი მკვლელობის გამო უფარდებდნენ პირს სასჯელს, ასეთი რაღაცები ხდებოდა და ჩვენ ეს ყველაფერი წარსულს ჩავაბარეთ. რა თქმა უნდა, ამას აქვს თავისი ფასი და ფასი მათ შორის მდგომარეობს იმაში, რომ ამ კონკრეტულ შემთხვევაში 100%-იანი სიზუსტით ვერ მოხერხდა ჭეშმარიტების დადგენა. თუმცა გრძელდება პროცესი, ესეც ძალიან მნიშვნელოვანია. ჯერ საქმე დასრულებულია პირველი ინსტანციის დონეზე და განხილვა გრძელდება მეორე და მესამე ინსტანციის დონეზე. იქ თავისი ვადები აქვს გამოძიებასაც, სასამართლოსაც და არსებობს იმის ალბათობა, რომ შესაძლოა მეორე ან მესამე ინსტანციის დონეზე საბოლოოდ სრულად მოეფინოს ნათელი ამ საქმეს. ამისთვის ყველაფერი უნდა გაკეთდეს და ბუნებრივია, პარლამენტიც იქნება ამ საქმეში ბოლომდე ჩართული.  

პარლამენტის როლზე მინდა გკითხოთ ფარული ჩანაწერების კონტექსტშიც. დღეს აკაკი ზოიძე ამბობდა, რომ შესაძლოა დღის წესრიგში დადგეს საპარლამენტო საგამოძიებო კომისიის შექმნა ფარულ ჩანაწერებთან დაკავშირებით. რეალურია ამაზე მსჯელობა, რომ დაიწყოს?

თეორიული ალბათობა ყოველთვის ყველაფერზე არსებობს.

საჭიროება არსებობს?

ამ ეტაპზე მე ვერ ვხედავ ამის საჭიროებას. როგორც იყო ოქუაშვილის შემთხვევაში, ათასგვარი მოთხოვნა გვესმოდა ჩვენ და ვნახეთ, რომ ერთი თვე ატრიალებდნენ ერთი და იგივე ჩანაწერებს გაუგებარ ადამიანებს შორის, ხოლო ერთი თვის თავზე მთელმა საზოგადოებამ, ყველამ ერთად გავიგეთ, რომ იყო აბსოლუტური ბლეფი. აქაც ვნახოთ, რა არის, როგორ არის. ამ ეტაპზე არანაირი საჭიროება ასეთი კომისიის შექმნის, საპარლამენტო ჩარევის, არ იკვეთება, ვნახოთ როგორ გაგრძელდება მოვლენები.

ჩვენ სუბელიანზე ვსაუბრობდით და მე გადაცემის დასაწყისშიც აღვნიშნე, ის მუშაობდა „ნაციონალური მოძრაობის“ დროს პროკურატურაში, შემდეგ დარჩა და საკმაოდ წარმატებით გააგრძელა მუშაობა იმ მოვლენებამდე, რაც გასულ წელს, დეკემბერში მოხდა. აქვე მინდა გაგახსენოთ კახი კახიშვილის ძველი კომენტარი, რომელიც 2 წლითაა დათარიღებული და ძირითადი აქცენტი კოაბიტაციის შედეგებზეა გამახვილებული. კახიშვილი ერთ-ერთ ინტერვიუში უცნაურ ტენდენციაზე საუბრობს, რომლის მიხედვითაც წლების განმავლობაში პოლიტიკურ დაკვეთებზე მომუშავე პროკურორები ისევ მაღალ თანამდებობებზე ინიშნებოდნენ. ,,სასჯელაღსრულებაში საერთოდ კატასტროფაა. გენინსპექციის უფროსად დაინიშნა სუბელიანი, ყოფილი პროკურორი, რომლის სახელი 26 მაისის საქმეებს უკავშირდება. ის უმოწყალოდ ყრიდა ხალხს ციხეში“, - ეს მისი ციტატაა. „ოცნების“ ამომრჩეველი სწორედ კოჰაბიტაციის ნაწილში იყო თავიდანვე განაწყენებული და დღეს ეს ნაწილი უკვე ამბობს, ეს იყო კოჰაბიტაცია ბუმერანგის ეფექტით. რას უპასუხებთ თქვენს ამომრჩეველს, რომელიც ამბობს, რომ შემსრულებლები ისევ დარჩნენ და სისტემაში ისევ იყო პრობლემები?

იყო სერიოზული დილემა თავის დროზე, როდესაც 2012 წელს ხელისუფლება შეიცვალა. დაახლოებით 100 000 ადამიანი მუშაობდა საჯარო სექტორში და რა თქმა უნდა, ეს იყო დაკავშირებული გარკვეულ გამოწვევებთან. იგივე როცა სასამართლოზეა საუბარი, იგივე პროკურატურაზე, შინაგან საქმეთა სამინისტროზე, სხვა სამართალდამცავ სტრუქტურებზე, თქვენ იცით და გახსოვთ, რომ აბსოლუტურად პოლიტიზირებული იყო თითოეული მათგანი. როდესაც რეჟიმი მოქმედებდა თავისი ძალიან მძიმე მეთოდებით და როდესაც კონკრეტული დანაშაულები იგეგმებოდა და ხორციელდებოდა, ძალიან ბევრი ადამიანი იყო ამ ყველაფერში ჩართული. ჯამში, ათასობით ადამიანი იყო ამ ყველაფერში ჩართული. რა თქმა უნდა, ჩვენ დავდექით სერიოზული დილემის წინაშე. თქვენ გახსოვთ, 2004 წელს, როდესაც ხელისუფლება შეიცვალა, მოხდა ერთიანი წმენდა იმ ხელისუფლების ვერტიკალისა, რომელიც იყო ჩამოყალიბებული შევარდნაძის პერიოდში. იყო სერიოზული დილემა, ან მთლიანად უნდა გაწმენდილიყო ეს ყველაფერი და ამას ჰქონდა თავისი ძალიან მძიმე ნეგატიური მხარე, ან იყო მეორე ვარიანტი, რომ არსებული კონტიგენტის პირობებში, რა თქმა უნდა, აქ საუბარი არ არის, ვისაც კონკრეტულ მძიმე დანაშაულში მიუძღოდა ბრალი, მას არ უნდა შევხებოდით, მაგრამ არსებითად შენარჩუნდა ძირითადი კონტიგენტი საჯარო სტრუქტურებში ისე, რომ რეალურად შეიცვალა ამ სტრუქტურების მუშაობის შინაარსი. ეს იყო მთავარი მიღწევა. თავის დროზე ბევრს წარმოუდგენლადაც ეჩვენებოდა, როგორ შეიძლებოდა მაგალითად ის 25 000 კაცი დაეტოვებინა ხელისუფლებას შინაგან საქმეთა სამინისტროში და სამინისტროს საქმიანობა აპოლიტიკური ფორმით გაგრძელებულიყო. თუმცა თქვენ იცით, რომ ადამიანების ქცევას განსაზღვრავს სისტემა. პირიქითაც არის-ხოლმე, მაგრამ მთავარია, რომ თუ სისტემა მუშაობს სწორად, ადამიანებიც მოქმედებენ სწორად და ეს აჩვენა ზუსტად 2012 წლის გარდატეხამ. მიუხედავად იმისა, რომ უამრავი ადამიანი დარჩა საკუთარ პოზიციებზე, უმეტესობა ადამიანებისა, რომლებიც საჯარო სექტორში იყვნენ დასაქმებულები, დარჩნენ საკუთარ პოზიციებზე, მათი ქცევა შეიცვალა და რეალურად სისტემის შინაარსი მთლიანობაში შეიცვალა. ეს იყო ერთ-ერთი უმთავრესი მიღწევა, თუმცა, რა თქმა უნდა, კოჰაბიტაცია არის დაკავშირებული თავის გამოწვევებთან, თავის სირთულეებთან, თავის პრობლემებთან. იგივე, როდესაც გარკვეული ხარვეზები არსებობს, ამასაც ხშირად უკავშირებენ კოჰაბიტაციას და ამასაც შეიძლება ჰქონდეს თავისი ობიექტური საფუძველი. თუმცა კიდევ ერთხელ აღვნიშნავ, რომ ეს იყო სერიოზული დილემა ჩვენს წინაშე და საბოლოო ჯამში, ეს დილემა სწორი ფორმით გადავწყვიტეთ.

თქვენ ცოტა სხვა კონტექსტში ახსენეთ გირგვლიანის საქმე და მე მინდა ოდნავ სხვა კონტექსტში შევახსენო მაყურებელს. დღეს საქართველოს პრეზიდენტმა გამართა ბრიფინგი და მისი განცხადების ციტირებას მოვახდენ: „ტრაგიკულია, რომ ათი წლის თავზე, იმ ტრაგედიიდან, რომელმაც შეძრა ქართული საზოგადოება, დღეს დედაქალაქის მთავარ გამზირზე, იგივე მოთხოვნით, იგივე ტრაგედიის საზოგადოებისთვის გაზიარებით დგას შვილმკვდარი მშობელი“. რატომ ავლებს ოპოზიცია და ახლა უკვე პრეზიდენტი პარალელს და ხორავას ქუჩის ამბავს აიგივებს გირგვლიანის საქმესთან?

ჩვენ არაერთხელ ვთქვით, რომ „ნაცმოძრაობას“ აქვს იაფფასიანი მცდელობა პარალელი გაავლოს ამ ორ საქმეს შორის და ძალიან სამწუხაროა, რომ იგივე იაფფასიანი მცდელობა ჰქონდა ადამიანს, რომელიც ჯერ კიდევ იწოდება საქართველოს პრეზიდენტად და შემდეგი ორი თვის განმავლობაში უნდა ატაროს ეს სტატუსი. ეს არის ძალიან სამწუხარო მოვლენა. ყველას გვახსოვს რა იყო გირგვლიანის საქმე. ეს იყო ხელისუფლების შეთქმულება ერთი ადამიანის წინააღმდეგ. ეს იყო მკვლელობა, რომელიც ჩაიდინა მაშინდელმა მანქანამ. ეს მკვლელობა რეჟიმმა ჩაიდინა და ბოლომდე აფარებდნენ ხელს ამ მკვლელობის შემსრულებლებს და შემდეგ სხვადასხვა ფორმით ხდებოდა ამ ყველაფრის შეფუთვა. ამ ყველაფერში იყო ჩართული, მათ შორის „ნაცმოძრაობის“ ყველა პარტიული ტელევიზია. ეს იყო უმძიმესი ფაქტი და არანაირი კავშირი გირგვლიანის საქმესა და ხორავას საქმეს შორის არ არსებობს. ეს არის იაფფასიანი მცდელობა და სამწუხაროა, რომ დღეს გიორგი მარგველაშვილი ჩაერთო ამ იაფფასიან კამპანიაში. ამაზე დამატებითი კომენტარის გაკეთება არის შეუძლებელი.

თუმცა გირგვლიანის თემა იყო, ალბათ, ერთ-ერთი მიზეზი თავის დროზე, როდესაც „იმედის“ წინააღმდეგ გაჩნდა მაშინდელი ხელისუფლების აგრესია და ამ ტელევიზიამ მიიღო ის შედეგი, რაც ყველამ ვნახეთ - წლების განმავლობაში იყო ოკუპირებული.       

გირგვლიანის საქმე რა იყო, ყველამ ვიცით. ეს იყო მკვლელობა, რომელიც ჩაიდინა რეჟიმმა და რეჟიმმა დააფარა ხელი ამ მკვლელობას და დღეს გვაქვს ეს იაფფასიანი მცდელობა. გარდა ამისა, შეგახსენებთ, რომ როდესაც დადგა განაჩენი სააკაშვილის წინააღმდეგ გირგვლიანის მკვლელების შეწყალების საქმესთან დაკავშირებით, მარგველაშვილი იყო პირველი, რომელმაც ხელი დააფარა მიხეილს სააკაშვილს. ამას რა შეფასება უნდა მიეცეს, არ ვიცი.

რადგან შეწყალება ახსენეთ, საპრეზიდენტო კანდიდატებს ვკითხეთ და ბაქრაძე ამბობს, რომ შეიწყალებს მერაბიშვილს, სააკაშვილს. იგივეს ამბობს „ნაციონალური მოძრაობის“ კანდიდატი და მისი სია კიდევ უფრო ვრცელია, შეიწყალებს ყოფილი ხელისუფლების ყველა მაღალჩინოსანს, ვინც დღეს ციხეში არიან. დავუშვათ მოცემულობა, რომ პრეზიდენტი გახდა ოპოზიციის წარმომადგენელი და ის იწყალებს ყოფილ პრეზიდენტს, რომელიც გაიქცა ქვეყნიდან, უარი თქვა მოქალაქეობაზე და დღემდე მთელ რიგ საქმეებზე ისევ მიმდინარეობს გამოძიება, ბრალიც აქვს წაყენებული. რას აკეთებს მთავრობა, გაქვთ სტრატეგია, ამ შემთხვევეში რა ხდება, ბრუნდება და კიდევ უფრო სანახაობრივი ხდება პოლიტიკა?

ეს არის მოვლენათა აბსოლუტურად თეორიული განვითარება, გამომდინარე იქიდან, რომ არცერთ ოპოზიციურ კანდიდატს გამარჯვების შანსი საპრეზიდენტო არჩევნებში არ აქვს. აბსოლუტური სიცხადით და მკაფიოდ შემიძლია ვთქვა, რომ ქალბატონი სალომე ზურაბიშვილი აუცილებლად გაიმარჯვებს ამ საპრეზიდენტო არჩევნებში.

პირველივე ტურში?

დღევანდელი მოცემულობით, სალომე ზურაბიშვილი იგებს პირველივე ტურში. ეს არის დღევანდელი მოცემულობა და არ მგონია, რომ 28 ოქტომბრამდე არსებითად შეიცვალოს ეს მოცემულობა. რაც შეეხება „ნაცმოძრაობას“ და მის დაპირებებს, ბუნებრივია ის გამომდინარეობს იმ ღირებულებებიდან, რომელსაც ეფუძნება ეს პოლიტიკური მოძრაობა და ეს ღირებულებები ალაპარაკებთ მათ იმაზე, რომ უნდა შეიწყალონ ის ადამიანები, რომლებიც მხილებულები არიან უმძიმეს დანაშაულებში. ეს იყო დანაშაულები, რომელზეც იდგა მაშინდელი რეჟიმი, ეს იყო ადამიანის ღირსების ტოტალური შელახვა, წამება, გაუპატიურება, რასაც ჰქონდა შეძენილი ყოველდღიური ხასიათი ციხეებში თუ გნებავთ ციხეებს გარეთ, ეს იყო ბიზნესის რეკეტი და კონკრეტული სტატისტიკა დაგისახელეთ, ეს იყო აბსოლუტური თვითნებობა, ელიტური კორუფცია, ათასი უბედურება და ეს იყო ძალიან მნიშვნელოვანი დანაშაული, ეს იყო ჩვენი ტერიტორიების დაკარგვა. რომ არა მათი დანაშაულებრივი და ავანტიურისტული ქმედებები, ეს უბედურება ჩვენს ქვეყანას თავს არ დაატყდებოდა. ეს არის ის დანაშაულები, რომელიც ამ ადამიანებმა ჩაიდინეს და მათ შეწყალებაზე საუბარი ნიშნავს იმას, რომ შენ ეფუძნები იმ ღირებულებებს, რომელ ღირებულებებზე იდგა 2012 წლამდე ის კონკრეტული რეჟიმი.

თქვენ დღეს ბრიფინგი გამართეთ და წინასაარჩევნო გარემოზე ისაუბრეთ, აღნიშნეთ, რომ იმ დარღვევების შესახებ, რომელიც პარტიას აქვს უკვე ჩამოწერილი და შეგროვილი, აუცილებლად მიაწვდით საერთაშორისო ორგანიზაციებს. ამის შემდეგ დაახლოებით 2 საათში „საერთაშორისო გამჭირვალობის“ ბერლინის სამდივნომ გამოაქვეყნა განცხადება და ხელისუფლებას, მათ შორის პირადად თქვენ მოგიწოდათ უარი თქვათ უსაფუძვლო ბრალდებებზე. თქვენ მესამე სექტორის ცალკეული წარმომადგენლები ფაშიზმის მხარდაჭერაში დაადანაშაულეთ...

მე ვთქვი, რომ ვინც ხელს აფარებს ფაშიზმს, ის არის ფაშიზმის თანამონაწილე.

დიახ და როგორ ფიქრობთ, ეს განცხადება ხომ არ იქნება პრობლემა საერთაშორისო ორგანიზაციებთან თანამშრომლობის კონტექსტში წინასაარჩევნო პერიოდში, იმიტომ რომ, განცხადება საკმაოდ ვრცელია და ასევე საუბარია დამკვირვებლებზე, რომლებიც უნდა ჩამოვიდნენ და მათ არ უნდა შეეშალოთ ხელი მუშაობის პროცესში.

დამკვირვებლები მუშაობენ ჩვენი მოწვევით, შესაბამისად  ჩვენ მათთან გვაქვს ძალიან მჭიდრო თანამშრომლობა. რაც შეეხება ამ კონკრეტულ ფაქტს, რომელიც დაკავშირებულია კონკრეტულ არასამთავრობო ორგანიზაციებთან. შეგახსენებთ, საქმე ეხებოდა ნიკა გვარამიას კონკრეტულ განცხადებას, სადაც მან თქვა შემდეგი რამ - ის ადამიანები, რომლებიც მხარს უჭერენ კონკრეტულ კანდიდატს, კერძოდ ქალბატონ სალომე ზურაბიშვილს, უნდა მოიკვეთონ საზოგადოებრივი ცხოვრების სხვადასხვა სფეროდან, მათ შორის ეკონომიკის სფეროდან, ბიზნესის სფეროდან, მათ შორის კულტურის სფეროდან და მათ შორის პოლიტიკის სფეროდან და თქვენ ახსენით, რას ნიშნავს ეს განცხადება?! განცხადება ბიზნესიდან და ეკონომიკიდან მოკვეთის თაობაზე ნიშნავს ზუსტად იმას, რასაც აკეთებდა „ნაცმოძრაობა“ 2012 წლამდე წლების განმავლობაში და რისი თანამონაწილეც იყო ნიკა გვარამია. რაც შეეხება კულტურიდან მოკვეთას, ესეც ძალიან კარგად გვახსოვს, როგორ ხდებოდა შემოქმედებითი მოღვაწეების გამიჯვნა ჩარეცხილებად და არაჩარეცხილებად და როგორ ხდებოდა „ჩარეცხილების“ მოკვეთა კულტურის სფეროდან. ასევე, რაც შეხება პოლიტიკიდან მოკვეთას, გახსოვთ როგორ იდევნებოდნენ პოლიტიკური ნიშნით განსხვავებული აზრის მქონე ადამიანები და რა მეთოდებს უპირისპირებდა მაშინ რეჟიმი 2012 წლამდე. მე ამას რატომ ვამბობ. იმიტომ რომ, ნიკა გვარამიას გამონათქვამი არ იყო უბრალო მეტაფორული გამონათქვამი. ეს იყო კონკრეტული დაპირება, კონკრეტული მუქარა იმ ადამიანების მიმართ, რომლებიც მხარს უჭერენ ქალბატონ სალომე ზურაბიშვილს. შესაბამისად, როდესაც ვამბობთ, რომ ეს იყო ფაშისტური განცხადება, ამას აქვს ძალიან კონკრეტული საფუძველი და დარწმუნებული ვარ, ამაში მთელი საზოგადოება დაგვეთანხმება. სხვა არაფერია ფაშიზმი, თუ არა ადამიანებს მოკვეთა ეკონომიკის, კულტურისა და პოლიტიკის სფეროდან. ასეთი უმძიმესი განცხადება კეთდება, რეალურად ფაშისტური განცხადება, შეიძლება სხვა ტერმინი სჯობდეს, მაგალითად ბოლშევიკური, მაგრამ ეს არის ის სულისკვეთება, რომელიც ეფუძნება ადამიანის ღირსების ტოტალურ შელახვას. როდესაც ასეთ განცხადებას არ აფასებენ არასამთავრობო ორგანიზაციები, რომლებიც თეორიულად უნდა იყვნენ ეტალონები ამ სფეროში და ტონის მიმცემები სხვებისთვის, ეს არის აბსოლუტურად შემაშფოთებელი. მე გამახსენდა ის პროცესები, რომელიც ვითარდებოდა 2012 წლამდე, როდესაც „ნაცმოძრაობა“ ჩადიოდა ამ უმძიმეს დანაშაულებებს, მათ შორის ეკონიმიკის, კულტურისა და პოლიტიკის სფეროდან კვეთდა კონკრეტულ ადამიანებს და როდესაც ამაზე ჩუმად იყვნენ სწორედ ეს არასამთავრობო ორგანიზაციები. მე რომ არ მინდა ეს განმეორდეს...

თუმცა 2012 წლამდე მახსოვს ბევრი არასამთავრობო ორგანიზაცია, რომელიც პირიქით იყო და იგივე, თუნდაც როცა „მაესტროს“ უჭირდა, იგივე ეკა გიგაური, ნინო ლომჯარია, რომელიც დღეს სახალხო დამცველია, ეს ადამიანები ქუჩაში აქციებზე იდგნენ და სიტყვის თავისუფლებას ითხოვდნენ.

კი იყო. მე გაგახსენებთ, იყო რამდენიმეთვიანი ეპიზოდი, როდესაც ეს ყველაფერი ხდებოდა და ამის გაშლა არ მინდა, ამასაც ჰქონდა თავისი მიზეზები, მაგრამ რეალურად 9 წლის განმავლობაში გრძელდებოდა ის დანაშაულები, რომელსაც ეს რეჟიმი ჩადიოდა და თქვენ გახსოვთ მაშინ რამდენად აქტიური იყო არასამთავრობო სექტორი და თქვენ შეგიძლიათ შეადაროთ ეს ყველაფერი დღევანდელ ვითარებას, აბსოლუტური ცა და დედამიწაა. ამაზე მაქვს მე საუბარი და არა კონკრეტულ მოვლენებზე და კონკრეტულ გამოვლინებებზე. კიდევ ერთხელ გავიმეორებ, მთავარი რა არის, ნიკა გვარამიამ გააკეთა აბსოლუტურად ბოლშევიკური განცხადება და როდესაც ამას არა მარტო ნეგატიურად არ აფასებს არასამთავრობო ორგანიზაცია, რომელიც ასეთად იწოდება, არამედ უფრო მეტიც, შემდეგ უკვე მხარდაჭერას უცხადებს, ეს არის უფრო მეტი, ვიდრე შემაშფოთებელი. აქიდან გამომდინარე მე დღეს კიდევ ერთხელ საჯაროდ ვაყენებ მოთხოვნას ამ არასამთავრობო ორგანიზაციების წინაშე, რომ მათ შეაფასონ ნიკა გვარამიას ეს განცხადება. ეს იქნება მათი შეფასების ძალიან მნიშვნელოვანი კრიტერიუმი. ან ისინი მოახდენენ თვითლუსტრაციას ძალიან მძიმე ფორმით, ამ ისინი ერთხელ და სამუდამოდ სწორად და ადეკვატურად შეაფასებენ იმ გამონათქვამს, რომელიც გააკეთა ნიკა გვარამიამ. ეს არის აბსოლუტურად ბოლშევიკური განცხადება, როდესაც საუბარია ადამიანების მოკვეთაზე კულტურის, ეკონომიკის და პოლიტიკის სფეროდან და თუ ამას არ აფასებს არასამთავრობო ორგანიზაცია, ყველაფერი არის ცხადი.

თქვენ არაერთხელ ახსენეთ ნიკა გვარამია და მან ცოტა ხნის წინ დააანონსა, რომ თუ პროკურატურა საუბრობს ამ ჩანაწერზე, ჩვენ გაცილებით უფრო მეტი გვაქვს და ნელ-ნელა ამის გამოქვეყნება მოხდება. ელოდებით რაიმე განსაკუთრებულს იმ ჩანაწერებიდან, რომელიც შეიძლება ჩვენ ვნახოთ პარტიული ტელევიზიის ეთერით?

თქვენ ნახეთ ერთი სპექტაკლი, რომელიც მალევე ჩაიშალა, მეორე სპექტაკლიც ასევე მალევე ჩაიშალა. ასევე შეიძლება მესამე-მეოთხე სპექტაკლი ხელოვნურად დაიდგას. მთავარი კიდევ ერთხელ არის იგივე, თუ არ არსებობს დანაშაული, გადაცდომა, ვერანაირი ხელოვნური ფარული ჩანაწერით ვერ შექმნი ვერანაირ კომპრომატს. ჩვენ გვაქვს ჩვენი საქმიანობის პრინციპები და სწორი პრინციპებით რომ ვმოქმედებთ, მაგიტომ ვერ გვავნებს ვერაფერს ვერც ნ იკა გვარამია და ვერც „ნაციონალური მოძრაობა“. მათ ამისათვის საფუძველი არ აქვთ. საფუძველს ჩვენ არავის არ ვაძლევთ. ჩვენ ამ საქმესთან დაკავშირებითაც ვთქვით, რომელიც მირზა სუბელიანს ეხება, თუ  ვინმე გვემუქრება, ჩვენ მუქარის არ გვეშინია. მუქარის არ გვეშინია იმიტომ, რომ ყველა კითხვაზე გვაქვს პასუხი, იმიტომ რომ, სიმართლე არის ჩვენ მხარეს.

როგორ წარმოგიდგენიათ მოვლენების შემდგომი განვითარება. ის, რასაც დღეს „ნაციონალური მოძრაობა“ აკეთებს, რისკენ სწრაფვაა, ის, რომ საპრეზიდენტო არჩევნები მოიგონ, თუ საპრეზიდენტო არჩევნების შემდეგ დაიწყონ ქვეყანაში არეულობა, ქუჩაში გამოსვლები და მოთხოვნა ვადამდელი საპარლამენტო არჩევნების? რა მიზანს ემსახურება ეს?

მე შემიძლია პირდაპირ გითხრათ, რომ მათ ნამდვილად ვერ ექნებათ ილუზია საპრეზიდენტო არჩევნების მოგების თაობაზე, მათ ზუსტად იციან როგორია რეიტინგები და ზუსტად იციან, რომ მათ აქვთ ერთგვარი ზედა ჭერი საკუთარი საარჩევნო მხარდაჭერის. არის ადამიანების ¾, რომელსაც გასაგონად არ უნდა არაფერი „ნაცმოძრაობასთან“ დაკავშირებით. ეს არის დღევანდელი მოცემულობა. ასეთ ვითარებაში, ბუნებრივია, ვერანაირ არჩევნებს ვერ მოიგებ. ეს არის დღევანდელი რეალობა და შესაბამისად, ვერცერთ მათგანს ვერ ექნება ილუზია, რომ საპრეზიდენტო არჩევნებს მოიგებენ, ან თუნდაც სოლიდურ შედეგს მიაღწევენ. შესაბამისად ამ შემთხვევაშიც მათ აქვთ რევოლუციური სცენარები, რაზეც საუბრობდა იგივე მიხეილ სააკაშვილი, იგივე ვაშაძე და სხვები. ამაზე ისინი საუბრობენ, ამაზე ისინი გვესაუბრებოდნენ 2016 წელს, 2017 წელს, გვესაუბრებიან დღესაც, თუმცა ვნახეთ და ჩვენ არაერთხელ დავამტკიცეთ, რომ ხელისუფლება არის ხელისუფლება და „ნაცმოძრაობას“ ნამდვილად არ მივცემთ იმის საშუალებას, რომ თუნდაც მინიმალურ დონეზე არიონ ქვეყანაში სიტუაცია. ეს შეიძლება იყოს მათი მისწრაფება, ეს იყოს მათი სურვილი, თუმცა ჩვენ ვართ აქ იმისათვის, რომ ამის საშუალება არავის და მით უმეტეს „ნაცმოძრაობას“ არ მივცეთ.

საარჩევნო შტაბის მუშაობას, ბუნებრივია, თქვენც კურირებთ და ყოველდღიურად იგებთ ინფორმაცის, რა ხდება რეგიონებში. მაგალითად, დღეს იყოს კასპი, სადაც სერიოზული სიტყვიერი და ფიზიკური დაპირისპირება მოხდა. როდესაც ინფორმაცია მოვიკვლიეთ, აღმოვაჩინეთ, რომ ძირითადად „ნაციონალური მოძრაობის“ აქტივი იყო მისული, რომლებიც დარბაზში შესვლას და როგორც თვითონ ამბობდნენ, სალომე ზურაბიშვილისთვის კითხვების დასმას ცდილობდნენ. რეალურად, გაქვთ თუ არა ინფორმაცია, რიგითი მოქალაქეები აპროტესტებენ თუ არა ზურაბიშვილის რეგიონში ჩასვლას, თუ ძირითადად, ეს არის პარტიული აქტივი, რომლებიც ამ შეხვედრების ჩაშლას ცდილობენ? რა ხდება რეალურად?

შეხვედრაზედ შესვლის საშუალება აქვს ყველას. ათი ათასობით ადამიანი დაესწრო უკვე ქალბატონი სალომე ზურაბიშვილის შეხვედრებს ჯამში მთელი ქვეყნის მასშტაბით. რაც შეეხება იმ დესტრუქციას, რომელსაც აწყობს „ნაცმოძრაობა“, ეს არის აბსოლუტურად არადასავლური, არაევროპული კამპანიის შემადგენელი ნაწილი, რომელსაც აწარმოებს ეს პოლიტიკური ძალა. აბსოლუტურად ყველა შეხვედრაზე იყვნენ მისულები „ნაცმოძრაობის“ აქტივისტები, არც ერთი გამონაკლისი არ ყოფილა. ისინი აწყობდნენ დესტრუქციას. რა თქმა უნდა, ჩვენ თეორიულად შეგვიძლია ამ დესტრუქციას ვუპასუხოთ ჩვენი შესაბამისი მოქმედებით, თუმცა ეს ჩვენთვის პრინციპულად მიუღებელია. ჩვენ თავიდანვე ვთქვით, რომ ჩვენ ვაწარმოებთ ევროპული ტიპის კამპანიას და შესაბამისად ბოლომდე გავყვებით ასე ამ პროცესს. ზუსტად ასეთი ევროპული ტიპის კამპანიით მოვიგებთ ჩვენ ამ საპრეზიდენტო არჩევნებს.

მე ვფიქრობ, რომ ძალიან ბევრ საკითხს შევეხეთ, თუმცა წინ არის სრული ორი კვირა და ალბათ კიდევ ბევრი განცხადების მოსმენა მოგვიწევს, როგორც სახელისუფლებო გუნდის, ასევე ოპოზიციური პარტიის, „ნაციონალურ მოძრაობას“ ვგულისხმობ. ჩემი ბოლო შეკითხვაა, ამ არჩევნების შემდეგაც „ნაციონალური მოძრაობა“ ისევ მთავარი კონკურენტი და მთავარი ოპოზიციური ძალა იქნება „ქართული ოცნების“ მმართველობის პირობებში?

დღეს, რეალურად ბოლო რესურსს ხარჯავს „ნაციონალური მოძრაობა“, იმ ფულის ჩათვლით, რომელიც ხალხისგან აქვთ ნაშოვნი თავის დროზე, 2012 წლამდე. ბოლო რესურსს ხარჯავენ ისინი, ეს არის ბოლო მობილიზაცია და რეალურად, ეს ბოლო მობილიზაციაც არის წარუმატებლობისთვის განწირული. რეალურად, ქვეყნისთვის არის მნიშვნელოვანი  ის, რომ პოლიტიკური სისტემაში ჯანსაღი ოპოზიციური ძალები მოვიდნენ. ასეთი სისტემით დიდი ხნის განმავლობაში სწორი მიმართულებით ვერ განვითარდება ჩვენი პოლიტიკური სისტემა, აქიდან გამომდინარე დიდი იმედი მაქვს, რომ მუდმივად გაჯანსაღდება ეს სისტემა და ამისთვის, ჩვენ, „ქართული ოცნება“ ყველაფერს გავაკეთებთ.

ვიდეო

კომენტარები ()

სხვა ინტერვიუები