24 მარტი 2019

„უნდა მომცეთ საშუალება, რომ აგიხსნათ“

როგორ მოხვდა გირგვლიანის ადვოკატი უგულავა-ბოკერიას გუნდში

შალვა შავგულიძე მთაწმინდის მაჟორიტარობისთვის იბრძოლებს. ის და მისი პარტია ამ ბრძოლაში მარტო არ იქნებიან. შეიქმნა ბლოკი, სადაც „თავისუფალი დემოკრატები“ და „ევროპული საქართველო“ არიან. პოლიტიკაში წინასაარჩევნო გაერთიანებები ხშირია და ამ მოვლენაშიც არაბუნებრივი არაფერი იქნებოდა, რომ არა რამდენიმე დეტალი. შალვა შავგულიძე ბოლო ათწლეულის ყველაზე გახმაურებული, სანდრო გირგვლიანის მკვლელობის საქმის ადვოკატია. ამ საქმეზე ევროპულმა მართლმსაჯულებამ უპრეცედენტო დასკვნა დადო და ამ საქმეში მართლმსაჯულების აღსრულების წინააღმდეგ ბრძოლაში მთელი სახელმწიფო სისტემა დაადანაშაულა. „ევროპული საქართველოს“ წარმომადგენლები კი ყოფილ სახელმწიფო სისტემას წარმოადგენენ. შალვა შავგულიძე აცხადებს, რომ მას ღირებულებებისთვის არ უღალატია. რის გამო აირჩია ყოფილმა ადვოკატმა პარტნიორად პოლიტიკური ძალა, რომლის წევრებისგანაც თავის დროზე ის ადამიანებს იცავდა - „ქრონიკის“ წამყვანის, თეა სიჭინავას კითხვებს მთაწმინდის მაჟორიტარობის კანდიდატმა შალვა შავგულიძემ უპასუხა.
 

შალვა შავგულიძე

შალვა შავგულიძე
ფოტო: Facebook@MainFreeDemocrats

თქვენ განაცხადეთ, რომ არ გიღალატიათ თქვენი ღირებულებებისთვის, ამას ხაზი გაუსვით, მაგრამ როგორც კი თქვენი პოლიტიკური გადაწყვეტილების ცნობილი გახდა, საზოგადოების ნაწილმა ის სწორედ პრინციპების ღალატად აღიქვა, იმ პრინციპების და ღირებულებების, რომელსაც წლების განმავლობაში იცავდით. მაინც რის გამო აირჩია ყოფილმა ადვოკატმა იმ ადამიანებთან ერთად ყოფნა, რომლებისგანაც ის ადამიანებს წლების განმავლობაში იცავდა?

მადლობა ამ შესაძლებლობისთვის, რომ კიდევ ერთხელ ავხსნა, თუ რამ განაპირობა პირადად ჩემი და მთლიანად „თავისუფალი დემოკრატების“ ეს ნაბიჯი, რომ ჩვენ შევქმენით საარჩევნო პოლიტიკური ბლოკი „ევროპულ საქართველოსთან“ და რატომ მიმაჩნია ეს ძალიან სწორ და გამართლებულ ნაბიჯად. ვფიქრობ, ეს ძალიან ადვილი ასახსნელიც არის და მარტივად დასანახიც. საქმე მდგომარეობს შემდეგში, მე ნამდვილად არ მიღალატია ჩემი ღირებულებებისთვის და იმ მიზნისთვის, რასაც ვემსახურებოდი მაშინ, როცა ადვოკატი ვიყავი, რისთვისაც წამოვედი პოლიტიკაში და რისთვისაც და რატომაც დღეს გადავდგით ეს ნაბიჯი. როდესაც მე ადვოკატი ვიყავი და ვიცავდი გირგვლიანების და ენუქიძეების ოჯახის ინტერესს იმ საქმეზე, ვუპირისპირდებოდი სახელმწიფოს უსამართლობას კონკრეტული ადამიანების მიმართ. რა მექანიზმით ხორციელდებოდა ეს უსამართლობა? ხორციელდებოდა ისე, რომ მაშინდელი ხელისუფლება აკონტროლებდა სასამართლოს, პოლიტიკური ხელისუფლება სასამართლო ხელისუფლებას და აქიდან გამომდინარე სასამართლო  იმ კონკრეტულ საქმეზე იღებდა გადაწყვეტილებებს არა კანონის შესაბამისად და სამართლის შესაბამისად, არამედ იმ მმართველი პოლიტიკური ძალის ნების და მოთხოვნების შესაბამისად. დღეს მე ვარ პოლიტიკაში და რა ვითარება გვაქვს დღეს, შეიცვალა ამ მხრივ სიტუაცია?! ახლანდელმა ხელისუფლებამ, „ქართულმა ოცნებამ“ გაათავისუფლა სასამართლო ხელისუფლება კონტროლისგან? მთელი პასუხისმგებლობით ვაცხადებ, რომ პირიქით, ინსტიტუციურად კიდევ უფრო მეტად მოაქცია საკუთარი კონტროლის ქვეშ და თუ ამის დრო გვექნება და სურვილი გექნებათ, შემიძლია ავხსნა, რა მექანიზმებით. უფრო მეტიც, პერსონალიებსაც ვერ შეელია. სწორედ იმ მოსამართლეებს, რომელთა ხელითაც წინა ხელისუფლება სჩადიოდა უსამართლობას, იმათ საერთოდ ჩააბარა დღეს სასამართლო ხელისუფლება. დღეს ჩემთვის, როგორც პოლიტიკოსისთვის, იგივე მიზანია მისაღწევი, უსამართლობა არის დასასრულებელი და სამართალია მოსატანი ჩვენს ქვეყანაში...

კი, მაგრამ ვისთან ერთად? ეს ხომ არის პრობლემა?!

მესმის, ამაზეც გადავალ. უნდა მომცეთ საუბრის საშუალება...

ის, რომ ხელისუფლებას აქვს სერიოზული პრობლემები სასამართლოსთან დაკავშირებით, ეს არის ერთი საკითხი, რაზეც შეგვიძლია ბევრი ვისაუბროთ და ვიმსჯელოთ თქვენთან ერთად თქვენი გამოცდილებიდან გამომდინარე, მაგრამ ვისთან ერთად აპირებთ ამის გაკეთებას, ამას ხომ აქვს მნიშვნელობა? ის სისტემა იმ ადამიანების შექმნილი არ არის, ვისთან ერთადაც დღეს ხართ?

სწორი შეკითხვაა, მაგრამ მომეცით საშუალება გადავიდე ამაზე. ანუ, დღესაც გვაქვს იგივე უსამართლობა. ახლანდელი ხელისუფლება აკონტროლებს სასამართლოს, სასამართლო სჩადის უსამართლობას და მეორდება ასეთი კონკრეტული უსამართლო საქმეები. მაგალითად „კაბელების საქმე“, რომლის თითოეული ფურცელი ვიცი და ვიცი, რომ ძალიან დიდი უსამართლობა გაქვს; გვაქვს მაჩალიკაშვილის საქმე და სარალიძის საქმე, ეს პასუხგაუცემელი საქმეები, რაზეც საზოგადოების დიდი აღშფოთებაა უსამართლობიდან გამომდინარე და ასე შემდეგ. ანუ, ის პრობლემა არ მოიხსნა. დღეს იგივე პრობლემაა გადასაწყვეტი და ჩვენ „თავისუფალი დემოკრატები“ და მე, ერთი ადამიანი, შალვა შავგულიძე, რომელიც პოლიტიკაში ვარ, შევძლებთ ამის გამოსწორებას?! რა თქმა უნდა, ვერა. რადგან სამართლის სფეროზე ვსაუბრობ, ამ შემთხვევაში უნდა ეძებო პარტნიორები. ვინ უნდა ნახო პოლიტიკურ პარტნიორებად? უნდა ნახო ისეთი პოლიტიკური ძალა და პოლიტიკური სუბიექტები, რომლებთანაც გაქვს ღირებულებითი თანხვედრა უმთავრეს სტრატეგიულ მიმართულებებში. ასეთი უმთავრესი სტრატეგიული მიმართულება ჩვენთვის არის საქართველოს ევროატლანტიკური ინტეგრაცია... 

ადამიანის უფლებები?

დამაცადეთ. „ევროპული საქართველო“ არის მკაფიოდ მკაფიოდ ევროატლანტიკური მიმართულების პოლიტიკური ძალა. ამასთან ერთად „ევროპული საქართველო“ დაკომპლექტებულია წევრებით, რომლებიც არიან მაღალი კვალიფიკაციის და კომპეტენციის მქონე პიროვნებები. ამასთან ერთად გვაქვს სხვა ღირებულებითი თანხვედრა. რაც შეეხება ადამიანის უფლებებს და ამ კონკრეტულ საქმეს...

მარტო ეს კონკრეტული საქმე არ არის, კიდევ ბევრი საქმეა...

კი, კიდევ სხვა ბევრია. ამ გუნდის წევრები საჯაროდ აკეთებენ განცხადებებს, რომ სამართლის სფეროში მათ ხელისუფლებას ჰქონდა სერიოზული ჩავარდნა. ისინი წუხან ამის შესახებ და ამბობენ, რომ ეს იყო ცუდი.

კარგი, ამ პრინციპულ საკითხებზე მინდა გავიგო თქვენი პასუხები. თქვენი საუბრიდან გამომდინარე ბევრი კითხვა ჩნდება და რადგან ასე მიუდექით საკითხს...

კი, ბატონო, დამისვით კითხვები, მაგრა მეც მომეცით ხოლმე საშუალება, რომ გიპასუხოთ...

რა თქმა უნდა. თქვენ უკვე საუბრობთ რამდენი ხანია. თანმიმდევრულად მივყვეთ. თქვენ ამბობთ, რომ ამ გუნდის წევრები აღიარებენ, რომ სასამართლოს მიმართულებით ჰქონდათ სერიოზული პრობლემები. პირველი, ამ გუნდის ერთ-ერთი წევრი, ოთარ კახიძე არის ვანო მერაბიშვილის ადვოკატი. ეს გუნდი მიიჩნევს, რომ მერაბიშვილი პოლიტპატიმარია. მერაბიშვილის ოჯახის ერთ-ერთი წევრი არის მთავარი ფიგურანტი სანდრო გირგვლიანის საქმის და მერაბიშვილი 2012 წლის შემდეგ პასუხისგებაში მიეცა უფლებამოსილების გადამეტების მუხლით სწორედ ამ საქმესთან დაკავშირებით, დათა ახალაიას მიმართულებით მტკიცებულებების გაყალბებისთვის. თქვენ ეთანხმებით მოსაზრებას, რომ ვანო მერაბიშვილი არის პოლიტპატიმარი?

მოდით, საკითხი დავაყენოთ ასე. რამ განაპირობა ის, რომ ვანო მერაბიშვილის გამოცხადება შესაძლებელი გახდა პოლიტპატიმრად? ეს განაპირობა ევროპული სასამართლოს გადაწყვეტილებამ და ეს განაპირობა „ქართულ ოცნებაში“ არსებულმა არაკომპეტენტურობამ. ამ გუნდში მხოლოდ მორჩილების ნიშნით დარჩნენ წევრები და სამწუხაროდ, თითქმის არც ერთი კომპეტენტური და კვალიფიციური აღარ დარჩა. „ქართულმა ოცნებამ“ მოახერხა ის, რომ პატიმარ მერაბიშვილს, რომელსაც სხვა საქმეებთან ერთად, გირგვლიანის საქმეზე გამამტყუნებელი განაჩენი აქვს, დაურღვიეს ევროპული კონვენციით გათვალისწინებული უფლებები, რაც დაადასტურა ადამიანის უფლებათა სასამართლომ და აქედან წამოვიდა მისი პოლიტპატიმრად აღიარების შესაძლებლობა...

კი ბატონო, ეს არის მოცემულობა, მაგრამ მე გეკითხებით, კონკრეტულად თქვენ მიგაჩნიათ თუ არა ვანო მერაბიშვილი პოლიტპატიმრად?

მე მიმაჩნია, რომ  ვანო მერაბიშვილს აქვს კანონი დარღვეული გირგვლიანის საქმეზე და ამ ნაწილში ვანო მერაბიშვილი არ არის პოლიტპატიმარი, ვინაიდან მას იქ ჩადენილი აქვს დანაშაული. საერთოდ, პერსონალიების თემა, ვისაც აქვს დანაშაული ჩადენილი, პოლიტიკურ სფეროს სცილდება, ეს სამართლის სფეროა. აქ სამართალმა თავისი უნდა მოითხოვოს, მაგრამ გადაწყვეტილება ვანო მერაბიშვილის ციხიდან გაყვანის ეპიზოდზე იყო და იქ, სადაც „ქართულმა ოცნებამ“ მოახერხა და დაარღვია ადამიანის უფლებები, იქ აქვთ საფუძველი, რომ ასე დააყენონ საკითხი.

ეს იმათ აქვთ საფუძველი, იმიტომ რომ, ისინი ერთ გუნდში არიან. იგივე წაყენებულ ბრალთან დაკავშირებით და გამოტანილ სასჯელებთან დაკავშირებით მათ სხვა მიდგომები აქვთ, კიდე ერთხელ ვიტყვი, რომ ოთარ კახიძე იცავს ვანო მერაბიშვილის უფლებებს.

მე უკვე ვთქვი ჩემი მიდგომა.

ეს როგორ გაქვთ შეთანხმებული გუნდში, როცა თქვენ მიიჩნევთ, რომ მაგალითად ვანო მერაბიშვილი არ არის პოლიტპატიმარი და გუნდი მიიჩნევს, რომ პოლიტპატიმარია?

მოდით, ასე ვთქვათ. ეს არ არის წამყვანი თემა, რომ ვანო მერაბიშვილი რა ნაწილში მიგვაჩნია დამნაშავედ და რა ნაწილში, არა, ამაზე არც გვიმსჯელია. აქ ცოტა სერიოზულად უნდა დანახვა. ჩვენ უნდა გავიხედოთ მომავლისკენ. ჩვენ უნდა გამოვიდეთ ამ მოჯადოებული წრიდან, რომ ყოველი ახალი ხელისუფლება მტრად აცხადებდეს წინა ხელისუფლებას. საერთოდ, 30 წელია, რაც დამოუკიდებლები ვართ და ხელისუფლების შეცვლა ხდება სამოქალაქო დაპირისპირების ხარისხში, ახალი ხელისუფლება აცხადებს მტრად წინა ხელისუფლებას, ნაწილს უშვებს ციხეში, ნაწილი გარბის საზღვარგარეთ, ვინც გაასწრებს. ეს რას გვაძლევს? და ყველა ახალი ხელისუფლება აცხადებს, რომ მისგან იწყება საქართველოს ისტორია. ჩვენ ასე ვერ შევდგებით საზოგადოებად და სახელმწიფოდ.

თუ დანაშაული ჩადენილია, ამაზე პასუხი უნდა აგოს...

მე უკვე თქვი, ვინც ჩაიდენს დანაშაულს, იმან უნდა აგოს პასუხი, ეს არ არის პოლიტიკის  სფერო, მაგრამ ის, რომ ყოველმა ახალმა ხელისუფლებამ თავისი წარუმატებლობები დააბრალოს 5 და 10 წლის წინანდელ ხელისუფლებებს და ის მტრის ხატად გამოაცხადოს, ჩვენ ასე ვიღებთ მტრულ ბანაკებად დაყოფილ საზოგადოებას. ამ ჩვენ ნაბიჯს ეს პოლიტიკური დატვირთვაც აქვს და ერთ-ერთი უმთავრესი ეს იყო, რომ ეს მოჯადოებული წრე უნდა გავარღვიოთ. ვის აძლევს ხელს ჩვენი საზოგადოების მტრულ ბანაკებად დაყოფა. რა თქმა უნდა, ჩვენს ნამდვილ მტერს, რომელიც სამწუხაროდ გვყავს და რომელსაც ჩვენი ტერიტორიის 20% უკავია, ჯარებით დგას და ძალიან ცდილობს, მთლიანადაც დაგვაბრუნოს თავის გავლენის სფეროში.

თქვენი პოლიტიკური გუნდი, სხვათა შორის, იმ პოლიტიკურ ხელისუფლებას აბრალებდა იმ წარუმატებელ ომს, რომლის გამოც ქვეყნის 20% ოკუპირებულია.

არა, არასოდეს დაგვიბრალებია და ალბათ, არასწორი ინფორმაცია გაქვთ.

როგორ არა, ის, რომ საქართველოს 20% ოკუპირებულია, ამაში ძალიან დიდი კრიტიკა ისმოდა „ქართული ოცნების“ მხრიდან „ნაციონალური მოძრაობის“ მისამართით.

„ქართული ოცნებიდან“ ისმოდა, მაგრამ „თავისუფალი დემოკრატებიდან“?

ხო მე ამას ვგულისხმობდი. „თავისუფალი დემოკრატები“ ამას არ იზიარებდნენ არასოდეს? თქვენ ხომ წლების განმავლობაში ერთად იყავით, ერთად მოხვედით ხელისუფლებაში?

ჩვენ რომ ბევრ რამეში ვეღარ ვიზიარებდით „ქართული ოცნების“ რიტორიკას და მიმართულებებს, იმიტომ წამოვედით „ქართული ოცნებიდან“ და გავხდით მისი ოპოზიცია. ეს, რა თქმა უნდა, იყო სახელმწიფოებრივად დანაშაულებრივი  და დამაზიანებელი განცხადებები, ისევე როგორც სამართლის სფეროში „ქართულმა ოცნებამ“ კიდევ უფრო მეტი დააშავა, ვიდრე აშავებდა „ნაციონალური მოძრაობა“.

კარგით, დავუბრუნდეთ თქვენს არჩევანს, თქვენს გადაწყვეტილებას . მაგალითად, გიგა ბოკერიამ იმ დღეს, როდესაც თქვენი პოლიტიკური გადაწყვეტილების შესახებ განცხადეთ, თქვა, რომ გირგვლიანის საქმე იყო ჩავარდნა. ეს საქმე იყო ჩავარდნა თუ სისტემური დანაშაული?

გირგვლიანის საქმე იყო სისტემური, სამართლის საკითხთან დანაშაულებრივი მიდგომის შედეგი. არ იყო მარტო...

ხომ მაგრამ, ჩავარდნა სხვა რაღაცაა. ჩავარდნაა, მაგალითად, რაღაცა წარუმატებელი რეფორმა...

ახლა ზოგ გამონათქვამში ადამიანმა შეიძლება იხმაროს ჩავარდნა, ზოგ გამონათქვამში იხმაროს, რომ ძალიან ვწუხვართ და გადავიხადეთ პოლიტიკური ფასი. აქ ძალიან მარტივად არის საკითხი. ნუ გვაქვს სურვილი, მტრის ხატები შევქმნათ ყველაფრისგან. ერთ რამეს ვიტყვი...

ბევრი რამე არ ლაგდება...

ლაპარაკის შესაძლებლობა უნდა მომცეთ, თორემ აზრი არ აქვს მაშინ ჩემ აქ ყოფნას...

კი ბატონო, გისმენთ.

მთავარი არის რომ ეს პოლიტიკური ძალა და მისი წარმომადგენლები ამბობენ, რომ სამართლის სფეროში ჩვენ გვქონდა დიდი ჩავარდნა. ბევრ სფეროში არ ჰქონდათ ჩავარდნა, წარმატება ჰქონდათ. ამას დანახვა და თქმა უნდა. წარმატება ჰქონდათ კორუფციასთან ბრძოლის საკითხში, კრიმინალის ალაგმვის საკითხში, ბევრ საკითხში.

პრობლემა იყო ადამიანის უფლებებში...

ზუსტად მანდ ვარ. სახელმწიფოებრივად მოაზროვნე პოლიტიკოსმა და პოლიტიკურმა ძალამ მტრის ხატი კი არ უნდა შექმნას დამარცხებული და ოპონენტი პოლიტიკური ძალიდან, მან უნდა აკრიტიკოს ის, სადაც მართლა ჩავარდნაა, საზოგადოებას შესთავაზოს თავისი თავი იმის გამოსასწორებლად, თუმცა ვერც ერთი პოლიტიკური ძალა 4-წლიან, თუნდაც 8-წლიან პოლიტიკურ ციკლში საქართველოს ისტორიას თავიდან ვერ დაიწყებს და ვერ დაასრულებს რაღაც გაბრწყინებით. ჩვენ თუ ასე ვიარეთ, ჩვენ უბრალოდ მომავალი არ გვექნება. მე აქ მინდა მივიდე. ეს არის მთავარი, ეს მინდა ვუთხრა ჩვენს მოქალაქეებს, ჩვენს ამომრჩევლებს, ყველა იმ ადამიანს, ვისაც ეჭვი ეპარება ჩემი ამ გადაწყვეტილების გამო. ეს გადაწყვეტილება, ეს ნაბიჯი ძალიან პოპულარული რომ არ იქნებოდა, ეს რომ ვნებათაღელვას გამოიწვევდა, როგორ გგონიათ, მე სხვაზე ნაკლებად ვიცოდი? მაგრამ ეს არის მოჯადოებული წრე...

თქვენ ფიქრობთ, რომ ამომრჩეველი კარგად გაგიგებთ?

ეს, ჩვენი მტრის მიერ ჩვენი საზოგადოებისათვის თავს მოხვეული წრე, რომ ჩვენ პოლიტიკური ანგარიშსწორების და მტრის ბანაკებად დავიყოთ, ეს არის ის, რომ ჩვენ გავხდებით ძალიან ადვილად ჩასაყლაპი ლუკმა მართალი მტრისთვის. ვიმეორებ, დამოუკიდებელი საქართველოს ისტორია ყოველმა ახალმა ხელისუფლებამ უნდა გავაგრძელოთ წინა ხელისუფლების პოზიტივების დანახვით და მასზე დაშენებით. ამიტომ, მარტივად ვიტყვი, ჩვენ, „თავისუფალმა დემოკრატებმა“ ამ ნაბიჯით უარი ვთქვით პოლიტიკურ ანგარიშსწორებაზე და შურისძიებაზე. ჩვენ ვიხედებით მომავლისკენ. რახან ახლა სამართლის სფეროზე ვსაუბრობთ, ჩვენ მიგვაჩნია, რომ სამართალს, ამ სფეროს სჭირდება გამოსწორება. ჩვენ...

ამ გუნდთან ერთად ამას შეძლებთ? რატომ ენდობით იმ ადამიანებს, ვის მიერაც არის შექმნილი ეს სისტემა? „ქართულ ოცნებას“ რომ პრობლემა აქვს სასამართლო ხელისუფლებასთან დაკავშირებით, ამაზე არ ვდაობთ, ეს მოცემულობაა, მაგრამ თქვენი არჩევანი რამ განაპირობა, როცა ეს სისტემა ამ ადამიანების მიერ არის შექმნილი?

კარგი შეკითხვაა. გაგცემთ პასუხს. მე უკვე თქვი და უფრო მეტად განვმარტავ. ასეთ დროს, რა თქმა უნდა, ეძებ პარტნიორს. „თავისუფალ დემოკრატებს“ დამუშავებული გვაქვს კარგი კონცეფცია, მიგვაჩნია, რომ კარგი კონცეფციაა სასამართლოს რადიკალური რეფორმის. ამას განხორციელება სჭირდება. სერიოზული რეფორმაა გასაკეთებელი, კოსმეტიკით ვერ უშველი საქმეს, ისეთ ჩიხში შეიყვანეს სიტუაცია. პარტნიორი ხომ უნდა გყავდეს? სამწუხაროდ, დამოუკიდებლად ვერც შალვა შავგულიძე და ვერც ჩვენი პოლიტიკური ძალა ამას ვერ შეძლებს, ვერ მოვერევით „ქართული ოცნების“ ამ ნებას, რომ აკონტროლოს სასამართლო. პარტნიორად ეძებ, ვისთანაც გაქვს პოზიციების თანხვედრა და ვიმეორებ, ამ პოლიტიკურ ძალასთან იმ სტრატეგიულ უმთავრეს ხედვაში, რაც გაგვაჩნია „თავისუფალ დემოკრატებს“, ევროატლანტიკურ ინტეგრაციაზე გვაქვს თანხვედრა. ჩვენ ვერ ვითანამშრომლებთ არაევროატლანტიკური ინტეგრაციის პოლიტიკურ ძალებთან. ყველა პოლიტიკურ ძალასთან სხვადასხვა ხარისხით გვექნება თანამშრომლობა და ზოგიერთთან პარტნიორობა, როგორი პარტნიორობაც დღეს ბლოკის სახით მოხდა ჩვენსა და „ევროპულ საქართველოს“ შორის. როგორ არ უნდა გამოვიყენოთ ეს შესაძლებლობა, რომ გავერთიანდეთ ამ პოზიციაში და კარგი კითხვა იყო თქვენი, რომ რატომ ენდობით ამ პოლიტიკურ ძალას, რომ ისინი იყვნენ იმ პოლიტიკური ძალის წარმომადგენლები, ვინც შექმნა ეს სისტემა...

მათ ხომ ძალიან კარგად იციან როგორია გემო სასამართლო სისტემის მართვის, არა?

„ქართულ ოცნებას“ თუ არ ჰქონდა გასინჯული ეს გემო, ამიტომ რა...

„ქართულ ოცნებას“ რომ აქვს ამ მიმართულებით პრობლემა, გასაგებია, მაგრამ ეს თქვენ გადაწყვეტილებას როგორ აბალანსებს? თქვენს გადაწყვეტილებაზეა აქ საუბარი.

რადგან ამ თემას ეხება, მე მინდა აქვე ვუპასუხო. ახლა მოვისმინე ბატონი [ირაკლი] კობახიძის განცხადება, ბატონი შალვა შავგულიძე რადგან არის „ევროპულ საქართველოსთან“ ეს ადასტურებს იმას, რომ  ჩვენს ოპონენტებს ღირებულებები არ გააჩნიათო და მინდა ეთერში ვუპასუხო. პირიქით არის, ბატონო ირაკლი საქმე. სწორედ იმ ღირებულებების ერთგულების გამო, რომ წინა ხელისუფლების უსამართლობას ვუპირისპირდებოდით „თავისუფალი დემოკრატები“ და ამიტომ შევიქმენით, როგორც პოლიტიკური ძალა, ჩვენ გავერთიანდით კოალიცია „ქართულ ოცნებაში“ და „ქართულ ოცნებასთან“ ერთად ვპირდებოდით ჩვენს მოქალაქეებს სამართლის მოტანას ამ ქვეყანაში. სწორედ, ამას რომ უღალატა „ქართულმა ოცნებამ“, იმიტომ წამოვედით მის ოპოზიციაში ისე, რომ ჩვენ იმ ღირებულებების ერთგული დავრჩით და თქვენ მაშინ გაწევრიანდით იმ პოლიტიკურ გუნდში, „ქართულ ოცნებაში“, როცა ჩვენ უკვე წამოსულები ვიყავით და როდესაც მას უკვე ნაღალატევი ჰქონდა იმ ღირებულებებისთვის, რასაც ერთად ვპირდებოდით. ეს უბრალოდ მოკლე პასუხი ბატონ კობახიძეს და ნუ შეეცდებით საზოგადოების შეცდომაში შეყვანას.

ამათ რატომ ენდობით? გუნდს, რომელსაც მიაჩნია, რომ ზურაბ ადეიშვილი ძალიან კარგი იუსტიციის მინისტრი იყო. სხვათა შორის, მე ამ გუნდისგან არ მომისმენია იმის აღიარება, რომ 7 ნოემბერი, ტელეკომპანია „იმედის“ დარბევა დანაშაული იყო. თქვენ ეს ძალიან კარგად იცით, ჩვენი ადვოკატი იყავით.   

რა თქმა უნდა და სხვა ბევრ საქმეებზე ვიყავი მაშინდელი უსამართლობის წინააღმდეგ.

ახლა დგახართ ამ ადამიანებთან, ვინც უსამართლობას ჩადიოდა.

ნახეთ, როგორ არის. „ქართულ ოცნებას“ უნდა ახლა რაღაც ფობიები შექმნას. თუმცა ეს „ქართულ ოცნებას“ არ უნდა, ეს უფრო გარედან არის მოხვეული „ქართულ ოცნებაზეც“ და ცდილობენ მთელ საზოგადოებაზეც, რომ რაღაც ფობიებით, რაღაც შიშებით ჩვენ დავიყოთ მტრებად. ეს უნდა დავამთავროთ. ეს არ შეიძლება. უბრალოდ მომავალი არ გვექნება. ის რომ, ადრე ამ გუნდის წევრები იყვნენ იმ ხელისუფლების წევრები, რომლებიც ადრე სჩადიოდნენ უსამართლობას, ჩვენ ამათთან ვერ უნდა გავერთიანდეთ? ესენი დღეს ამბობენ, რომ სამართლიანი სასამართლო შევქმნათ, მოდით, ერთად გავაერთიანოთ ძალისხმევა სწორი სასამართლო რეფორმის გასატარებლად და ჩვენ უნდა ვუთხრათ - არა, იმიტომ რომ, თქვენ ადრე აშავებდით, ახლა „ქართული ოცნება“ დაგვაბრალებს ჩვენ, რომ თქვენთან გაერთიანებით ჩვენ მოგვეცხება წარსულის ლაქა და მოდით, სჯობს ეს საქმე დარჩეს გასაკეთებელი, სასამართლო დარჩეს „ქართული ოცნების“კონტროლის ქვეშ, ოღონდ ჩვენ ლაქა არ მოგვეცხოს?! როგორი კარგი პასუხისმგებლიანი ვიქნები ან მე, ერთი პიროვნება შალვა შავგულიძე, ან ჩემი პოლიტიკური ძალა?! პოლიტიკური ძალის მიზანი არის, ეცადოს ქვეყანაში შექმნას ის რეფორმები და განახორციელოს ის მოქმედებები, რაც მისი აზრით, წაადგება ამ გაუმჯობესებას. ნურავინ შეეცდება ხელოვნური ფობიების ჩვენზე გავრცელებას.

ანუ, თქვენ მაინც ენდობით იმას, რომ ამ პოლიტიკურ ძალას შეუძლია წარსული არ გაიმეოროს ხელისუფლებაში მოსვლის დროს და სასამართლო სისტემა გააჯანსაღოს?

თქვენ მკითხეთ, რატომ ვენდობით და თუ გნებავთ, გიპასუხებთ.

რა თქმა უნდა.

რატომ ვენდობით. იმიტომ რომ, რომ არ ენდო, უნდა გქონდეს საფუძველი არ ნდობის...

არ გვაქვს საფუძველი? თქვენ ებრძოდით ამ სისტემას.

ვიმეორებ, როცა აშავებდა, ვებრძოდით. დღეს აშავებს სხვა იგივეს. დღეს ეს ადამიანი ამბობს, რომ ცუდი იყო მე რომ ამას ვაშავებდი. ამ ძალიდან, ვინც კონკრეტული დანაშაული ჩაიდინა, აგო პასუხი და „ქართული ოცნების“ ბრალია, წესიერად რომ ვერ მოიქცა და ის პოლიტპატიმრად გამოაცხადებინა. მან აგო პასუხი. ვისაც დანაშაული არ ჩაუდენია, ვისაც სამართალმა ვერ მოსთხოვა, რა ვქნათ ახლა, გამოვაცხადოთ საქართველოს მტრებად?! ამ პოლიტიკურ ძალას, ორად გაყოფილ „ნაციონალურ მოძრაობას“ რამხელა მხარდაჭერა აქვს მთლიანობაში, ხომ ვნახეთ წინა არჩევნებზე? მათ მხარდამჭერებს რა ვუთხრათ, თქვენ აღარ ხართ ჩვენი მოქალაქეები, ჩვენი თანამემამულეები, გამოვაცხადოთ ისინი მტრად „ქართული ოცნების“ მხარდამჭერების? შევარდნაძის ხელისუფლების მხარდამჭერებმა ჩვენ გამოგვაცხადონ მტრად, ზვიად გამსახურდიას ხელისუფლების მხარდამჭერებმა ყველა დანარჩენი გამოგვაცხადოს მტრად, იმიტომ რომ, ყველა შემდგომი ხელისუფლება მათი დამხობის შემდეგ მოვიდა და ამით ჩვენ კარგი საზოგადოება ვიქნებით?! ვიმეორებ, სამართალმა მოითხოვოს თავისი, სადაც ვინ რა დააშავა და ჩემო უსაყვარლესო თანამემამულეებო, ნუ მოვექცევით გარედან მოხვეული ამ ფობიების ქვეშ, ნუ დავიყოფით რაღაც მტრულ ტომებად და ნუ დავერევით ერთმანეთს. შევქმნათ ერთი საზოგადოება, სადაც იქნება კანონის და სამართლის უზენაესობა და თუ ვინმე ამას დაარღვევს, იქ მოვითხოვოთ პასუხი. ყველა წინა ხელისუფლების, თუნდაც ოპონენტის პოზიტივს ნუ დავკარგავთ და იმაზე ვაშენოთ, იმიტომ რომ დამოუკიდებლად ვერც ერთი პოლიტიკური ძალა ვერ ააშენებს სახელმწიფოს თავიდან ბოლომდე.

ეს გაერთიანება გრძელვადიანია თუ მხოლოდ საარჩევნოდ იქნება?

ეს არის გათვლილი, ორივე პოლიტიკურ ძალას იმედი გვაქვს მომავალ თანამშრომლობაზეც და დარწმუნებული ვარ, ეს იქნება ხანგრძლივი და გრძელვადიანი თანამშრომლობა, მაგრამ ხანდახან სხვანაირადაც ხდება-ხოლმე. ამ შემთხვევაში მე არ ვამბობ, რომ ასე მოხდება და ამის მოლოდინი მაქვს, დარწმუნებული ვარ, რომ ვითანამშრომლებთ ძალიან კარგად, მაგრამ სამწუხაროდ ასეთ დროს ხდება გაუმართლებლობაც, რაც დაგვემართა „ქართულ ოცნებასთან“ კოალიციაში ყოფნის დროს. სწორედ მათმა ღალატმა იმ ღირებულებების და პრინციპების, რასაც ჩვენ ერთად ვპირდებოდით თანამოქალაქეებს და ამომრჩევლებს, გვაიძულა, რომ ოპოზიციაში წამოვსულიყავით და მერწმუნეთ, რომ ოპოზიციონერობა არ არის მაინცდამაინც სასიამოვნო ფუნქცია.

ვიდეო  

სხვა ინტერვიუები