„დავით გარეჯი ჩემთვისაც ძალიან ემოციური საკითხია“

ქართულმა დიპლომებმა ევროპის მასშტაბით საერთაშორისო აღიარება მოიპოვა. რას გეგმავს სახელმწიფო ამ მიმართულებით, რამდენად მზადაა ქვეყანა ევროპულ საგანმანათლებლო სტანდარტებთან გასათანაბრებლად  და დასჭირდება თუ არა ამას დამატებითი ფინანსური რესურსები. გარდა ამისა, მიმდინარე მოვლენების შესახებ - რა გამოსავალს ხედავს სახელმწიფო პანკისში შექმნილ ვითარებასთან დაკავშირებით; დავით გარეჯის თემაზე რამდენად მზად ვართ აზერბაიჯანთან დიალოგისთვის; იგეგმება თუ არა საბანკო რეგულაციების შერბილება და სამთავრობო ცვლილებები; რა პროგნოზები აქვს ხელისუფლებას შუალედურ არჩევნებთან დაკავშირებით, ამ და სხვა თემებზე „ქრონიკის“ წამყვანის, თეა სიჭინავას კითხვებს პრემიერმინისტრმა მამუკა ბახტაძემ უპასუხა.
 

მამუკა ბახტაძე
ფოტო: საქართველოს მთავრობა

მიმდინარე კვირას რამდენიმე საკითხი იყო აქტუალური, მაგრამ დავიწყოთ ბოლო მნიშვნელოვანი სიახლით, რომელიც თქვენ საზოგადოებას თავად გააცანით. საქართველო ევროპის განათლების ხარისხის უზრუნველყოფის სააგენტოების ასოციაციაში (ENQA) გაწევრიანდა. ეს ნიშნავს, რომ ქართული დიპლომი უკვე აღიარებულია ევროპის მასშტაბით და როგორც თქვენ და მთავრობის სხვა წევრებმა განაცხადეთ, ეს ნიშნავს, რომ ევროპამ გამოგვიცხადა ნდობა. ჩვენ ახლა განათლების მიმართულებით რეფორმის პროცესში ვართ. როცა განათლებაზე ვსაუბრობთ, მუდმივად ვუსვამთ ხაზს, რომ ამ მიმართულებით პრობლემები გვაქვს. თქვენ თავადაც ერთ-ერთ მთავარ პრიორიტეტად დაასახელეთ განათლება, მაგრამ ამის მიუხედავად, ვიღებთ ასეთ მნიშვნელოვან გადაწყვეტილებას. რატომ? სასიხარულოა, რომ ვიღებთ ასეთ გადაწყვეტილებას, მაგრამ საინტერესოა რამ განაპირობა ეს?

პირველ რიგში, გადაუჭარბებლად შეიძლება ითქვას, რომ ეს არის ისტორიული გამარჯვება და ისტორიული წარმატება. ამას აქვს სამი მიზეზი. პირველი, რომ ქართული დიპლომი აღიარებული იქნება ევროპაში. ეს ნიშნავს, რომ ჩვენი სტუდენტები და ახალგაზრდები, რომლებიც მიდიოდნენ ევროპაში, ევროპულ საუკეთესო უნივერსიტეტებში განათლების მისაღებად, ისინი შეძლებენ, სამშობლოში მიიღონ ასეთივე უმაღლესი, ევროპული ხარისხის განათლება. ეს არის დიდი წარმატება. მეორე, რა თქმა უნდა, ეს არის პოლიტიკური წარმატება, ეს არის წარმატება ჩვენს საერთაშორისო პოლიტიკაში, ვინაიდან ეს არის ერთ-ერთი პრინციპული ნაბიჯი, რომელიც ჩვენ გადავდგით ევროინტეგრაციის გზაზე. ერთ-ერთ ყველაზე და ჩემი შეხედულებით, ყველაზე მნიშვნელოვან მიმართულებაში, ამ შემთხვევაში განათლებაში. და მესამე, ჩვენი სახელმწიფოებრივი სტრატეგია არის ის, რომ საქართველო უნდა გადავაქციოთ რეგიონის ცენტრად. ბუნებრივია, ამ სტრატეგიაში ძალიან მნიშვნელოვანი ნაწილი ეთმობა სწორედ განათლებას. ჩვენ უნდა დავიბრუნოთ განათლების კერის სტატუსი მთელი რეგიონისთვის. შესაბამისად, ამ გადაწყვეტილებას შეიძლება თამამად ვუწოდოთ, რომ ეს არის ისტორიული წარმატების მქონე გადაწყვეტილება. მე აქვე მინდა ვისარგებლო შემთხვევით და ჩვენს ევროპელ მეგობრებს მადლობა გადავუხადო გამოცხადებული ნდობისთვის. ვინაიდან, ეს არის ამავე დროს, დიდი პასუხისმგებლობა. ვინაიდან, ჩვენ ვსაუბრობთ ხარისხის რეალურ ზრდაზე და ამ ხარისხის რეალურ კონტროლზე. როდესაც გამოვაცხადეთ განათლების რეფორმა, ის ეროვნული იდეა, რომელიც გვწამს, რომ უნდა იყოს ქვაკუთხედი სახელმწიფოს განვითარების, მისი მდგრადობის, ჩვენ ვსაუბრობდით ამავე დროს მასშტაბურ ინვესტიციებზე. ვინაიდან, ჩვენ თუ ავიღებთ საქართველოს ბოლო ათწლეულების ისტორიას, ერთ-ერთი მთავარი მიზეზი, რის გამოც ჩვენ აღმოვჩნდით ამდენი გამოწვევის წინაშე, არის სწორედ ის, რომ განათლებას ექცეოდა ყველაზე ნაკლები ყურადღება და ყველაზე ნაკლები დაფინანსება იყო მიმართული განათლებისკენ. მეც, როგორც ყველა მოქალაქეს, ბევრი მთავრობისგან მახსოვს, განაცხადი, რომ განათლება ხდებოდა პრიორიტეტი. როდესაც ხდება ეს განაცხადი, პრიორიტეტი პირველ რიგში უნდა იგრძნობოდეს ბიუჯეტში. სამწუხაროდ ჩვენ ყოველთვის ვხედავდით, რომ განათლებას, როგორც სექტორს, ეთმობოდა ყველაზე ნაკლები დაფინანსება.

ევროპელებისთვის რა იყო ხელმოსაჭიდი, მხოლოდ ის, რომ ბიუჯეტი გაიზარდა ამ მიმართულებით?

არა მხოლოდ. ეს რა თქმა უნდა, არის ძალიან მნიშვნელოვანი ფაქტორი, მაგრამ მთავარი ფაქტორი ეს არის ნდობა. ევროპელ კოლეგებს სწამთ, რომ ჩვენ შევძლებთ ამ ფუნდამენტური და ჩვენთვის სასიცოცხლოდ მნიშვნელოვანი რეფორმის გატარებას. ჩვენთვისაც, ეს არის ძალიან მნიშვნელოვანი ორიენტირი, ვინაიდან მარტო მასშტაბური ინვესტიციები არ კმარა. ჩვენ უნდა ვიყოთ ორიენტირებული ხარისხზე და ამ შემთხვევაში ხარისხის სტანდარტი ეს არის ევროპული ოჯახის მიერ გაცხადებული და უკვე დამკვიდრებული სტანდარტები და კრიტერიუმები. ამიტომ ვამბობ, რომ ეს არის ამავე დროს, პარალელურად დიდი პასუხისმგებლობაც, ვინაიდან ჩვენ, თითოეულმა ჩვენთაგანმა განათლების სისტემამ, უნივერსიტეტებმა უნდა შევძლოთ ის, რომ დავაკმაყოფილოთ ეს კრიტერიუმები. საქართველოში გაცემული ყველა დიპლომი იყოს სრულიად თავსებადი და აღიარებული ევროპულ ბაზარზე.

ჩვენს ამ მიღწევას, თან საშინაო დავალება მოჰყვება, რომელიც უნდა შევასრულოთ. ეს არის ვალდებულებები,  კრიტერიუმების და სტანდარტების დაკმაყოფილება. რა არის ეს კრიტერიუმები, რა სტანდარტია, რა ვადებზეა საუბარი? და საჭიროებს თუ არა ეს დამატებით ფინანსურ რესურსს? ჩვენ ვიცით, როგორც თქვენ დააანონსეთ, რომ განათლების სფეროსკენ მთლიანი შიდა პროდუქტის (მშპ) 6% მიემართება, მაგრამ თუკი ვითხოვთ უფრო ხარისხიანი, ევროპული დონის განათლების მიღებას, საჭიროებს თუ არა ეს დამატებით ფინანსურ ხარჯებს?

რა თქმა უნდა, ეს დაკავშირებულია ძალიან სერიოზულ ინვესტიციებთან. მე მინდა კიდევ ერთხელ საზოგადოებას შევახსენო, წელს ჩვენ განათლების სექტორისთვის განვსაზღვრეთ ბიუჯეტი 1,6 მილიარდი ლარი, ეს არის უკვე საკმაოდ სერიოზული წარმატება იმის ფონზე, რომ ჩვენ 2012 წელს აქტიურად ჩავიბარეთ უმძიმესი მემკვიდრეობა განათლების სისტემაში 600-მილიონიანი ბიუჯეტით. მომავალ წელს ბიუჯეტი იქნება 2 მილიარდი, 2021 წელს იქნება 2,5 მილიარდი და 2022 წელს ის გაუტოლდება 3,4 მილიარდ ლარს, რომელიც გახლავთ სწორედ ბიუჯეტის მეოთხედი და იმ კანონმდებლობით რომელიც შესულია და პარლამენტში არის განხილვის სტადიაში, შემდგომი მთავრობები, შემდეგი ათწლეულების განმავლობაში იქნებიან ვალდებული,რომ ბიუჯეტის მეოთხედი მიმართონ სწორედ განათლებაზე. ახლა რაც შეეხება თვითონ კრიტერიუმებს...

ანუ, დამატებითი რესურსი არ სჭირდება ამას...

რომ საჭიროებს დამატებით რესურსს, ამიტომ გვაქვს ჩვენ გაზრდილი ინვესტიციები ჩადებული, მათ შორის მომავალ წლებშიც და წელსაც. ახლა რაც შეეხება თვითონ კრიტერიუმებს. კრიტერიუმები, ბუნებრივია, არის საკმაოდ მკაცრი. ჩვენ უნდა დავიცვათ ევროპული ხარისხი. ეს ნიშნავს იმას, რომ სამინისტრო უნივერსიტეტებთან ერთად მოამზადებს სამოქმედო გეგმას, რომ ჩვენმა უნივერსიტეტებმა, ისევე როგორც პროგრამებმა, რომლებიც ისწავლება უნივერსიტეტებში, დააკმაყოფილონ სრულად ის კრიტერიუმები, რომელიც მოცემულია. ბუნებრივია, ამას დასჭირდება გარკვეული დრო. ამ შემთხვევაში უნდა დავეყრდნოთ სხვა ქვეყნების გამოცდილებასაც. ეს შეიძლება იყოს 18, 20, 24 თვე. ეს პროგრამებზე იქნება დამოკიდებული, მაგრამ, რა თქმა უნდა, ორიენტირებული უნდა ვიყოთ იმაზე, რომ უმოკლეს ვადაში შევძლოთ გავიაროთ ეს პერიოდი, ვინაიდან ის ინვესტიციები, რომელიც მიმართული იქნება ამ მიზნების მისაღწევად, ეს არის სრულიად საკმარისი იმისთვის, რომ ჩვენ შევძლოთ ჩვენი უმაღლესი განათლების სისტემის სტანდარტების გადაყვანა სრულიად სხვა, ამ შემთხვევაში ყველაზე მაღალ ევროპულ დონეზე.

წელიწადნახევარი, ორი წელი გვაქვს ამ კრიტერიუმების, ევროპული სტანდარტის  დასაკმაყოფილებლად...

ეს არის სხვა ქვეყნების მიერ განვლილი გზა.

როგორ მოხდება იმის შეფასება, შევასრულეთ თუ არა კარგად, ბეჯითად საშინაო დავალება? ან, ყველაზე ცუდი სცენარის მიხედვით, თუ ვერ შევასრულეთ, ამ შემთხვევაში რა ხდება, ვკარგავთ წევრობის უფლებას?

მინდა გითხრათ, რომ ამის შემოწმების კრიტერიუმები მართლაც საკმაოდ მკაცრია, მაგრამ, ბუნებრივია, ჩვენ საერთოდ არ გვაქვს მსგავსი მოლოდინი, პირიქით, ეს არის დამატებითი მოტივაცია, რომ ჩვენ ამას აუცილებლად შევძლებთ. ჩვენ ამაში დარწმუნებულები ვართ. ამ შემთხვევაში ეს არის წარმატება, რომელიც საქართველომ მოიპოვა, მაგრამ ამ შემთხვევაში, როდესაც ჩვენ ვსაუბრობთ უშუალოდ, რომ კრიტერიუმებმა და პროგრამებმა დააკმაყოფილონ კრიტერიუმები, რომელიც ENQA-ს აქვს განსაზღვრული, ეს უკვე არის უნივერსიტეტების პასუხისმგებლობა, რომ მათ მიერ შედგენილი პროგრამები, კურიკულუმები აკმაყოფილებდნენ იმ კრიტერიუმებს, რომელიც მოცემულია. მე მესმის, რომ ეს არ იქნება ადვილი გზა. უნივერსიტეტებს დასჭირდებათ დახმარება, აქიდან გამომდინარე ეს ნიშნავს, რომ ჩვენ ყველამ ერთად უნდა შევძლოთ გამოვიჩინოთ მაქსიმალური ერთსულოვნება ამ საქმეში, რომ წარმატებას მივაღწიოთ. კიდევ ერთხელ მინდა გავიმეორო, ეს იქნება საკმაოდ რთული გზა, მაგრამ ეს არის ერთადერთი გზა წარმატებისკენ. 

თქვენ ძალიან დეტალურად იცნობთ განათლების სფეროში ამ სიახლეებს, განსაკუთრებით იმ ფონზე, რომ მთავარ პრიორიტეტად განათლება დაასახელეთ. გვაქვს 4 სეგმენტი: სკოლამდელი, საშუალო, უმაღლესი და მეცნიერება. მაინც რომელ სეგმენტშია ყველაზე მეტი პრობლემა?

კიდევ არსებობს მეხუთე - პროფესიული განათლება, რომელიც ასევე ძალიან მნიშვნელოვანია. განსაკუთრებით იმის ფონზე, რომ ჩვენ გვსურს მივაღწიოთ ქვეყანაში ინკლუზიურ ზრდას, ისეთი ტიპის ეკონომიკურ ზრდას, რომელიც ყველა მოქალაქეს შეეხება და ბუნებრივია, პროფესიული განათლება არის უმთავრესი პრიორიტეტი. მე გამიჭირდება ამ ხუთი დონიდან გამოვყო რომელიმე, ვინაიდან ხუთივე არის სასიცოცხლოდ მნიშვნელოვანი ჩვენთვის. ჩვენ ხუთივე მიმართულებით გვჭირდება კონკრეტული მიზნების მიღწევა, მაგრამ, ბუნებრივია, ნებისმიერი განათლების სისტემის წარმატება დგას საშუალო სკოლის სიძლიერეზე. აქიდან გამომდინარე ჩვენთვისაც არის ეს უმთავრესი პრიორიტეტი. მე განვაცხადე, რომ ჩვენ მხოლოდ 7 მილიარდი გვჭირდება იმისთვის, რომ საქართველოში ყველგან შევქმნათ ევროპული ინფრასტრუქტურა საშუალო სკოლებისთვის, ჩვენი ბავშვებისთვის, შევცვალოთ პროგრამები, მოვახდინოთ ახალი მეთოდოლოგიის დანერგვა და მივაღწიოთ იმას, რაც არის თითოეული ქართველის ხედვა. აქიდან გამომდინარე, რა თქმა უნდა, ჩვენ განსაკუთრებულ აქცენტს ვაკეთებთ საშუალო სკოლაზე. 7 მილიარდი არის ძალიან დიდი თანხა, მაგრამ იქიდან გამომდინარე, ჩვენ ბიუჯეტში გავაკეთებთ ასეთ აქცენტს - ინვესტიციებზე განათლებაში, ეს ნიშნავს და ეს არის გარანტი იმისა, რომ შემდეგი რამდენიმე წლის განმავლობაში საქართველოს ყველა დასახლებულ პუნქტში იქნება უმაღლესი სტანდარტის, ევროპული ხარისხის სკოლა.

იმედი მაქვს და ვისურვებ, რომ წარმატებით ჩავაბაროთ ეს გამოცდა, დავაკმაყოფილოთ ყველა კრიტერიუმი და სტანდარტი და ვიყოთ სრულფასოვანი წევრი ამ ევროპული ოჯახის. მოდით, ახლა სხვა თემებს, მიმდინარე საკითხებს შევეხოთ. საბანკო რეგულაციებით დავიწყოთ. ამ თემაზე ორი განსხვავებული მოსაზრება გვაქვს. ერთი, ეროვნული ბანკის, რომელიც კმაყოფილია რეგულაციებით, რომელიც არსებობს და მეორე, ფინანსთა მინისტრის, რომელიც ფიქრობს, რომ ასეთი მკაცრი რეგულაციების ქონა არ არის მთლად აუცილებელი. ანუ, შეიძლება გარკვეულწილად შერბილდეს კიდევაც ეს რეგულაციები. მთავრობის მეთაურს რა პოზიცია აქვს ამ საკითხზე, ვისკენ იხრება?

რეალურად პოზიცია არის ერთი. მე მინდა გავიხსენო წინაისტორია. ჩვენ მივიღეთ უმძიმესი მემკვიდრეობა, როდესაც თითოეული მოქალაქე იყო დაუცველი კრედიტორის თუ კერძო მევახშის მიმართ, როდესაც საქართველოში გვქონდა 500-600-700-800-პროცენტიანი სესხები, როდესაც ადამიანს შეიძლება სესხის 90%-ი ჰქონოდა გასტუმრებული, მაგალითად, 1000 ლარიდან 900 ლარი და დარჩენილი 100 ლარის გამო მასზე დაერიცხათ 50 000-იანი ჯარიმა. ამას გამო მას დაეკარგა ბინა, მანქანა და პერსპექტივა ზოგადად. ჩვენ ამ სფეროში გვქონდა ისეთი თამაშის წესები, სადაც ჯარიმები და სხვადასხვა ტიპის საურავები აღწევდა ხოლმე 300-400-ს და ხშირ შემთხვევაში 1000 პროცენტსაც კი. ამან გამოიწვია ის, რომ ჩვენი მოსახლეობის უდიდესი ნაწილი აღმოჩნდა ეგრეთ წოდებულ შავ სიაში. იცით, რომ შემდეგ ჩვენ, ფონდი „ქართუს“ დახმარებით ეს პრობლემა მოვაგვარეთ, მოხდა ამ  სესხების ჩამოწერა და 600 000 ადამიანი გათავისუფლდა ამ წნეხისგან. ამავე დროს, ჩვენ დავამკვიდრეთ სამართლიანი თამაშის წესები ამ სფეროში, სადაც განსაზღვრულია მაქსიმალური ჭერი, რა შეიძლება იყოს ეფექტური პროცენტი, მაქსიმალურ ჯარიმა და ნებისმიერი ადამიანი დაცულია კრედიტორთან ურთიერთობაში. ამან გამოიღო კონკრეტული შედეგი, მათ შორის იმ რეიტინგებში, რომელშიც ჩვენ წინ წავიწიეთ და ამან საშუალება მოგვცა, რომ საქართველოში საპროცენტო განაკვეთები გარკვეულწილად დაწეულიყო. იცით, რომ მაგალითად იპოთეკურ სესხებზე ლარში მოხდა 3-4%-ით საპროცენტო განაკვეთებზე სესხების შემცირება და ჩვენი მთელი პოლიტიკა მიმართულია იმისკენ, რომ კიდევ უფრო მეტად მოვახდინოთ ლარში სესხების გაიაფება და დარწმუნებული ვარ, რომ ამას მივაღწევთ კიდეც. აქიდან გამომდინარე, მაკრო-ეკონომიკურად, ისევე როგორც სოციალური, ისე როგორც სამართლიანობის განცდის თვალსაზრისით ეს იყო ერთადერთი სწორი ნაბიჯი. შესაბამისად, ეს არის ვექტორი, ეს არის გენერალური ხაზი. რაც შეეხება დაკორექტირებას ამ პოლიტიკის, ეკონომიკა არის ცოცხალი სხეული, მასში წარმოდგენილია რამოდენიმე სექტორი. თუ რომელიმე სექტორში ციფრები მოგვცემს იმის უფლებას ვთქვათ, რომ შეიძლება ამ ტიპის რეგულაციამ გამოიწვიოს ამა თუ იმ სექტორის განვითარების შეფერხება, რეაგირება მყისიერი იქნება. ამ უწყებებს ხელმძღვანელობენ პროფესიონალი ადამიანები, ისინი მიიღებენ პროფესიონალურად უმაღლესი სტანდარტის გადაწყვეტილებას, რომელიც იქნება ნაკარნახევი იმ ინტერესებიდან გამომდინარე, რომელიც აქვს ჩვენს საზოგადოებას. რაც ბოლო ნაბიჯი გადაიდგა რეგულაციებში, გასულია მხოლოდ 4 თვე, აქიდან გამომდინარე ჯერ ნაადრევია ჩვენ ვისაუბროთ ამაზე...

ეროვნული ბანკის პრეზიდენტი კმაყოფილია ამ მონაცემებით, მაგრამ ფინანსთა მინისტრი მაინც არ ეთანხმება...

არა, ეს ასე არ არის...

მონაცემებს არა, ყოველ შემთხვევაში, გარკვეული რეგულაციების შერბილებაზე საუბრობს...

გენერალურ ხაზს ყველა ეთანხმება, ვინაიდან ამან მოგვცა სწორედ ჩვენ ის შედეგი, რაც პოზიტიური დავინახეთ, მაგრამ ჩვენ ვსაუბრობთ ამ შემთხვევაში ამ რეგულაციის გავლენაზე სხვადასხვა სექტორში. მთლიანად, მთელი ეკონომიკისთვის ეს იყო ერთადერთი სწორი ნაბიჯი. ჩვენ ვსაუბრობთ, რომ  გარკვეულ სექტორებში თუ სტატისტიკური მონაცემები იქნება იმისთვის საკმარისი, რომ რომელიმე სექტორისთვის ეს პოლიტიკა მცირედით გადაიხედოს, ბუნებრივია, უწყებების ხელმძღვანელები, დარწმუნებული ვარ, ამას გააკეთებენ.

გადახედვას არ გამორიცხავს მთავრობის მეთაური, თუკი...

არა, გენერალური ხაზიდან გადახედვას გამოვრიცხავ...

გენერალური ხაზიდან არა, მაგრამ ცალკეულ სეგმენტებში...

ცალკეულ სეგმენტებშიც გამოვრიცხავ, აქ საუბარია დაკორექტირებაზე. პასუხისმგებლიანი დაკრედიტების სისტემა, რომელიც არის გარანტია იმისა, რომ ჩვენი მოქალაქეები იყვნენ დაცული, მათი ინტერესები იყოს დაცული, ბუნებრივია, ეს არ გადაიხედება. ჩვენ ეს ჩავაბარეთ წარსულს ყველამ ერთად და დავიწყეთ ახალი ფურცლიდან ახალი თამაშის წესების დადგენა. დარწმუნებული ვარ, ამ გზაზე ჩვენ ვიქნებით წარმატებულები.

პანკისში განვითარებულ მოვლენებს უნდა შევეხოთ, 21 აპრილის ინციდენტს. პირადად თქვენ და მთავრობის სხვა წევრები ამ თემის ასეთ შეფასებას აკეთებდით - ცუდი და მძიმე. აღიწერა ბევრი გარემოება. დღეს რა ვითარებაა მთავრობისა და პანკისის მოსახლეობის ურთიერთობების მხრივ?   

სამწუხაროდ, პანკისში მოხდა ის, რაც არ უნდა მომხდარიყო. ეს არ შეეფერება არც ჩვენს წარსულს, არც აწმყოს და არც მომავალს, იმ ქვეყანას, რომელსაც თითოეული ჩვენთაგანი აშენებს. მე კიდევ ერთხელ მსურს, ჩემი განსაკუთრებული პატივისცემა გამოვხატო ჩვენი ქვეყნის შვილების მიმართ, რომლებიც ცხოვრობენ ამ ულამაზეს კუთხეში. აქვე, ქართულმა საზოგადოებამ იხილა ის ძალიან მძიმე კადრები და ბუნებრივია, ეს არის დაუშვებელი. ჩვენ გვაქვს მომზადებული, მათ შორის ადგილობრივი მოსახლეობის ჩართულობით, პანკისის ხეობის განვითარების გეგმა. პანკისის ხეობაში არსებობს პრობლემები, რომელიც ისტორიულად დაგროვდა და მას ობიექტურად სჭირდება გადაწყვეტა. რა თქმა უნდა, ჩვენ ამას ვერ შევძლებთ, რომ ორ-სამ თვეში ყველა ეს პრობლემა გადაიჭრას, რაც იქ არსებობს, მაგრამ ის გეგმა, რომელიც არის წარმოდგენილი და მათ შორის ბევრი ინიციატივა არის ნაკარნახები ადგილობრივი მოსახლეობის მხრიდან, მე ვფიქრობ ძალიან კარგად პასუხობს იმ გამოწვევებს, რომელიც არის ამ კუთხეში. ჩვენი სამინისტროები ძალიან აქტიურ კონტაქტზე არიან პანკისში მცხოვრებ მოქალაქეებთან. მეც ძალიან ბევრი წერილი მივიღე ამ საკითხთან დაკავშირებით. ორშაბათსაც იქნება ძალიან საინტერესო შეხვედრა და მე დარწმუნებული ვარ, ჩვენ ძალიან ღირსეულად შევძლებთ გავუმკლავდეთ ყველა იმ გამოწვევას, რომელიც შეიძლება არსებობდეს პანკისის ხეობაში.

თქვენ თქვით, რომ არ უნდა მომხდარიყო, რაც მოხდა. მაინც, რა იყო ამის მიზეზი, თუ გამოიკვლიეთ უკვე და თუ შეგიძლიათ გვითხრათ. პირველ დღეს ითქვა, რომ არასაკმარისი კომუნიკაცია იყო, მაგრამ დამატებით ხომ არ ყოფილა კიდევ რამე. იქ, ადგილობრივი მოსახლეობის მხრიდან მთავარ პრობლემად ეკოლოგია სახელდება, რომ სწორედ ეკოლოგიური საკითხებიდან გამომდინარე არ სურთ ასეთი ინვესტიციის განხორციელება ხეობაში.

შესაბამისი ორგანოები, ბუნებრივია, აკეთებენ ანალიზს, თუ რეალურად რასთან გვქონდა საქმე და ბუნებრივია, როდესაც ეს მომენტი დადგება, მე საზოგადოებას კიდევ ერთხელ განვუმარტავ ამ ყველაფერს. ფაქტი არის ერთი, რაც მოხდა, ის არ უნდა მომხდარიყო. თუმცა შემდეგ, უკვე ის კომუნიკაცია რაც შედგა, მე მაძლევს იმის თქმის საშუალებას, რომ ჩვენ აუცილებლად შევძლებთ გავუმკლავდეთ ყველა იმ გამოწვევას, რომელიც არის პანკისის ხეობაში ობიექტურად. ამასტან ერთად, თქვენ ახსენეთ ჰიდროელექტროსადგური, ეკოლოგია და მწვანე პოლიტიკა, რომელიც არის უმთავრესი პრიორიტეტი ჩვენი მთავრობის. ჩვენმა განვლილმა გზამ, მე ვფიქრობ, ყველა ამ კითხვას გასცა ძალიან მაღალი სტანდარტის პასუხი. ეს არ არის „ქართული ოცნების“ ხელწერა, რომ ჩვენ განვახორციელოთ პროექტები რეგიონებში, არ აქვს მნიშვნელობა სად, რომ არ გვქონდეს კომუნიკაცია ადგილობრივ მოსახლეობასთან და არ გვქონდეს დაცული უმაღლესი ეკოლოგიის სტანდარტები. ბუნებრივია, ჩვენ ამ გზით გავაგრძელებთ სიარულს. ამასთან ერთად, თითოეულ ჩვენგანს კარგად უნდა გვესმოდეს, რომ ჩვენ გვაქვს ეკონომიკური გამოწვევები, სიღარიბე არის საქართველოს მტერი და ჩვენ ის უნდა დავძლიოთ. ეკონომიკის განვითარება არის დამოკიდებული იმაზე, თუ რამდენად შევძლებთ ჩვენ დამატებითი ენერგიის მიწოდებას ჩვენი ეკონომიკისთვის. იცით, რომ ბოლო პერიოდში მნიშვნელოვნად გაიზარდა იმპორტი საქართველოში ელექტროენერგიის. ეს კიდევ ერთხელ არის ნათელი დასტური იმისა, რომ ჩვენ გვჭირდება მეტი დადგმული სიმძლავრე ელექტრო ენერგეტიკაში საქართველოში. სხვანაირად ჩვენ გაგვიჭირდება სწრაფი ეკონომიკური ზრდის მიღწევა, მაგრამ ბუნებრივია ეს არასდროს არ მოხდება ადგილობრივი მოსახლეობის ინტერესი ხარჯზე და მეორე, ეს არასდროს არ მოხდება ეკოლოგიის ხარჯზე.

თქვენ ახლა ეკოლოგია, ადგილობრივ მოსახლეობასთან კომუნიკაცია დაასახელეთ. როდესაც ეკოლოგიაზე ვსაუბრობთ, ალბათ თქვენც გსმენიათ ეკოომბუდსმენთან დაკავშირებით, რომ ძალიან ბევრი კითხვა ისმის ვინ არის დევიდ მორისონი, რამდენად იცნობს ის საქართველოს გარემოს და რატომ გახდა აუცილებელი უცხო ქვეყნის სპეციალისტის მოწვევა საქართველოში. ეს მიმართულება ძალიან სენსიტიურია და ამ ადამიანმა, ამ თანამდებობის პირმა კარგად უნდა იცოდეს ალბათ კონტექსტი იმ რეგიონის, რომ გარკვეული კომუნიკაცია დაამყაროს ადგილობრივ მოსახლეობასთან და შეძლებს ამას?

დევიდ მორისონზე იმის თქმა, რომ უცხო ქვეყნის სპეციალისტია, ალბათ ცოტა რთულია, იქიდან გამომდინარე, რომ ბოლო 11 წელია აქტიურად არის ჩაბმული ამ საქმეში. მინდა საზოგადოებას მივაწოდო ინფორმაცია, რომ მან ჯერ კიდევ 10 წლის წინ დააფუძნა ერთ-ერთი ყველაზე აქტიური ფონდი საქართველოში „კავკასიის ბუნების ფონდი“ და ის პერსონალურად მონაწილეობდა ძალიან ბევრ პროექტში, რომელმაც შანსი მოგვცა შეგვენარჩუნებინა ჩვენი უნიკალური ბუნება და ბიომრავალფეროვნება. ეს იქნებოდა ვაშლოვანის ნაკრძალი, ეს იქნებოდა გადაწყვეტილებები, რომ ჩვენ დაგვემატებინა 100 ათასობით ჰექტარი დაცული ტერიტორიები ჩვენს პოლიტიკაში, ეს იქნებოდა რეინჯერების პროგრამა თუ ბევრი სხვა. ეს არის ადამიანი, რომელმაც ძალიან კარგად იცის, თუ რა ტიპის ეკოლოგიური გამოწვევების წინაშე დგას საქართველო. მე მინდა ასევე ხაზი გავუსვა, რომ ჯერ კიდევ შარშან, როდესაც წარვადგინე სამთავრობო პროგრამა, იქ ჩვენ გვქონდა მითითებული, რომ ჩვენ აუცილებლად შევქმნიდით გარემოს დაცვითი ომბუდსმენის ინსტიტუტს, იმიტომ რომ, ჩვენ რეალობას უნდა გავუსწოროთ თვალი. საქართველოში დიახ, ჩვენ გვაქვს ეკოლოგიური გამოწვევები, ეს არის შედეგი იმისა, რომ ბოლო ათწლეულების განმავლობაში ტარდებოდა სრულიად უპასუხისმგებლო პოლიტიკა, გარემოს დაცვითი ინტერესები იგნორირებული იყო და ბუნება და ჩვენი ულამაზესი გარემო, რაც არის საქართველოში, არის მთავარი ფასეულობა, მთავარი სიმდიდრე, რომელიც უნდა გადავცეთ ჩვენ მომავალ თაობებს. ეს არის დიდი მორალური პასუხისმგებლობა. აქიდან გამომდინარე, ხედვა იყო, რომ ჩვენ შეგვექმნა ინსტიტუტი, სადაც შევძლებდით შეგვექმნა ერთგვარი ფორმატი, პლატფორმა კომუნიკაციისა ყველასთან, სამოქალაქო საზოგადოებასთან, ადგილობრივ მოსახლეობასთან, საერთაშორისო დონორებთან, რომ მეტი თანხების მოზიდვა შევძლოთ ჩვენ ჩვენი მწვანე პოლიტიკის გატარებაში. მათ შორის, საერთაშორისო არასამთავრობო ორგანიზაციებთან, რომ საბოლოო ჯამში მიგვეღო ყველაზე ეფექტური პოლიტიკა, რომ გავმკლავებოდით ეკოლოგიურ გამოწვევებს საქართველოში. ვფიქრობ, რომ დევიდ მორისონი და მისი გუნდი ჩვენ ამ ნაწილში ძალიან დაგვეხმარება.

შემდეგი საკითხია დავით გარეჯი. ბოლო ინფორმაციით, შეიქმნება აზერბაიჯანთან საზღვრის დელიმიტაციის კომისია. ვინ იქნება ამ კომისიის წევრი და ვართ თუ არა მზად აზერბაიჯანთან დიალოგისთვის ამ საკითხზე?

მას შემდეგ, რაც ეს პრობლემა დაიწყო, ბუნებრივია, მე დავალება მქონდა მიცემული ყველა უწყებისთვის და ისინი თავის კოლეგებთან ინტენსიურ კავშირზე იყვნენ. ბუნებრივია, ინტენსიური კომუნიკაცია მიმდინარეობდა საგარეო საქმეთა მინისტრებს შორის და იცით, რომ მოხდა შეთანხმება. ამ შეთანხმების მიხედვით, ჩვენც და აზერბაიჯანული მხარეც შევქმნით კომისიას, ჩვენ შემთხვევაში ეს იქნება განახლებული კომისია, რომელსაც უახლოეს მთავრობის სხდომაზე დავამტკიცებთ. იქ შევა ყველა იმ უწყების წარმომადგენელი, რომელიც ჩართული უნდა იყოს ამ პროცესში და დავიწყებთ დელიმიტაციისა და დემარკაციის პროცესს. ბუნებრივია, ეს პროცესი საკმაოდ რთული და დროში ტევადია. აქვე, რა თქმა უნდა, ჩვენ შევთანხმდით, რომ მანამდე, სანამ იქნება კონკრეტული გადაწყვეტილებები ამ მიმართულებით, სამონასტრო კომპლექსის სხვადასხვა მიმართულებაზე ჩვეულებრივი პრაქტიკით გაგრძელდება გადაადგილება. მე ძალიან კარგად მესმის, რომ თითოეული ქართველისთვის, მათ შორს ჩემთვის ეს არის ძალიან ემოციური საკითხი, მაგრამ კიდევ ერთხელ მსურს მივმართო ყველას და ვთხოვო, რომ თავი შევიკავოთ გადაუმოწმებელი ინფორმაციის გავრცელებისგან, ემოციური გამონათქვამებისგან, რომელსაც ნამდვილად არ აქვს კავშირი რეალობასთან. ჩვენ და აზერბაიჯანი ვართ მეგობარი ქვეყნები, ჩვენ ვართ სტრატეგიული პარტნიორები და დარწმუნებული ვარ, ეს საკითხი ისე გადაწყდება, როგორც შეეფერება ჩვენი ურთიერთობის სულისკვეთებას.

გიორგი გახარია მიმდინარე კვირას უსაფრთხოების საბჭოს მდივნად დაინიშნა. რატომ გაკეთდა არჩევანი გიორგი გახარიაზე? თქვენი ოპონენტები უკვე ჭარბ უფლებამოსილებაზე საუბრობენ. ხომ არ მივიღებთ იგივე სურათს, რაც წარსულში გვქონდა, რის გამოც შინაგან საქმეთა სამინისტრო და უსაფრთხოების სამსახური შემდეგ გაიყო და ცალ-ცალკე უწყებებად ჩამოყალიბდა. თუკი მოქმედი თანამდებობის პირს უნდა დაეკავებინა მაინცდამაინც ეს თანამდებობა, რატომ შინაგან საქმეთა მინისტრი და რატომ უსაფრთხოების სამსახურის უფროსი არა?

პირველ რიგში მინდა გითხრათ, რომ უსაფრთხოების საბჭო იქნება უმნიშვნელოვანესი რგოლი და ის ძალიან აქტიურად იქნება ჩართული ძალიან ბევრი მიმართულებით. ჩვენ აღნიშნული საბჭოს შექმნასა და მომზადებაში გვეხმარებოდნენ ჩვენი საერთაშორისო პარტნიორები. აქედან გამომდინარე, თუ კითხვა არის თვითონ შინაარსობრივ საქმიანობაზე, ეს საბჭო რას გააკეთებს, მე ვფიქრობ, რომ ამ ნაწილში სტრუქტურა არის საკმაოდ გამართული. ეს იქნება სათათბირო ორგანო პირადად ჩემი და ამავე დროს, რაც ძალიან მნიშვნელოვანია, მან უნდა უზრუნველყოს კოორდინაცია ყველა სხვა უწყებას შორის. საბოლოო ჯამში, კითხვის ნიშანი, რაც თქვენ ახსენეთ, უკავშირდება თვითონ რამდენად სწორია ეს, რომ არსებული მინისტრი შეითავსებს ამ მდივნის პოსტს. ამ შემთხვევაში ჩვენ შევისწავლეთ სხვა ქვეყნების გამოცდილებაც და მინდა გითხრათ, რომ ევროპულ ქვეყნებში ეს აპრობირებული მეთოდია. აქედან გამომდინარე, მე მაქვს იმის მოლოდინი, რომ ჩვენს შემთხვევაშიც ეს ეფექტურად იმუშავებს. ჩვენ გვჭირდება ქმედითი უსაფრთხოების საბჭო. ვფიქრობ, რომ ის სტრუქტურა რომელიც არის წარმოდგენილი, ამასთან ერთად, ის სამოქმედო გეგმა, რომელიც წარმოდგენილი იქნება ერთი თვის ვადაზე, ეს იქნება გარანტია იმისა, რომ უსაფრთხოების საბჭო იფუნქციონირებს წარმატებულად და ეფექტურად.

რადგან კადრების თემას შევეხეთ, უამრავი ვერსია ისმის საკადრო ცვლილებებთან დაკავშირებით, მათ შორის მთავრობის წევრებს შორის, მინისტრთა კაბინეტში. აქვს ამ ვერსიებს რაიმე საფუძველი? ხომ არ იგეგმება რაიმე ცვლილება ან რა შემთვევაში იგეგმება ცვლილება მინისტრთა კაბინეტში?

უახლოეს მომავალში მინდა დაგიდასტუროთ, რომ არ იგეგმება. მე ძალიან ბევრჯერ დამისვეს უკვე ეს შეკითხვა და ჩემი პასუხი ამ შემთხვევაში არის ძალიან მარტივი. მე და ჩემმა გუნდმა წარვადგინეთ სამთავრობო პროგრამა საქართველოს პარლამენტში, როდესაც მოხდა ახალი მთავრობის დამტკიცება. ჩვენ გვაქვს გაწერილი ჩვენი პროგრამა 2019-2020 წლებზე. ჩვენი საბიუჯეტო რესურსი ამ 2 წლის განმავლობაში იქნება დაახლოებით 26-27 მილიარდი ლარი. ბუნებრივია, მე არ მაქვს იმის ილუზია, რომ ჩვენ ამ რესურსით შევძლებთ საქართველოს წინაშე არსებული ყველა პრობლემის დაძლევას, მაგრამ ეს არის ძალიან მნიშვნელოვანი რესურსი, იმისთვის, რომ ჩვენი მოქალაქეების ცხოვრების პირობა გავაუმჯობესოთ, შევეხიდოთ მათ იმ პრობლემების დაძლევაში, რომელიც სამწუხაროდ ობიექტურად დღეს საქართველოში გვაქვს. აქედან გამომდინარე, ჩემი შეფასებაც არის ასეთი, რომ  თუ რომელიმე რგოლი ამ პროგრამის შესრულებისას, რომელსაც სჭირდება საკმაოდ სწრაფი ტემპები, რომელსაც სჭირდება მენეჯმენტის ძალიან მაღალი ხარისხი, ვერ შეძლებს პროგრამის რომელიმე ნაწილის შესრულებას, რა თქმა უნდა, ჩვენ ვართ გუნდი და მივიღებთ გადაწყვეტილებას, რასაც მივიღებთ. მათ შორის ეს იქნება საკადრო გადაწყვეტილებებიც. მე აქვე ისიც მინდა აღვნიშნო, რომ მე კარგად მესმის, რომ  როგორც ცენტრალური ხელისუფლების, ასევე ადგილობრივი ხელისუფლების დონეზე, ჩვენ გვაქვს ხარვეზები ყოველდღიურ საქმიანობაში. მათი ნაწილი უკვე აღმოფხვრილია და ვიცით, როგორ გამოვასწოროთ ის, რაც დარჩენილია. ეს პრობლემები არსებობს, ეს ხარვეზები არსებობს, ჩვენ ეს დავინახეთ და ჩვენ გვაქვს კონკრეტული გეგმა, თუ როგორ გამოვასწოროთ ის. აქედან გამომდინარე, ჩემი პასუხი იქნება, რომ პროგრამის შესრულების სიჩქარეზე, ტემპებზე, ეფექტურობაზეა ყველაფერი დამოკიდებული.

ახლა, ჯერჯერობით, ყველა უწყობს ფეხს მინისტრთა კაბინეტიდან?

მე მინდა გითხრათ, რომ ბოლო 3 თვის განმავლობაში ჩვენ თუ ვნახავთ ციფრებს, ჩვენ გვაქვს მნიშვნელოვანი ხარისხობრივი გაუმჯობესება თუნდაც შარშანდელ წელთან შედარებით.

ევროსაბჭოს მინისტრთა კომიტეტის მოადგილეების სხდომაზე მიღებულ გადაწყვეტილებასთან დაკავშირებით უნდა ვისაუბროთ. თქვენ ხაზგასმით აღნიშნეთ ამ გადაწყვეტილების მნიშვნელობაზე, სადაც თქვით, რომ მივიღეთ ძალიან მნიშვნელოვანი გზავნილი ევროსაბჭოსგან, რომ არავინ არასოდეს შეეგუება რუსეთის მიერ ჩვენი ტერიტორიების 20%-ის ოკუპაციას. განსაკუთრებულად გამოყავით ეს გადაწყვეტილება და რატომ? რითი განსხვავდება ეს გადაწყვეტილება ამავე შინაარსის და ამავე თემაზე მიღებული სხვა გადაწყვეტილებებისგან?

ევროსაბჭოს ეს დოკუმენტი არის ძალიან მნიშვნელოვანი დატვირთვის და შინაარსის. მასში არის გაკეთებული ძალიან მნიშვნელოვანი აქცენტები. მე მინდა რამდენიმე მათგანი დაგისახელოთ. პირველი, ეს ეხება რუსეთის ფედერაციის აგრესიას საქართველოს მიმართ. იმ ფაქტს, რომ ის განაგრძობს ჩვენი ტერიტორიების 20%-ის ოკუპაციას. რუსული პროპაგანდა სამწუხაროდ განაგრძობს დეზინფორმაციის კამპანიას, რომ თითქოს საქართველოში ოკუპირებული ტერიტორიები ეს არ არის შედეგი საქართველო-რუსეთს შორის კონფლიქტისა. ეს არ არის შედეგი იმისა, რომ რუსეთის ფედერაცია ახორციელებს პირდაპირ აგრესიას საქართველოს მიმართ. ამ დოკუმენტში არის მოცემული კონკრეტულად და არის კონკრეტული შეფასებები მიცემული რუსეთის ფედერაციის აგრესიის  მიმართ საქართველოსთან დაკავშირდებით. მეორე, ეს გახლავთ თვითონ ჰუმანიტარული სიტუაციის შეფასება ოკუპირებულ ტერიტორიებზე. ჩვენ, სამწუხაროდ, გვაქვს ორივე ოკუპირებულ რეგიონში ჰუმანიტარული კატასტროფა. ამას სხვას ვერაფერს ვერ ვუწოდებთ და აქედან გამომდინარე არის ძალიან მნიშვნელოვანი მოწოდებები, თუ როგორ მოხდეს ამ ჰუმანიტარული კატასტროფის დაძლევა. მესამე საკითხი, რომელიც უკავშირდება ადამიანთა უფლებების დაცვას, მათ შორის კონკრეტულად საუბარია ტატუნაშვილი-ოთხოზორიას სიაზე, იმ ადამიანებზე თუ არაადამიანებზე, რომლებმაც ჩაიდინეს ეს სასტიკი დანაშაული და ბუნებრივია, მათ გაეცემათ საკადრისი პასუხი. აქ საუბარია ამავე დროს ჩვენს ძალიან მნიშვნელოვან ინიციატივაზე, მის მხარდაჭერაზე, „ნაბიჯი უკეთესი მომავლისკენ“. ჩვენ გვწამს, რომ ეს არის ერთადერთი სწორი გზა ამ სიტუაციაში. მე ვფიქრობ, რომ აღნიშნული დოკუმენტი კიდევ ერთხელ ცხადყოფს, რომ საქართველოში არსებული პრობლემები -  ოკუპაცია, ის ჰუმანიტარული კატასტროფა, რაც არის ორივე ოკუპირებულ რეგიონში, ეს დოკუმენტი არის ნათელი მაგალითი იმისა, რომ ჩვენ ვიმყოფებით საერთაშორისო პოლიტიკაში, საერთაშორისო პოლიტიკის დღის წესრიგში და აქედან გამომდინარე ამ დოკუმენტს აქვს ძალიან დიდი მნიშვნელობა და ბუნებრივია, მადლობა ეკუთვნით ჩვენს მეგობრებს ევროსაბჭოში ამ ძალიან მნიშვნელოვანი გზავნილებისთვის.

ამავე დოკუმენტში არის საუბარი რუსეთის ფედერაციის სამხედრო ყოფნაზე საქართველოს ტერიტორიაზე აფხაზეთსა და სამხრეთ ოსეთში და მის საფრთხეზე რეგიონში. რამდენად უქმნის ის მშვიდობასა და უსაფრთხოებას პრობლემას მისი არსებობა. ამავე კონტექსტში მინდა გკითხოთ, ამერიკის სამხედრო ბაზის მშენებლობასთან დაკავშირებით საქართველოს ტერიტორიაზე, ამაზე, სხვათა შორის, პრეზიდენტს დაუსვეს კითხვა, „ამერიკის ხმის“ მიერ იყო დასმული და მან განაცხადა, რომ ეს არ არის რეკომენდებული. თქვენ როგორ უყურებთ ამ საკითხს?

ჩვენ ძალიან ინტენსიურად და საკმაოდ დიდი ხნის განმავლობაში ვცდილობდით, რომ მიგვეტანა ძალიან მნიშვნელოვანი გზავნილი ჩვენი დასავლელი პარტნიორებისთვის, რომ შავი ზღვის რეგიონის უსაფრთხოების გარეშე წარმოუდგენელია ვისაუბროთ მდგრადი უსაფრთხოების სისტემებზე ევროპული ოჯახისთვის, თუ ევროატლანტიკური ოჯახისთვის. მოგეხსენებათ, რომ ნატო-ს ბოლო ინიციატივების მიხედვით, სწორედ შავი ზღვის რეგიონის უსაფრთხოება ხდება მთავარი პრიორიტეტი ნატო-სთვის და ეს არის ძალიან დიდი წარმატება. ისევე როგორც, ევროკავშირმა დააფიქსირა ერთმნიშვნელოვანი პოზიცია ამ საკითხთან დაკავშირებით. მე მინდა სრული პასუხისმგებლობით განვაცხადო, რომ ჩვენი ურთიერთობა ნატო-სთან, ჩვენი ურთიერთობა ევროკავშირთან, ჩვენი ურთიერთობა ჩვენს სტრატეგიულ პარტნიორთან, ამერიკის შეერთებულ შტატებთან, ასეთ მაღალ დონეზე არასდროს ყოფილა. ეს არის დიდი წარმატება და ჩვენ ვაპირებთ ამ წარმატების კიდევ უფრო გაღრმავებას. აქედან გამომდინარე, ჩვენ ყოველთვის მივიღებთ იმ გადაწყვეტილებებს, რომელიც არის საქართველოს ეროვნულ ინტერესებში.

სამხედრო ბაზებთან დაკავშირებითაც?

ეს არის ჩემი პასუხი - ჩვენ ყოველთვის მივიღებთ იმ გადაწყვეტილებას, რომელიც არის იმ სულისკვეთებაში, რომელიც არსებობს საქართველოსა და ნატო-ს, საქართველოსა და ამერიკის შეერთებულ შტატებს შორის და რაც მთავარია ეხმიანება ჩვენ ეროვნულ ინტერესებს.

რადგან სამხედრო თემატიკას ვეხებით, თქვენ თითქმის ყველა გამოსვლაში ხაზს უსვამთ ქართველი ჯარისკაცების წვლილს საერთაშორისო მისიებში. ეს ძალიან კარგია, მაგრამ რას აკეთებს სახელმწიფო ამ ადამიანების პატივსაცემად, მათი ოჯახების, მათი შვილების? ქართველ ჯარისკაცებს ვგულისხმობ.

ნებისმიერი საზოგადოებისა და ერის სახელმწიფოებრივი აზროვნება ჩემი აზრით განისაზღვრება იმის მიხედვით, თუ რა დამოკიდებულა აქვს მას თავისი ჯარისა და ჯარისკაცების მიმართ, რომლებიც თავიანთი სიცოცხლის ფასად იცავენ სამშობლოს თავისუფლებას, მის სუვერენიტეტსა და უსაფრთხოებას. აქედან გამომდინარე, ჩვენთვის ყოველთვის განსაკუთრებული მნიშვნელობა ჰქონდა იმისთვის, რომ ჩვენ სოციალური პირობები მაქსიმალურად გაგვეუმჯობესებინა იმ რესურსის პირობებში, რაც გვქონდა ჩვენი ჯარისკაცებისთვის და რამდენიმე დღის წინ ჩვენ დავაანონსეთ ძალიან მნიშვნელოვანი ინიციატივა. მახათას მთაზე აშენდება ახალი საცხოვრებელი უბანი ჩვენი ოფიცრებისთვის და მათი ოჯახის წევრებისთვის. შვიდასამდე ოჯახზეა საუბარი, მაგრამ ეს არის მხოლოდ პირველი ნაბიჯი.  მას შემდეგ, რაც ეს პროგრამა დასრულდება, ჩვენ დავიწყებთ მყისიერად მეორე პროგრამას. ამ შემთხვევაში ეს იქნება გათვლილი 2000 ოფიცერზე და ეს არის სწორედ ჩვენი სულისკვეთება. ჩვენ გვსურს, რომ სოციალური პაკეტი და ამავე დროს რწმენა ნათელი მომავლის აუცილებლად იყოს ჩვენს ოფიცრებში, ჩვენს ჯარისკაცებში. ეს არის განსაკუთრებულად დასაფასებელი ხალხი. მე ვარ განსაკუთრებით ამაყი, როდესაც ვისმენ ჩვენი უცხოელი პარტნიორებისგან შეფასებას ქართველი ჯარისკაცის შესახებ. ეს არის ყოველთვის საუკეთესო და ეს არის მართლაც ძალიან დიდი სიამაყის მომგვრელი. აქედან გამომდინარე, ჩვენ გავაგრძელებთ ამ პროგრამებს და მე ვფიქრობ, რომ კიდევ არაერთი სიურპრიზი გველის ამ მიმართულებით.

დაველოდებით ამ სიურპრიზს.  ორ კვირაში გვაქვს შუალედური არჩევნები რამდენიმე ოლქში, მათ შორის ერთ-ერთი ყველაზე ცენტრალური და საინტერესოა ზუგდიდში მიმდინარე მოვლენები. რა პროგნოზი გაქვთ ამ არჩევნებთან დაკავშირებით, შეძლებს ხელისუფლების კანდიდატი პირველივე ტურში მოიპოვოს გამარჯვება ყველა ოლქში?

ბოლო მონაცემებით რაც ჩვენ გვაქვს, ყველგან დამაჯერებლად ლიდერობენ ჩვენი კანდიდატები. აქედან გამომდინარე, ჩვენც გვაქვს შესაბამისი მოლოდინი და ბუნებრივია, ეს არჩევნები იქნება კიდევ ერთი მაგალითი იმისა, რომ საქართველოში არჩევნები ტარდება თავისუფალ გარემოში, უმაღლესი სტანდარტით. მე დარწმუნებული ვარ, რომ ყველა ჩვენი კანდიდატი მიაღწევს სერიოზულ წარმატებას.

ვიდეო