20 ოქტომბერი 2018

„9 წელს კი არა, 90 წელს გაგრძელდება ლაპარაკი, რომ აღარასოდეს განმეორდეს ის უბედურება“

რამ მისცა ბიძგი ბადრი პატარკაციშვილის საქმის გამოძიებას

მიმდინარე კვირას პროკურატურამ საზოგადოებას ბადრი პატარკაციშვილის მკვლელობის მომზადების საქმეზე 2016 წელს მოპოვებული ფარული აუდიო ჩანაწერები გააცნო. სავარაუდოდ, ყოფილი მაღალჩინოსნები, მათ შორის კუდ-ის მე-2 სამმართველოს ყოფილი უფროსი გიორგი დგებუაძე, იგივე „მასტერა“, ბიზნესმენის დაცვის წევრისგან ბადრი პატარკაციშვილის შესახებ დეტალური ინფორმაციის მოპოვებას ცდილობს. ჩანაწერის მიხედვით ეს ინფორმაცია საუბრის მონაწილეებს კონკრეტული მიზნისთვის - ბიზნესმენის ლიკვიდაციისთვის სჭირდებათ. ამ მიზნის მისაღწევად კი განიხილება ისეთი ნივთიერების მოპოვება, რომელიც ადამიანის გარდაცვალების შემდეგ მის სხეულში კვალს არ ტოვებს. პროკურატურამ ბრალი 4 ადამიანს წაუყენა. ამ თემაზე მთელი კვირის განმავლობაში პოლიტიკური დებატები არ შეწყვეტილა. თემაზე „ქრონიკის“ წამყვანის, თეა სიჭინავას კითხვებს რეჟისორმა გოგა ხაინდრავამ უპასუხა.
 

გოგა ხაინდრავა

გოგა ხაინდრავა

როგორც ბადრი პატარკაციშვილის მეგობარი, თქვენ წლების განმავლობაში მუდმივად აქცენტს აკეთებდით ამ საქმეზე და არ იზიარებდით იმ ვერსიას, რომელსაც ოფიციალურად გვთავაზობდნენ თუნდაც საგამოძიებო უწყების წარმომადგენლები?

არც არანაირი ვერსია არ ყოფილა...

ბუნებრივი გარდაცვალების შესახებ?

ეს ვერსია არავის მიერ არ იყო დამტკიცებული. თუმცა საკითხი იყო ძალიან მნიშვნელოვანი. როგორც სკრიპალების საქმემ აჩვენა, რომელმაც ბრიტანეთის სპეციალური ორგანოები ბოლო-ბოლო მიიყვანა იმ საკითხთან, რომ ასეთი მკვლელობები ხდება და ამ მკვლელობების წყარო და მისამართი ერთი და იგივეა. ამან გამოიწვია ამ საქმით დაინტერესება. მახსოვს, პირველივე დღეებში ჩავედი ლონდონში და ორი კვირის თუ მეტი ხნის განმავლობაში ბადრის გვამს ოჯახს არ უბრუნებდნენ, მისი სკრუპულოზური გამოკვლევა მიდიოდა და ამის შემდეგ ვერაფერი ვერ გავიგეთ რა მოხდა. გარდაცვალებამდე ერთი კვირით ადრე იყო ისრაელიდან ჩამოსული, გამოკვლევების სრული კურსი ჩაიტარა. მე ვნახე ერთი კვირით თუ 10 დღით ადრე და საღსალამათი იყო კაცი. დღევანდელმა დღემ მოტანა ეს ისევ დღის წესრიგში. მაშინ პოლიტიკური კონიუნქტურაც სხვანაირი იყო და ამიტომ მიფარცხესავით. მე არც ერთი წუთი ეჭვი არ მეპარებოდა არასოდეს და ამის დამადასტურებელი უამრავი რამ იყო, მიუხედავად იმისა, რას ფიქრობდნენ ინგლისელები. მე ძალიან კარგად მახსოვს და არაერთხელ ჩემთანაც მოუყოლია ეს ამბავი ბატონ ოქრუაშვილს, როგორ შეუკვეთა სააკაშვილმა მას ბადრი პატარკაციშვილის მკვლელობა. პირდაპირ შეუკვეთა.

მან ეს პირდაპირ ეთერში თქვა, ინგა გრიგოლიასთან.

პირდაპირი ეთერის გარდა ჩემთან აქვს ეს ყველაფერი ნათქვამი ზუსტად. მე ხომ მაგათ კარგად ვიცნობდი, მე მაგათთან ორი წელი და ცხრა თვე ვმუშაობდი. მე ვიჯექი მთავრობის სხდომებზე, მე ვიჯექი უშიშროების საბჭოს სხდომებზე. მე ყოველდღიურ საქმიანობაში ვუყურებდი ამათ, რას ლაპარაკობდნენ ერთმანეთში, როგორი გარემო ჰქონდათ შექმნილი. ამიტომ გარდა იმისა, რომ შემდეგ ყველამ მოვისმენთ ეს ავად ხსენებული „მასტერა“ როგორ უკვეთავს, მე ფილმშიც მაქვს ეს. 2012 წელს, მათი მთავრობის დროს ფილმი მაქვს გაკეთებული, სადაც ეს ყველაფერი არის, სადაც უვაის ახმადოვს უკვეთავს ბადრის მკვლელობას და ეუბნება, ისე უნდა გაკეთდეს, რომ დაბრალდეს რუსეთს და ჩვენზე არავინ არ გამოვიდეს. მერე ის კაცი თვითონ ყვება, რატომ გააკეთა, რატომ ჩაიწერა ეს ლაპარაკი, იმიტომ რომ, „აბაროტი“ მინდოდა ამეღო, სააკაშვილმა და ამათ ჩვენი ბიჭები მოკლეს-ო. ეს ხომ ყველაფერი ვიცოდით და რატომ გახდა დღეს ეს საკითხი უცებ ისეთი, რომ თითქოსდა წინასაარჩევნოდაა. რა წინასაარჩევნო?!

მოდით, მაშინ დღევანდელობას დავუბრუნდეთ, რადგან წარსულზე თქვენ უკვე ვრცლად ისაუბრეთ. რატომ გახდა? იმიტომ გახდა, რომ პროკურატურისგანვე გავიგეთ, რომ 2016 წელს ჰქონდა პროკურატურას ეს მასალა ხელთ. გასაგებია, რომ მტკიცებულებათა ერთობლიობა აუცილებელია გამოძიებისთვის და იმისთვის, რომ საბოლოოდ მართლმსაჯულება დადგინდეს, მაგრამ ორი წლის განმავლობაში ჩვენ არ გვქონდა ამის შესახებ ინფორმაცია და დაემთხვა იმ პერიოდს, როდესაც საარჩევნო პერიოდი საკმაოდ აქტიურ ფაზაში გადავიდა. თქვენ პროკურატურის მიმართ თუ გაქვთ პრეტენზიები, მაგალითად გამოძიების დაგვიანებაზე?

გამოძიება დაგვიანებული არის თუ არა, ეს არ ვიცი და პროკურატურის მიმართ ძალიან ბევრი პრეტენზია მაქვს, რომ მოვყვე. ლევან გოგიჩაიშვილი ლაპარაკობდა და მეც ზუსტად იმ გუნდიდან ვარ, რომელსაც პროკურატურის ამ თანამშრომლების მხრიდან, რომლებიც დღესაც იქ არიან, თუ გინდათ მოსამართლეების, რომლებიც დღესაც იქ არიან, უამრავი უსამართლობა გვაქვს ნანახი და საკუთარ თავზე გადატანილი. ამიტომ ეს კითხვა დღეს დღის წესრიგში არ დგას. რაც შეეხება გამოძიებას, ჩემი ღრმა რწმენით, გამოძიებას მეორე სიცოცხლე მისცა ინგლისის საგამოძიებო ორგანოების გადაწყვეტილებამ, რომ თავიდან დაიწყოს ამ საქმეების მოკვლევა. ჯერ იქ საქმე არ არის აღძრული, მაგრამ მოკვლევა იწყება. დარწმუნებული ვარ ამ მოკვლევამ გაააქტიურა აქ. თუმცა, რაც მთავარია 2007 წელს იყო ოქრუაშვილის მიერ გაცხადებული...

მაგრამ ოქრუაშვილმა რამდენჯერმე შეცვალა თავისი ნათქვამი

მერე რა რომ შეცვალა? დღესაც ვხედავთ, რომ ყველა ყველაფერს ცვლის. რაც ჩვენ გვესმის ეს საშინელება, რისი მოწმეებიც ვართ, ეს ცილისწამება, სრული სიცრუე, რაღაც ნიაღვარი ამ სიბილწის, რომელიც ჩვენ გვესმის ყოველდღიურად, ყოველწუთიერად. მაგრამ მერე რა, რას ცვლის ეს?! ეს იმას ხომ არ ცვლის, რომ მათ ბადრის მოკვლა უნდოდათ და ამას არ მალავენ. ეს ხომ იმას არ ცვლის, რომ „მასტერა“ უკვეთავდა ახმადოვს ბადრის მკვლელობას, ეს ხომ იმას არ ცვლის, რომ მამარდაშვილს ეკითხებოდა ციხეში სხვა დროს და სხვა საქმესთან დაკავშირებით, ბადრის რაც ვუქენით ის უნდა ვქნათო?! ეს ყველაფერი ხომ სხვადასხვა დროს, სხვადასხვა ადამიანების მიერაა ნათქვამი, შესრულებული, შეკვეთილი, ამიტომ ერთობლიობა, რაზეც ასე ლაპარაკობენ, ზუსტადაც იმაზე მეტყველებდა, რომ მათ ბადრის მოკვლა უნდოდათ და ბოლო-ბოლო ბადრი მოკვდა იმ პირობებში, რა პირობებზეც დიდი კითხვის ნიშნებია. 

პროკურორი გვყავდა პირდაპირ ეთერში და როცა მე დავსვი კითხვა, ხომ არ შეიძლება ბადრი პატარკაციშვილის საქმესთან დაკავშირებით გამოძიებას სხვა კვალიფიკაცია მიეცეს და უკვე მკვლელობის მიმართულებით მოხდეს საქმის გამოძიება, მაგრამ პროკურორმა აღნიშნა, რომ ის აუდიო ჩანაწერები, რაც გვაქვს, საბოლოო შედეგთან კავშირში არ არის. ანუ, ასეთი პირდაპირი პასუხი ვერ მივიღეთ.

ვერც მიიღებთ, იმიტომ რომ ამ გამოძიებას ვერ დაიწყებს საქართველოს პროკურატურა, რადგან მკვლელობა ინგლისის ტერიტორიაზე მოხდა.

თქვენ ცალსახად ამბობთ, რომ მკვლელობა?

კი, მკვლელობა და აქ მხოლოდ და მხოლოდ იყო მცდელობა და მოლაპარაკება ამის თაობაზე. რა თქმა უნდა, ამ ფარგლებში შესაძლებელია მოკვლევა და ძიება გაგრძელდეს და უნდა გაგრძელდეს, თუმცა ფაქტი სადაც მოხდა, იქ უნდა იყოს დადასტურებული ამ ფაქტის რეალობა. დარწმუნებული ვარ, რომ ადრე თუ გვიან ეს მოხდება. დღეს თვითონ ბრიტანეთიც არის დაინტერესებული. იმიტომ რომ, მათი მეთოდია, ხელწერაა, ის ადამიანებიც, ვინც ამას ასულებდნენ და ვინც არიან ამის გარშემო. ეს „ნაციონალური მოძრაობა“, სააკაშვილი, ბიძამისი, გრიგოლ ვაშაძე, რუსეთის საგარეო საქმეთა სამინისტროს წარმომადგენელი, რომელიც კა-გე-ბეს დაწესებულება იყო ყოველთვის და არის დღესაც, უბრალოდ დღეს ფე-ეს-ბე ჰქვია. მე მათთან ბევრჯერ მქონია ურთიერთობა და არც ერთი ადამიანი, ვისაც არ აქვს კა-გე-ბეს სკოლა გავლილი, იქ ვერ მოხვდება. ეს იმათი ხელწერაა და შემსრულებულიც ისეთი იყო. მე დიდი ხანია ამას ვლაპარაკობ, რომ ეს ადამიანები, რომლებმაც ევროპული საქართველო ამოიფარეს და ასე ვთქვათ, ევროპაზე ლაპარაკობენ, სინამდვილეში რუსულ ინტერესებს ახორციელებდნენ საქართველოში. ეს ტერიტორიაზეც ვნახეთ,  იმ გაუბედურებულ ადამიანებზეც ვნახეთ, ბევრ საქმეზეც ვნახეთ, რომლის მომსწრენიც ვართ, რომლის გამოძიებაც მორჩა და რომლის სასამართლო შედეგებიც ვიცით. ეს ერთობლიობა ზუსტად მალაპარაკებს იმას, რომ ეს არის დანაშაულებრივი ორგანიზაცია, რომელიც საქართველოს ინტერესების საწინააღმდეგოდ მოქმედებს.   

ახლა თქვით - ევროპული საქართველო. პოლიტიკური მოძრაობა „ევროპული საქართველოს“ ამოიფარეს რუსული ინტერესების გასატარებლად, ამას გულისხმობთ?  

ეს არ არის პოლიტიკური მოძრაობა.

„ევროპულ საქართველოს“ პირიქით აქვს პრეტენზია „ქართული ოცნების“ მიმართ.

იმათ პრეტენზია ბევრ რამეზე ჰქონდათ, მაგრამ აღლუმების დროს გვამები ედოთ სახურავებზე. ის ქალბატონი, ამ სტუდიაში რომ იჯდა და სამართალზე რომ ლაპარაკობს, იმათ რაზე აქვთ პრეტენზია ეს სხვა საქმეა, ჩვენ რა პრეტენზიები გვაქვს?!

თქვენ თქვით, რომ პრეტენზია პროკურატურასთან დაკავშირებით გაქვთ. რადგანაც ბადრი პატარკაციშვილის საქმეზე ვსაუბრობთ, ერთ-ერთი მთავარი პრეტენზია ჩვენს სტუმარს ჰქონდა ასეთი, რომ კი, უნდა მოხდეს ამ საქმის გამოძიება, მაგრამ პროკურატურას მიმდინარე თემებზე არ აქვს ასეთი დამოკიდებულება, რომ ერთის მხრივ, იძიებს იმ საქმეებს, რომელიც წარსულშია ჩადენილი, როდესაც მეორე პლანზე აქვს გადადებული თემები, რომელიც დღესაც პრობლემატური და აქტიურია. თქვენ არ დაგრჩათ ასეთი განცდა?

ესეც საზოგადოების შეცდომაში შეყვანის მცდელობაა, იმიტომ რომ, ეს ასე არ არის, დღევანდელ საქმეებსაც იძიებს პროკურატურა. პროკურატურის ხარისხი, მე მგონი, ჩვენი დღევანდელი საუბრის თემა არ არის, თორემ შეგვიძლია ამაზეც ვილაპარაკოთ. არავინ აპირებს თავზე ხელის გადასმას. თუ ვინმე არის ამისკენ მაცქერალი და თუ ვინმეს შეიძლება ჰქონდეს ამასთან დაკავშირებით პრეტენზიები, ლევან გოგიჩაიშვილი და მე ზუსტად ის ადამიანები ვართ, ვისაც ეს პრეტენზიები გააჩნია. მე ვხედავ მოსამართლეებს, რომლებიც დარბაზიდან მაგდებდნენ, ვხედავ პროკურორებს, რომლები სისხლის სამართლის საქმეებს აღძრავდნენ ჩემ წინააღმდეგ, როდესაც მე აბსოლუტურად უდანაშაულო ვიყავი და ასე შემდეგ, მაგრამ ეს სხვა თემაა. რეალობა, რომელიც საქართველოში შეიქმნა ამ ნაცისტური რეჟიმის მერე და ვთქვათ, როგორ უპასუხა ქვეყანამ, ახალმა მთავრობამ ამ გამოწვევებს, ეს სხვა თემაა, მაგრამ რას სჩადიოდნენ ისინი - სულ სხვა თემაა. მცდელობა ამაზე ლაპარაკის მიფარცხვის, რომ ოხ, 9 წელი, 9 წელი კი არა 29 წელი გაგრძელდება ეს, 90 წელი გაგრძელდება, რომ აღარასოდეს განმეორდეს ის უბედურება, ის არაადამიანური ქმედებები, ანტისაკაცობრიო ქმედებები, რომელიც ჩადენილი აქვს „ნაციონალურ მოძრაობას“ სააკაშვილის მეთაურობით და ყველა იმ ადამიანით, მაგალითად, როგორიც დღეს იდეოლოგი ბოკერიაა. ფაშიზმია სწორედ ეს. არ მოეწონათ იქ ამ ანტისამთავრობო ორგანიზაციებს, რომ ეს სიტყვა იხმარა ირაკლიმ, ზუსტად ეს სიტყვაა, იმიტომ რომ, ფაშისტური მანიფესტი, რომელსაც გებელსი წარმოადგენს, ნებისმიერი მისი სიტყვა აიღეთ, შეადარეთ ამას და ნახავთ, რომ ერთი-ერთშია. ისეთი შთაბეჭდილება მაქვს, რომ გვარამიამ პირდაპირ გებელსის სიტყვიდან გადმოიწერა. იმიტომ რომ, მაგდენი ჭკუა არ ეყოფოდა, რომ ასე დაელაგებინა. გავრიყოთ საზოგადოებრივი ცხოვრებიდან, ამის შემდეგი ნაბიჯი არის საკონცენტრაციო ბანაკი. ჰქონდათ გლდანშიც, ქუთაისშიც, ზუგდიდშიც, ყველგან ჰქონდათ ეს საკონცენტრაციო ბანაკები. როგორი ბანაკები ჰქონდათ და რას სჩადიოდნენ, ნახავენ „იმედის“ ეთერში.

მაყურებელს ვეტყვი, რომ 23:00 საათზე გოგა ხაინდრავას ფილმი გადის „იმედის“ ეთერში და რა საქმეებთანაა დაკავშირებული ფილმი, რომ გვითხრათ?

მე ადამიანებისგან განსხვავებით არ ვლაპარაკობ, ჩემი პროფესია არის ჩვენება. ისინი ლაპარაკობენ, ენას ძვალი არ აქვს, რაც გინდა, შეგიძლია ილაპარაკო. ჩემი პროფესია გულისხმობს იმას, რომ 100-ჯერ გაგონილს ერთხელ ნანახი სჯობს. ამიტომ მე ვაჩვენებ ქართველ ხალხს, ჩემს მეზობლებს, მეგობრებს, მთელ მსოფლიოს. სხვათა შორის ეს ფილმი ბევრ ფესტივალზე იქნება წარდგენილი. ასე ვთქვათ, შიდა მოხმარების ფილმად არ ვაკეთებდი ამას, სხვა მიზნები ჰქონდა, მაგრამ დღეს რაც მესმის, ეს აბსოლუტურად გაუწონასწორებელი, ეს რბილი სიტყვაა ძალიან, წაგვლეკა ამ სიბილწემ და მცდელობამ, რომ წარსული, ისტორია რეალობა გადაკეთდეს. ამიტომ გავახსენებ რეალობასაც, წარსულსაც და ისტორიასაც, რომ ეს მომავალში არ განმეორდეს.

ვიდეო

კომენტარები ()

სხვა ინტერვიუები